រាជធានីភ្នំពេញ ៖ ប្រធានរដ្ឋបាលជលផលបានអះអាងថា ត្រីសម្រាប់ធ្វើប្រហុកផ្អកឆ្នាំនេះសម្បូរជាងឆ្នាំមុន ហើយប៉ុន្មានថ្ងៃនេះ ត្រីកំពុងត្រូវខ្លាំង ដែលអាចឲ្យប្រជាពលរដ្ឋមកពីទីជិតឆ្ងាយ អាចមកធ្វើប្រហុកផ្អកតាមតម្រូវការបាន ។ ក្នុងឱកាសចុះត្រួតពិនិត្យស្ថានភាពប្រមូលផលត្រីទឹកសាបនៅគន្លងដៃនេសាទជួរលេខ១៣…
រាជធានីភ្នំពេញ ៖ ប្រធានរដ្ឋបាលជលផលបានអះអាងថា ត្រីសម្រាប់ធ្វើប្រហុកផ្អកឆ្នាំនេះសម្បូរជាងឆ្នាំមុន ហើយប៉ុន្មានថ្ងៃនេះ ត្រីកំពុងត្រូវខ្លាំង ដែលអាចឲ្យប្រជាពលរដ្ឋមកពីទីជិតឆ្ងាយ អាចមកធ្វើប្រហុកផ្អកតាមតម្រូវការបាន ។
ក្នុងឱកាសចុះត្រួតពិនិត្យស្ថានភាពប្រមូលផលត្រីទឹកសាបនៅគន្លងដៃនេសាទជួរលេខ១៣ ១៤ និងលេខ១៥ ស្ថិតក្នុងឃុំកោះចិន និងពាមជីនិត ស្រុកពញាឮ ខេត្តកណ្តាល លោក អេង ជាសាន ប្រតិភូរាជរដ្ឋាភិបាលកម្ពុជា ទទួលបន្ទុកជាប្រធានរដ្ឋបាលជលផល បានឲ្យដឹងថា ត្រីបានត្រូវខ្លាំងក្នុងរយៈពេល២-៣ថ្ងៃនេះ បើទោះបីអាកាសធាតុមិនអំណោយផល ភ្លៀងនិងព្យុះកើតឡើងនៅតំបន់បឹងទន្លេសាបក្តី។
លោកបញ្ជាក់ថា ៖« នៅតាមគន្លងជួរនេសាទនីមួយៗក្នុង១ម៉ោងឬកន្លះម៉ោង អាចលើកបានត្រីចន្លោះពី៥០០គីឡូក្រាម ទៅ១តោន ភាគច្រើនជាត្រីធ្វើប្រហុកផ្អក »។
លោក អេង ជាសាន បានបញ្ជាក់បន្ថែមថា ៖« ត្រីសម្រាប់ធ្វើប្រហុកផ្អក តម្លៃសមរម្យចាប់ពីពី៨០០ទៅជាង១ពាន់ ឬ២ពាន់រៀលក្នុង១គីឡូក្រាម ទៅតាមទំហំនិងប្រភេទត្រី »។ លោកបន្ថែមថា ៖« ត្រីឆ្នាំនេះសម្បូរជាងឆ្នាំទៅ ដោយសារទឹកឡើងធំតាំងពីដើមឆ្នាំ លិចបឹងបួរ ធ្វើឲ្យត្រីចរាចរណ៍ស្វែងរកចំណីបានយ៉ាងងាយស្រួល គួបផ្សំនឹងការលែងត្រីមេពូជក្នុងដែនជំរកធម្មជាតិ និងការបង្ក្រាបបទល្មើសនេសាទដូចភ្លៀងរលឹម ធ្វើឲ្យផលត្រីកាន់តែសម្បូរ »។
ប្រធានរដ្ឋបាលជលផលបានអំពាវនាវដល់ប្រជាពលរដ្ឋដែលមានបំណងធ្វើប្រហុកផ្អកឬត្រីឆ្អើរ ត្រូវរួសរាន់ទៅធ្វើបន្តទៀតរហូតដល់ពាក់កណ្តាលសប្តាហ៍នេះ ដោយត្រីមិនខ្វះឡើយ ហើយមានតម្លៃសមរម្យក្រោម១.០០០រៀលក្នុងមួយគីឡូក្រាមប៉ុណ្ណោះ ។
អ្នកស្រី សាយ ហិន មកពីខណ្ឌពោធិ៍សែនជ័យ បានឲ្យដឹងថា អ្នកស្រីតែងតែមកធ្វើប្រហុកផ្អកនៅទីនេះជារៀងរាល់ឆ្នាំ ដើម្បីចែកចាយដល់កូនចៅក្នុងក្រុមគ្រួសារទុកជាស្បៀងបំរុងទុកក្នុងជីវភាពប្រចាំថ្ងៃ ។
យោងតាមសេចក្តីជូនដំណឹងស្តីពីរដូវធ្វើប្រហុក ផ្អក របស់រដ្ឋបាលជលផល កាលពីថ្ងៃទី១១ ខែធ្នូ ឆ្នាំ២០១៨ បានឲ្យដឹងថា ឆ្នាំនេះកម្ពស់ទឹកទន្លេសាបស្រកចុះលឿនជាងឆ្នាំកន្លងមក ជាហេតុធ្វើឲ្យដាយនៅតាមដងទន្លេសាបក្នុងភូមិសាស្ត្ររាជធានីភ្នំពេញ និងខេត្តកណ្តាលអាចនេសាទត្រីបានក្នុងខែមិគសិរចាប់ពីថ្ងៃទី១៤ ដល់ថ្ងៃទី២០ខែធ្នូ ។
ក្នុងឱកាសអញ្ជើញចុះពិនិត្យផលត្រីនៅរដូវនេសាទ កាលពីថ្ងៃទី១៣ ខែធ្នូ កន្លងមក លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានអំពាវនាវដល់ប្រជានេសាទនៅទីជិតឆ្ងាយអញ្ជើញមកធ្វើប្រហុក ផ្អកទុកបរិភោគក្នុងគ្រួសារ ៕
ចែករំលែកព័តមាននេះ