ខេត្តបាត់ដំបង ៖ លោក កត បូរ៉ាន ប្រធានមន្ទីរបរិស្ថានខេត្តបាត់ដំបង បានឱ្យដឹងថា មានវត្តមានសត្វខ្លាឃ្មុំជាច្រើននៅក្នុងតំបន់ការពារធម្មជាតិក្នុងខេត្តបាត់ដំបង។ លោកបានអះអាងបែបនេះ ពេលសមត្ថកិច្ចបានឃើញដានជើងនៅលើដី…
ខេត្តបាត់ដំបង ៖ លោក កត បូរ៉ាន ប្រធានមន្ទីរបរិស្ថានខេត្តបាត់ដំបង បានឱ្យដឹងថា មានវត្តមានសត្វខ្លាឃ្មុំជាច្រើននៅក្នុងតំបន់ការពារធម្មជាតិក្នុងខេត្តបាត់ដំបង។ លោកបានអះអាងបែបនេះ ពេលសមត្ថកិច្ចបានឃើញដានជើងនៅលើដី និងរោមសត្វខ្លាឃ្មុំធំជាប់នឹងស្នាមរបួស ដែលវាចេញពីព្រៃមកខាំសត្វគោមួយក្បាលជារបស់ប្រជាពលរដ្ឋឈ្មោះ ស៊ុន ភាព ដែលរស់នៅភូមិស្ទឹងតូច ឃុំកំពុងល្ពៅ នៅស្រុកសំឡូត ខេត្តបាត់ដំបង។
លោក កត បូរ៉ាន បានបញ្ជាក់បន្ថែមថា នេះពិតជាមានវត្តមាននៃសត្វខ្លាឃ្មុំពិតប្រាកដ ព្រោះពេលពិនិត្យឃើញមានរោម និងស្នាមក្រចកជាប់នឹងរបួសសត្វគោ ដោយឡែករបៀបវាយប្រហារចំណីអាហាររបស់សត្វខ្លាឃ្មុំគឺវាខាំបំពង់កក្រោម និងខ្ទប់ចម្រុះ។
តាមផេកផ្លូវការរបស់ក្រសួងបរិស្ថាន លោក កត បូរ៉ាន បានឱ្យដឹងដែរថា ក្នុងតំបន់ប្រើប្រាស់ច្រើនយ៉ាងសំឡូត ដែលស្ថិតនៅក្នុងស្រុកសំឡូត ខេត្តបាត់ដំបង ជាជម្រករស់នៅនៃហ្វូងសត្វខ្លាឃ្មុំព្រៃ ដែលសត្វខ្លាឃ្មុំខ្លះមានទំងន់ចាប់ពី១៤០គីឡូក្រាម។
លោកប្រធានមន្ទីរបរិស្ថានខេត្តបាត់ដំបង បញ្ជាក់ដែរថា បន្ទាប់ពីមានការការពារ និងអភិរក្សធនធានធម្មជាតិបានល្អប្រសើរនៅតាមតំបន់ការពារធម្មជាតិ រយៈពេល១០កន្លងមកនេះ ជាពិសេសនៅក្នុងខេត្តបាត់ដំបង គឺវត្តមានសត្វព្រៃមានចំនួនកើនឡើងច្រើន។ បើតាមរយៈការអង្កេតចាប់បានពីកាមេរ៉ានៅតំបន់ការពារធម្មជាតិ ថនិកសត្វធំៗជាច្រើនបានបង្ហាញខ្លួន ជាពិសេសចំនួនសត្វខ្លាឃ្មុំ និងខ្លារខិន។
សូមបញ្ជាក់ថា បច្ចុប្បន្ននេះ ក្រសួងបរិស្ថានបានបង្កើត និងគ្រប់គ្រងតំបន់ការពារធម្មជាតិ ចំនួន៥១កន្លែង ប្រកបដោយប្រសិទ្ឋភាព និងល្អប្រសើរ លើផ្ទៃដីប្រមាណ៧លាន៥សែនហិកតា៕
ចែករំលែកព័តមាននេះ