រាជធានីភ្នំពេញ ៖ ជាថ្មីម្ដងទៀត មន្ត្រីជាន់ខ្ពស់នៃក្រសួងរ៉ែ និងថាមពល បានអះអាងថា កម្ពុជានឹងទទួលបានដំណក់ប្រេងដំបូងរបស់ខ្លួននៅចុងឆ្នាំ២០១៩ ។ ការអះអាងបែបនេះ ដោយផ្អែកទៅលើផែនការកម្មវិធីដែលក្រុមហ៊ុនវិនិយោគកំពុងដំណើរសកម្មភាពសព្វថ្ងៃ ។
អគ្គនាយកនៃអគ្គនាយកដ្ឋានប្រេងកាតនៃក្រសួងរ៉ែ និងថាមពល លោក ជៀប សួរ បានមានប្រសាសន៍ក្នុងវេទិកាស្តីពីការរំពឹងទុកចំពោះវិស័យប្រេងកាតនៅកម្ពុជា កាលពីថ្ងៃទី១៦ ធ្នូ ថា កម្ពុជានឹងទទួលបានដំណក់ប្រេងដំបូងនៅចុងឆ្នាំ២០១៩តាមផែនការគ្រោងទុក ខណៈបច្ចុប្បន្ន ក្រុមហ៊ុនដែលទទួលបានសិទ្ធិវិនិយោគកំពុងធ្វើលទ្ធកម្មក្នុងការជ្រើសរើសក្រុមហ៊ុនផ្តល់សេវាកម្មសាងសង់ក្បាលអណ្តូង និងជ្រើសរើសក្រុមហ៊ុនខួងអណ្តូង ។ លោកបញ្ជាក់ថា ៖« ឥឡូវនេះ ក្រុមហ៊ុនកំពុងធ្វើការជ្រើសរើសក្រុមហ៊ុនផ្តល់នាវាធ្វើលទ្ធកម្ម ហើយគាត់កំពុងជួសជុលកប៉ាល់ ដើម្បីត្រៀមមកធ្វើការនៅក្នុងតំបន់ប្លុកAនេះ »។ លោកថា ៖« ការងារទាំងអស់ដែលយើងបានឯកភាព គឺក្រុមហ៊ុនកំពុងតែអនុវត្ត ហើយយើងមានការប្រជុំបូកសរុបជាមួយក្រុមហ៊ុនរយៈពេល៦ខែម្តង ។ អីចឹង បានជាយើងអះអាងថា ផែនការនេះគឺនៅចុងឆ្នាំ២០១៩ យើងនឹងទទួលបានដំណក់ប្រេង »។
លោកលើកឡើងថា ប្រេងដែលបានរកឃើញ ទើបតែមាននៅក្នុងប្លុកA ក្នុងតំបន់អប្សរាទេ ហើយកម្រិតអាចធ្វើអាជីវកម្មបាន ក្នុងនោះ មានប្លុកAនិងB ដែលអាចវាយតម្លៃដំបូងមានប្រមាណ៣០លានបារ៉ែលក្នុងរយៈពេលផលិត៩ឆ្នាំ ។ លោកអគ្គនាយកបន្ដថា ៖« ទន្ទឹមនឹងកម្ពុជានឹងទទួលបានដំណក់ប្រេងនេះ យើងក៏កំពុងរៀបចំច្បាប់ ស្តីពី ការគ្រប់គ្រងប្រេងកាត និងផលិតផលប្រេងកាត ដែលជិតបញ្ជូនទៅដល់គណៈរដ្ឋមន្ត្រីដើម្បីពិនិត្យ និងសម្រេច ហើយបន្ដដាក់ឆ្លងអង្គសភា និងព្រឹទ្ធសភា ។ លោកបញ្ជាក់ថា ៖« ច្បាប់យើងនេះជិតចេញ ហើយ។ ទន្ទឹមនេះ យើងរៀបចំយន្តការគ្រប់គ្រង ការពង្រឹងអភិបាលកិច្ច ពង្រឹងជំនាញដល់មន្ត្រី ពង្រឹងបទដ្ឋានគតិយុត្ត ដូចជា អនុក្រឹត្យ ដើម្បីអនុវត្តច្បាប់ប្រេងកាត »។
