រាជធានីភ្នំពេញ៖បទចម្រៀងកុមារដ៏មានប្រជាប្រិយ«ស្អាតជានិច្ច» ជាទូទៅស្គាល់បទនេះ តែមិនស្គាល់អ្នកនិពន្ធទេ ។ អ្នកនិពន្ធបទនេះ គឺលោក សុខ គ្រវ៉ារ ។ លោក…
រាជធានីភ្នំពេញ៖បទចម្រៀងកុមារដ៏មានប្រជាប្រិយ«ស្អាតជានិច្ច» ជាទូទៅស្គាល់បទនេះ តែមិនស្គាល់អ្នកនិពន្ធទេ ។ អ្នកនិពន្ធបទនេះ គឺលោក សុខ គ្រវ៉ារ ។
លោក សុខ គ្រវ៉ារ នៅរស់រានមានជីវិតនៅឡើយ ។ បច្ចុប្បន្នលោកបើកសាលា«តន្ត្រីសុខ គ្រវារ»បណ្តុះបណ្តាលផ្នែកតន្ត្រី ។ កន្លងមកលោកបណ្តុះបណ្តាលតន្ត្រីកររលកក្រោយបានជាច្រើននាក់ ក្នុងនោះក៏មានអ្នកល្បីឈ្មោះច្រើនដែរ ។
លោក សុខ គ្រវ៉ារ បើកសាលាបង្រៀនតន្ត្រីនៅក្បែរវិទ្យាល័យវត្តភ្នំ ជាផ្ទះសាមញ្ញមិនសូវតុបតែងអ្វីច្រើនទេ ប៉ុន្តែមានអ្នកចម្រៀងនិងតន្ត្រីករចេញពីទីនេះច្រើន ក្នុងនោះមានទាំងលោកសាពូន មីដាដា ផង ។
លោក សុខ គ្រវារ ចូលដល់វ័យ៦៨ឆ្នាំ រាងកាយចុះខ្សោយបន្តិចទៅតាមវ័យ តែឆន្ទៈវិញនៅតែរឹងមាំក្នុងការបំពេញកិច្ចជាគ្រូបង្រៀនភ្លេងដល់សិស្ស ។ លោកនៅតែព្យាយាមនិពន្ឋចម្រៀងបែបអប់រំសម្រាប់កុមារបន្តទៀត ។
នាពេល ថ្មីៗកន្លងមកលោកសុខ គ្រវ៉ារ ឲ្យដឹងថាគាត់បានចូលនិវត្តន៍ឆ្នាំ២០១១ ។ លុះ៤ឆ្នាំចុងក្រោយគាត់បានធ្វើជាទីប្រឹក្សានៃក្រសួងព័ត៌មានទទួលបន្ទុកខាងនិពន្ឋបទភ្លេងទំនុកច្រៀងសម្រាប់អប់រំកុមារក្នុងពេលធ្វើមហោស្រពតន្ត្រី និងចម្រៀងកុមារប្រចាំឆ្នាំ ក្រោមការរៀចំដោយក្រសួងព័ត៌មាន ។ លោកពេញចិត្តចំពោះការតែងនិពន្ឋទំនុកច្រៀងជូនដល់កុមារសម័យនេះដើម្បីឲ្យ ក្មេងៗដើរលើផ្លូវត្រូវ ។
គាត់មិនបង្ហាត់ចម្រៀងសម័យទំនើបទេព្រោះស្រឡាញ់ និងចូលចិត្តចម្រៀងបែបមរតកដើម ពិសេសបង្ហាត់តែចម្រៀងអ្នកស្រី រស់ សេរីសុទ្ឋា លោក សុីន សុីសាមុត និងអ្នកស្រី ប៉ែន រ៉ន ។ គាត់ជាអតីតអ្នកវាយស្គរក្នុងក្រុមចម្រៀងលោកសុីន សុីសាមុត នៅអំឡុងទសវត្ស៦០ ។
អ្នកចង់រៀនភ្លេងច្រៀងបទមរតកដើមអាចហាត់ជាមួយលោកគ្រូ សុខ គ្រវ៉ារ ចាប់ពីម៉ោង៥កន្លះដល់៦កន្លះយប់រៀងរាល់ថ្ងៃ ។ តែបើចង់រៀនបទសម័យទំនើបរៀនជាមួយកូនប្រុសរបស់លោក ឈ្មោះបញ្ញោរ និងលោកបញ្ញា ។
