រាជធានីភ្នំពេញ ៖ នគរបាលប៉ុស្តិ៍ចោមចៅទី២ល្បាតនៅក្នុងមូលដ្ឋានស្មុគស្មាញបានឃាត់ខ្លួនជនសង្ស័យចំនួន២នាក់ រួមទាំងថ្នាំញៀនចំនួន៩កញ្ចប់ កាលពីវេលាម៉ោង១០នឹង៤០នាទីយប់ថ្ងៃទី១៨ ខែធ្នូ ឆ្នាំ២០១៨ នៅតាមបណ្ដោយផ្លូវបេតុងភូមិថ្មគោល២ សង្កាត់ចោមចៅទី២ ខណ្ឌពោធិ៍សែនជ័យ ។
ជនសង្ស័យទាំង២នាក់ខាងលើ ម្នាក់ឈ្មោះ ភា ភូ ភេទប្រុស អាយុ១៦ឆ្នាំ មុខរបរលក់លៀសហាល ស្នាក់នៅផ្ទះជួលភូមិ ថ្មគោល១ សង្កាត់ទី១ ខណ្ឌពោធិ៍សែនជ័យ និងម្នាក់ទៀតឈ្មោះ ឈាង សម្ភព ភេទប្រុស អាយុ១៧ឆ្នាំ មុខរបរកម្មកររោងចក្រ ស្នាក់នៅភូមិត្រពាំងថ្លឹង សង្កាត់ចោមចៅទី១ ខណ្ឌពោធិ៍សែនជ័យ ។
តាមប្រភពព័ត៌មានពីកំលាំងនគរបាលប៉ុស្តិ៍ចោមចៅទី២បានអោយដឹងថា នៅមុនពេលកើតហេតុ កម្លាំងនគរបាលប៉ុស្តិ៍ចោមចៅ២មានគ្នាចំនួន៦នាក់ជិះម៉ូតូ៣គ្រឿងបានចុះល្បាតនៅក្នុងមូលដ្ឋាន លុះមកដល់កន្លែងកើតហេតុ ស្រាប់តែឃើញជនសង្ស័យកំពុងតែអង្គុយលើកង់ ដោយមានការសង្ស័យបានឃាត់ឆែកឆេរទៅលើជនសង្ស័យឈ្មោះ ភា ភូ ដែលកំពុងអង្គុយលើកង់ ហើយបន្ទាប់មកបានរកឃើញថ្នាំញៀនមួយថង់ ក្នុងនោះមានថ្នាំញៀនចំនួន៩កញ្ចប់តូច ឃើញជនសង្ស័យម្នាក់ទៀតនៅឈរជិតគ្នា បានឃាត់ខ្លួនទាំង២នាក់ភ្លាមៗផងដែរ ដើម្បីយកទៅសាកសួរបន្ត។
ពេលសមត្ថកិច្ចសាកសួរ ជនសង្ស័យខាងលើបានសារភាពថា ថ្នាំញៀនទាំងនោះពិតជារបស់ខ្លួនប្រាកដមែន ចំណែកជនសង្ស័យម្នាក់ទៀតដែលធ្លាប់ជក់ថ្នាំញៀនដែរនោះ ក៏ត្រូវសមត្ថកិច្ចឃាត់ផងដែរ។
ក្រោយពេលកើតហេតុ នគរបាលប៉ុស្តិ៍ចោមចៅទី២បានកសាងសំណុំរឿងបញ្ជូនជនសង្ស័យទាំង២នាក់ទៅជំនាញព្រហ្មទណ្ឌខណ្ឌពោធិ៍សែនជ័យដើម្បីចាត់ការតាមច្បាប់ ៕
ចែករំលែកព័តមាននេះ