ខេត្តបន្ទាយមានជ័យ ៖ ស្រូវប្រហែល២ហិកតា បានត្រូវភ្លើងឆេះ បង្កឲ្យមានការភ្ញាក់ផ្អើលកាលពីថ្ងៃទី
១៦ ខែធ្នូ វេលាម៉ោង១២ និង៣០នាទីថ្ងៃត្រង់ នៅខាងត្បូងផ្លូវរថភ្លើងជាង១គីឡូម៉ែត្រ ស្ថិតក្នុងភូមិណា
កាឆាយ ឃុំកូប ស្រុកអូរជ្រៅ ។ នៅក្នុងហេតុការណ៍នេះ កងកម្លាំងនគរបាលស្រុកអូរជ្រៅដឹកនាំដោយ
លោកវរសេនីយ៍ត្រី អឹុមសារ៉ាត់ អធិការរងទទួលសេនាធិការដ្ឋាន និងលោកអនុសេនីយ៍ឯក រី សារ៉េត
អធិការរងទទួលកិច្ចការប៉ុស្តិ៍ រួមជាមួយនគរបាលប៉ុស្តិ៍កូប កម្លាំងប្រជាការពារ និងប្រជាពលរដ្ឋផង
បានទៅជួយធ្វើអន្តរាគមន៍ពន្លត់ ។
តាមការលោកវរសេនីយ៍ទោ សែស វិបុល អធិការនគរបាលស្រុកអូរជ្រៅបានឲ្យដឹងថា អ្នកភូមិដែលរងការខូចខាតស្រូវ ដោយសារភ្លើងឆេះនេះ មាន៤នាក់ គឺ ៖១-ឈ្មោះ លឹម យ៉ៃ ភេទស្រី អាយុ៦៦ឆ្នាំ រស់នៅភូមិខៃដន ឃុំកូប ឆេះអស់៣រ៉ៃ (១រ៉ៃ=៤០ម៉ែត្រx៤០ម៉ែត្រ)២-ឈ្មោះ សើន សុភ័ក្ត្រ ភេទប្រុស អាយុ៣៤ឆ្នាំ រស់នៅភូមិអូរជ្រៅ ឃុំកូប ឆេះអស់៣រ៉ៃ៣-ឈ្មោះ ខឿន រ៉ាឌី ភេទប្រុស អាយុ២៦ឆ្នាំ រស់នៅភូមិអូរជ្រៅ ឃុំកូប ឆេះអស់៣រ៉ៃ និង៤-ឈ្មោះ ឆែម រី ភេទប្រុស អាយុ៣៦ឆ្នាំ រស់នៅភូមិអូរជ្រៅ ឃុំកូប ឆេះអស់៣រ៉ៃ ។ សរុបទាំងអស់គឺប្រហែល២ហិកតា ជាស្រូវដែលកំពុងទទួលផលទៅហើយ ។
លោកអធិការបញ្ជាក់ថា ក្រោយពីមានមហន្តរាយកើតឡើង ឆ្លងតាមការសាកសួរព័ត៌មាន គឺមុនពេលកើតហេតុ ក្រុមក្មេងឃ្វាលគោបាននាំគ្នាដុតខ្យងនិងត្រី ហើយពន្លត់មិនអស់ទុកភ្លើងចោល ក៏បណ្តាលឲ្យរាលឆេះស្រូវតែម្តង ។
ជាមួយគ្នានេះ លោកអធិការបានផ្តាំផ្តើដល់ប្រជាពលរដ្ឋត្រូវណែនាំកូនចៅកុំឲ្យមានការដុតភ្លើងនៅវាល ស្រែ នាំឲ្យមានភ្លើងឆាបឆេះបង្កឲ្យខូចខាតទ្រព្យសម្បត្តិរបស់អ្នកដទៃ ព្រោះរដូវនេះជារដូវក្តៅហួតហែង ជារដូវធ្លាក់ខ្យល់ខ្លាំង ងាយនឹងបង្កឲ្យកើតមានអគ្គិភ័យណាស់ ៕
ចែករំលែកព័តមាននេះ