ខេត្តបន្ទាយមានជ័យ ៖ ពេលនេះបងប្អូនលែងមានការព្រួយបារម្ភទៀតហើយរឿងការបន្លំភ្នែកជញ្ជីងពីសំណាក់អ្នកលក់ខិលខូចមួយចំនួន ជញ្ជីងយុត្តិធម៌ចំនួន២ត្រូវបានដាក់នៅផ្សារចំនួន២ ក្នុងក្រុងសិរីសោភ័ណដែលរួមមាន ផ្សារចំការគរ (ផ្សារថ្មី) និងផ្សារសិរីសោភ័ណ។ ដើម្បីជួយរកយុត្តិធម៌ចំពោះបងប្អូនដែលមានការសង្ស័យថា របស់របរដែលបានទិញពីផ្សារមិនគ្រប់ចំនួនគីឡូ…
ខេត្តបន្ទាយមានជ័យ ៖ ពេលនេះបងប្អូនលែងមានការព្រួយបារម្ភទៀតហើយរឿងការបន្លំភ្នែកជញ្ជីងពីសំណាក់អ្នកលក់ខិលខូចមួយចំនួន ជញ្ជីងយុត្តិធម៌ចំនួន២ត្រូវបានដាក់នៅផ្សារចំនួន២ ក្នុងក្រុងសិរីសោភ័ណដែលរួមមាន ផ្សារចំការគរ (ផ្សារថ្មី) និងផ្សារសិរីសោភ័ណ។
ដើម្បីជួយរកយុត្តិធម៌ចំពោះបងប្អូនដែលមានការសង្ស័យថា របស់របរដែលបានទិញពីផ្សារមិនគ្រប់ចំនួនគីឡូ គឺបងប្អូនអាចយកទៅថ្លឹងជញ្ជីងយុត្តិធម៌បាន ដើម្បីបង្ហាញឲ្យកាន់តែច្បាស់ថា តើគ្រប់គីឡូហើយឬនៅ ដើម្បីធ្វើការតវ៉ា ។ ដែលទាំងអស់នេះ គឺជាអ្វីដែលបងប្អូនប្រជាពលរដ្ឋចង់បាននូវភាពយុត្តិធម៌រវាងអ្នកលក់ និងអ្នកទិញក៏ដូចជា បង្ហាញពីភាពស្មោះត្រង់ ចំពោះគ្នាទៅវិញទៅមក ។
តាមការបញ្ជាក់ឲ្យដឹងពីលោក នាង ហាវ អភិបាលរងក្រុងសិរីសោភ័ណបានប្រាប់ឲ្យដឹងថា ដើម្បីភាពស្មោះត្រង់ចំពោះអ្នកលក់ និងអ្នកទិញប្រកបដោយភាពសុក្រិត និងយុត្តិធម៌ក្រសួងឧស្សាហកម្ម និងសិប្បកម្មតាមរយៈមន្ទីរឧស្សាហកម្ម និងសិប្បកម្មខេត្តបន្ទាយមានជ័យ ដោយមានការចូលរួមពីរដ្ឋបាលក្រុងបានយកជញ្ជីងទៅ២ខាងលើទៅដាក់នៅផ្សារគោលដៅចំនួន២ មានផ្សារចំការគ និងផ្សារសិរីសោភ័ណ ដើម្បីឲ្យបងប្អូនប្រជាពលរដ្ឋដែលបានទិញបន្លែ ត្រី សាច់ បើមានការសង្ស័យថា មិនគ្រប់គីឡូ គឺបងប្អូនអាចយកទៅថ្លឹងនៅជញ្ជីងយុត្តិធម៌ ដើម្បីរកភាពមិនប្រក្រតី បើសិនឃើញថា មិនគ្រប់ចំនួនគីឡូបងប្អូនអាចទៅធ្វើការតវ៉ាជាមួយនឹងអ្នកលក់វិញ ។
លោកអភិបាលរងក្រុងបានបញ្ជាក់ថា ការថ្លឹងនៅជញ្ជីងយុត្តិធម៌ គឺមិនមានការគិតថវិកានោះទេ ហើយក៏មានកងកម្លាំងនគរបាលក៏ដូចជា ប្រជាការពារនៅទីនោះ ដើម្បីពិនិត្យជាប្រចាំផងដែរ ។ ទន្ទឹមជាមួយគ្នានោះដែរប្រជាពលរដ្ឋក៏បានសម្តែងនូវការសាទរជាខ្លាំងចំពោះវត្តមានជញ្ជីងយុត្តិធម៌មាននៅផ្សារក្នុងក្រុងសិរីសោភ័ណដោយពួកគាត់ខ្លះបានលើកឡើងថា អាជីករខិលខូចមួយចំនួនតែងមានការបន្លំភ្នែកជញ្ជីង ដើម្បីទទួលបានការចំណេញច្រើន ។ តែពេលមានជញ្ជីងនេះពួកគាត់លែងមានក្តីព្រួយបារម្ភរឿងការបន្លំភ្នែកជញ្ជីងទៀតហើយ ។
សូមបញ្ជាក់ថា ការដាក់ជញ្ជីងយុត្តិធ៌មនេះនឹងត្រូវធ្វើជាជំហានៗដោយក្នុងជញ្ជីងយុត្តិធម៌ខាងលើក៏នឹងមានវត្តមាននៅក្នុងផ្សារទូទាំងក្រុងសិរីសោភ័ណក៏ដូចជា នៅទូទាំងខេត្តផងដែរ ៕
ចែករំលែកព័តមាននេះ