រាជធានីភ្នំពេញ ៖ ក្រុមកម្មករ-កម្មការិនីរោងចក្រកាត់ដេរយីហោ«សុីធីស្ប៉ាក» CITY SPARK ថាបានជួលក្រុមជើងកាងប្រមាណជាង១០នាក់ប្រដាប់ដោយប៉ែល ចបកាប់ ដំបង និងញញួរ ព្រមទាំងដុំឥដ្ឋ…
រាជធានីភ្នំពេញ ៖ ក្រុមកម្មករ-កម្មការិនីរោងចក្រកាត់ដេរយីហោ«សុីធីស្ប៉ាក» CITY SPARK ថាបានជួលក្រុមជើងកាងប្រមាណជាង១០នាក់ប្រដាប់ដោយប៉ែល ចបកាប់ ដំបង និងញញួរ ព្រមទាំងដុំឥដ្ឋ ទៅធ្វើសកម្មភាពវាយទៅលើពួកគាត់ដែលកំពុងនាំគ្នាធ្វើការតវ៉ាទាមទារនូវលក្ខខណ្ឌការងារ ។
ហេតុការណ៍នោះបានកើតឡើងកាលពីវេលាម៉ោង១១ព្រឹកថ្ងៃទី១៨ ខែធ្នូ ឆ្នាំ២០១៨ នៅចំណុចមុខរោងចក្រខាងលើ ដែលមានទីតាំងស្ថិតនៅក្នុងភូមិកន្ទោកខាងជើង សង្កាត់កន្ទោក ខណ្ឌពោធិ៍សែនជ័យ រាជធានីភ្នំពេញ។
កម្មករបាននិយាយថា ពួកគាត់បានធ្វើការទាមទារលក្ខខណ្ឌការងារចំនួន១២ចំណុចពីថៅកែរោងចក្រជនជាតិចិនជាច្រើនថ្ងៃកន្លងមកហើយតាមរយៈការដាក់លិខិតជួនថៅកែ ។ ប៉ុន្តែថៅកែហាក់នៅស្ងៀមមិនអើពើរកដំណោះស្រាយឲ្យឡើយគឺធ្វើព្រងើយកន្តើយមិនដឹងមិនឮសោះ ទើបនៅវេលាព្រឹកថ្ងៃកើតហេតុពួកគាត់បានធ្វើការតវ៉ា ដោយបានប្រមូលផ្ដុំគ្នានៅចំណុចមុខរោងចក្រ ទាមទារលក្ខខណ្ឌការងារដោយអហឹង្សាប៉ុណ្ណោះ ។
លុះដល់ពេលកើតហេតុស្រាប់តែមានជនមិនធ្លាប់ស្គាល់១ក្រុមប្រដាប់ដោយដំបង ចបកាប់ ប៉ែល ដុំឥដ្ឋ និងញញួរគ្រប់ដៃ បានចេញពីក្នុងរោងចក្រខាងលើ ចូលទៅធ្វើសកម្មភាពវាយទៅលើកម្មករទាំងកម្រោលតែម្ដង។
ប្រភពដដែលបានបន្តទៀតថា កម្មករបម្រើការងារនៅក្នុងរោងចក្រកាត់ដេរយីហោ«សុីធីស្ប៉ាក»CITY SPARK សរុបមានប្រមាណជាង៥០០នាក់ ហើយនៅក្នុងខណៈនោះ មិនបានបណ្ដាលឲ្យមានអ្នករងរបួសធ្ងន់ធ្ងរនោះឡើយ ដោយពួកគាត់បាននាំគ្នារត់គេចចេញពីក្រុមអន្ធពាលខាងលើរួច ។
ម្យ៉ាងស្របពេលនោះនគរបាលបានជួយអន្តរាគមន៍ទាន់ពេលទើបក្រុមជើងកាងបាននាំគ្នារត់គេចខ្លួនចូលទៅក្នុងរោងចក្រវិញបាត់អស់ ដែលពួកគាត់បានដឹងថា ក្រុមជើងកាងទាំងនោះត្រូវបានថៅកែរោងចក្រជួលពីតាមក្លឹប និងកន្លែងនានាទៅបង្ក្រាបកម្មករព្រោះខឹងនាំគ្នាបះបោរ ។
ក្រោយពេលកើតហេតុកម្មករនៅតែបន្តការតវ៉ាដដែល ហើយនៅមិនទាន់ទាន់មានដំណោះស្រាយណាមួយនៅឡើយទេ មិនតែប៉ុណ្ណោះក្រៅពីការទាមទារលក្ខខណ្ឌការងារកម្មករទាំងអស់ក៏បានទទូចសុំឲ្យកម្លាំងនគរបាលជួយស្រាវជ្រាវនិងឃាត់ខ្លួនក្រុមជើងកាងដែលថៅកែជួលឲ្យទៅវាយកម្មករនោះផងដែរ ៕
ចែករំលែកព័តមាននេះ