បើតាមលោក ជៀប សួរ អគ្គនាយកនៃអគ្គនាយកដ្ឋានប្រេងកាតនៃក្រសួងរ៉ែ និងថាមពលកម្ពុជានាំចូលប្រេងគ្រប់ប្រភេទមកពីបរទេសមានប្រមាណ២លានតោន ក្នុង១ឆ្នាំៗ ។ កម្ពុជាមានធនធានប្រេងកាតនៅដែនគោកប្រមាណ១៩ប្លុក, ដែនសមុទ្រ៦ប្លុក(A-F) និងតំបន់ត្រួតគ្នារវាងកម្ពុជា-ថៃ ៤តំបន់ ។ នៅពេលកម្ពុជាក្លាយជាប្រទេសផលិតប្រេងនោះ កម្ពុជារំពឹងទទួលបានអត្ថប្រយោជន៍យ៉ាងច្រើនតាមរយៈចំណូលសារពើពន្ធ, មានសន្ដិសុខថាមពល, កំណើនឧស្សាហកម្មពាក់ព័ន្ធ,ជំរុញកំណើនសេដ្ឋកិច្ច ក្នុងនោះ នឹងទាក់ទាញវិនិយោគិនក្នុងនិងក្រៅស្រុក, បង្កើនផលិតផលក្នុងស្រុកសរុប ,បង្កើនការងារដល់ប្រជាពលរដ្ឋនិងចំណេះដឹង និងបង្កើនចំណូលប្រជាពលរដ្ឋ ផងដែរ ។
ក្រៅពីប្លុកA ធនធានប្រេងក្នុងដែនសមុទ្ររបស់កម្ពុជា នៅមានប្លុកដទៃទៀតដែលសុទ្ធតែមានសក្ដានុពលក្នុងការវិនិយោគ ហើយក៏មានវិនិយោគិនកំពុងចាប់អារម្មណ៍ដែរ ប៉ុន្តែដោយសារតែតម្លៃប្រេងក្នុងទីផ្សារអន្តរជាតិធ្លាក់ចុះ និងការចរចាជាមួយរាជរដ្ឋាភិបាលកម្ពុជា មិនទាន់ត្រូវគ្នា ទើបវិនិយោគិនទាំងនោះមិនទាន់មានសកម្មភាព ។ ទោះជាយ៉ាងណា បន្ទាប់ពីដំណើរការបូមប្រេងចេញពីអណ្តូងអប្សរានេះទៅ ប្លុកប្រេងទាំងនោះនឹងត្រូវបានវិនិយោគជាបន្ដបន្ទាប់ទៀត ។
យោងតាមសេចក្តីប្រកាសព័ត៌មានរបស់ ក្រុមហ៊ុ នKRISENGERGY បានឲ្យដឹងកាលពីពេលថ្មីៗនេះថា ក្រុមហ៊ុន SJ Production Barge Ltd ដែលជាបុត្រសម្ព័ន្ធរបស់ខ្លួន បានផ្តល់កិច្ចសន្យាទៅឲ្យក្រុមហ៊ុនKeppel Shipyard Ltd ដើម្បីធ្វើការកែលម្អ និងធ្វើឲ្យប្រសើរឡើងនូវនាវាផលិតកម្មរបស់ខ្លួន ដែលមានតម្លៃ២២លានដុល្លារអាមេរិក ។
ក្រុមហ៊ុន KRISENERGY បាននិងកំពុងរុករកប្រេងពីតំបន់ប្លុកA ដែលមានទំហំ៣ពាន់គីឡូម៉ែត្រការ៉េ ដែលជាតំបន់មានជម្រៅទឹកចន្លោះពី៥០ទៅ៨០ម៉ែត្រ មានចម្ងាយប្រមាណ១៧០គីឡូម៉ែត្រពីឆ្នេរសមុទ្រខេត្តព្រះសីហនុ ។ក្រុមហ៊ុនបានប្រកាសថា ៖« ខ្លួននឹងអាចទាញយកដំណក់ប្រេងបាន៣ម៉ឺនបារ៉ែលក្នុង១ថ្ងៃ នៅចុងឆ្នាំ២០១៩ខាងមុខនេះនៅដែនសមុទ្ររបស់កម្ពុជា »៕
ចែករំលែកព័តមាននេះ