លោកសុខ គ្រវ៉ារ ធ្វើជាតន្ត្រីករតាំងពីឆ្នាំ១៩៦៦ក្នុងក្រុមតន្ត្រីព្យុហយាត្រាដោយរៀននៅវិទ្យាល័យឥន្ទ្រទេវី ហើយក្រុមភ្លេងនោះជាក្រុមភ្លេងធំសម្រាប់ដង្ហែព្រះមហាក្សត្រ ។ លុះចុងឆ្នាំ១៩៦៧ដើមឆ្នាំ១៩៦៨លោកក្រវ៉ារបានថតបទចម្រៀងមួយចំនួនជាមួយលោកសុីន សុីសាមុត ដោយលោកជាអ្នកលេងភ្លេងដូចជាបទ«ក្រពើក្នុងទឹក» «ស្រីតូចទ្រមែ» ភាគច្រើនជាបទប្រជាប្រិយស្នាដៃនិពន្ឋរបស់លោក ម៉ៅ វីណា ។
ក្រោយមកលោកសុខ គ្រវ៉ារ បាននិពន្ឋចម្រៀង២បទឲ្យលោក សុីន សុីសាមុត ច្រៀងជាមួយអ្នកស្រីប៉ែន រ៉ន គឺបទ«បើនាងនៅទំនេរ»ចង្វាក់ហ្សែក និងបទ«កុំជោះអូនខ្លាំងពេក»ចង្វាក់សារ៉ាវ៉ាន់ ។ ទាំងបទ២នេះថតរួចរាល់នៅស្ទូឌីយូវណ្ណ ច័ន្ទ តែស្រុកទេសកើតសង្គ្រាមក៏ខកខានមិនបានចេញផ្សាយ ។ «ខ្ញុំនៅតែចាំចង្វាក់ ហើយចាំមើលថាអាចមានអ្នកជំនាន់ក្រោយស្រាវជ្រាវឃើញ ព្រោះមានបទពីដើម ប្លែកៗចេញមកច្រើន ។ ខ្ញុំក៏ចង់ថតឡើងវិញបទទាំង២នេះ ។ រឿងដែលសំខាន់ខ្ញុំបានចងក្រងចម្រៀងចាស់របស់លោក សុីន សុីសាមុត ទុកបានប្រមាណ៧០០បទដើម្បីឲ្យរលកក្រោយស្គាល់មរតកដើម ។ លើសពីនេះបានចងក្រងជាសៀវភៅបាន៤ភាគដើម្បីឲ្យសិល្បករយើងយកទៅសរសេរប្រើប្រាស់ឲ្យត្រឹមត្រូវថតចេញពីសុីឌីរក្សាភាពដើមទោះបីមិនបានត្រឹមក៏អាចប្រើការបានឲ្យដឹងថាបទនេះរបស់លោកសាមុត បទនោះបទលោកហាស់ សាឡន ឬលោកវ៉ោយ ហូរ »។
លោកសុខ គ្រវ៉ារ រំឭកថា«ចំពោះបទ«ស្អាតជានិច្ច»បានថតនៅឆ្នាំ១៩៨២ក្នុងវិទ្យុជាតិ ពេលនោះនិពន្ឋបានច្រើន តែថតបានតែ៥បទប៉ុណ្ណោះដោយសាលាបឋមសិក្សាកុលាប ដោយអ្នកប្រគំក្រុមតន្ត្រីវិទ្យុជាតិ ។ បទកុមារដែលនិពន្ឋជំនាន់នោះមានបទ«ពលកម្មកុមារ» «កុមារត្រូវដឹងគុណរណសិរ្សសាមគ្គី»ជាដើម »។
លោកសុខ គ្រវ៉ារ តាំងជំហរបន្តជីវិតជាមួយសិល្បៈតន្ត្រីរហូតដង្ហើមចុងក្រោយ ។ លោកក៏រីករាយដែលបានបណ្តុះបណ្តាលកូនប្រុសស្រីឲ្យមានជំនាញតន្ត្រី និងក្លាយជាគ្រូភ្លេងដូចរូបលោកដែរ ៕
ចែករំលែកព័តមាននេះ