ខេត្តបាត់ដំបង ៖ គោមួយក្បាលបានងាប់ដោយមានស្នាមរបួសជាច្រើនកន្លែង ដែលគេសង្ស័យថាគោនោះអាចងាប់ដោយសារខ្លាដ៏ធំមួយក្បាលចូលមកខាំបម្រុងស៊ី នាវេលារំលងអធ្រាត្រឈានចូលថ្ងៃទី១៨ ខែធ្នូ នៅភូមិស្ទឹងតូច ឃុំកំពង់ល្ពៅ ស្រុកសំឡូត ។
អ្នកភូមិបានឲ្យដឹងថា គោដែលងាប់នោះមានស្នាមរបួសត្រង់កផ្នែកខាងលើ និងបូក មិនតែប៉ុណ្ណោះថែមទាំងបាក់កទន់រងាកទៀតផង ។ បើតាមម្ចាស់គោឈ្មោះ ស៊ុន ភាព ភេទប្រុស អាយុ៣២ឆ្នាំ បានឲ្យដឹងថា គាត់បានដឹងនៅពេលព្រឹកឡើង ខណៈឃើញគោងាប់ទៅហើយដោយមានស្នាមរបួសនិងឈាមនៅក ។ ពេលនោះគាត់មានការភ្ញាក់ផ្អើលយ៉ាងខ្លាំង ហើយទាំងអ្នកភូមិនិងរូបគាត់បានដាក់ការសង្ស័យថា គោរបស់គាត់អាចងាប់ដោយសារខ្លាចូលមកខាំ ព្រោះមានស្នាមចង្កូមជាច្រើនកន្លែងទំហំប៉ុនៗម្រាមដៃនិងជម្រៅលេចមួយចង្អុលដៃ មានស្នាមក្រចកពេញលើខ្នង ហើយថែមទាំងបាក់កទន់រងាកទៀតផង ។
បើតាមអ្នកភូមិនិយាយថា ខ្លានោះបានខាំគោងាប់ហើយបម្រុងហែកស៊ីតែម្តង តែវាត្រូវរំខានពេលកំពុងខាំស៊ីគោ ដោយសារមានមនុស្សម្នាជាច្រើនដើរតាមថ្នល់ ដែលពួកគេទើបចេញពីមើលការប្រគំតន្ត្រីនៅក្នុងភូមិ ហើយវាក៏ផ្អើលរត់ចូលព្រៃវិញបាត់ទៅ ។ អ្នកភូមិបានបញ្ជាក់ដែរថា ខ្លាដ៏ធំនោះជាប្រភេទខ្លាដំបង មានប្រភពមកពីជួរភ្នំក្រវាញ ។ អ្នកភូមិតែងប្រទះឃើញដានខ្លាកំណាចនេះជារឿយៗ នៅតាមចម្ការពោត ឬនៅក្បែរៗភូមិនៅតំបន់នោះ។
ប្រភពដដែលនិយាយទៀតថា កាលពីឆ្នាំមុនខ្លាដ៏ធំនេះក៏ធ្លាប់លបចូលភូមិនៅតំបន់នោះដែរ ក្នុងគោលបំណងស្វែងរកចំណីដែលអ្នកភូមិបានប្រទះឃើញដាន ។ ដោយសារតែខ្លាចេះតែបង្ហាញខ្លួនចូលភូមិទាំងយប់អធ្រាត្របែបនេះ ទើបធ្វើឲ្យប្រជាពលរដ្ឋមានការភ័យខ្លាចយ៉ាងខ្លាំង ព្រោះខ្លាចថ្ងៃណាមួយខ្លានេះចូលភូមិបង្កគ្រោះថ្នាក់ដល់មនុស្ស ៕
ចែករំលែកព័តមាននេះ