ខេត្តមណ្ឌលគិរី ៖ មន្ត្រីជំនាញបានរកឃើញទំនិញខូចគុណភាព និងហួសកាលបរិច្ឆេទប្រើប្រាស់ជិត២០០គីឡូក្រាម យកទៅដុតកម្ទេចចោល ក្នុងប្រតិបត្តិការនេះដឹកនាំដោយលោក ចាន់ វាសនា ប្រធានសាខាកាំកុងត្រួលខេត្ត សហការជាមួយមន្ទីរពាណិជ្ជកម្មខេត្ត កម្លាំងនគរបាលសេដ្ឋកិច្ចខេត្ត និងអាជ្ញាធរស្រុក បានចុះត្រួតពិនិត្យទំនិញ និងចំណីអាហារនៅតាមផ្ទះអាជីវករលក់ដូរនៅឃុំប៊ូស្រា ស្រុកពេជ្រាដា ខេត្តមណ្ឌល
គិរី កាលពីព្រឹកថ្ងៃទី១៧ ខែធ្នូ ឆ្នាំ២០១៨។
លោក ចាន់ វាសនា ប្រធានសាខាកាំកុងត្រូលខេត្ដមណ្ឌលគិរី បានដឹងថា ការចុះត្រួតពិនិត្យទំនិញនេះ ក្នុងគោលបំណងការពារផលប្រយោជន៏ និងសុខភាពអ្នកប្រើប្រាស់ ផ្ដោតទៅលើកទំនិញវេចខ្ចប់ស្រាប់ ជាពិសេសទំនិញហួលការបរិច្ឆទប្រើប្រាស់ ទំនិញគ្មានសុវត្ថិភាព ឬ លាយសារធាតុគីមីហាមឃាត់។
លោកបន្ថែមថា ការចុះត្រួតពិនិត្យទំនិញនេះបានធ្វើតេស្តលើចំណីអាហារ និងបន្លែគ្រប់ប្រភេទ ដើម្បីស្វែងរកសាធាតុគីមីហាមឃាត់ (ប៉ូរ៉ាក់) ជាលទ្ធផលពុំមានសារធាតុគីមីហាមឃាត់នោះទេ និងបានធ្វើតេស្តសារធាតុអំបិលអ៊ីយ៉ូត ហ្គូឆាយតិច និងសញ្ញាអង្គរ ជាលទ្ធផលមានអ៊ីយ៉ូតត្រឹមត្រូវ ។
ក្រៅពីនោះសមត្ថកិច្ចចម្រុះបានចុះត្រួតពិនិត្យទំនិញវេចខ្ចប់ស្រាប់នៅតាមផ្ទះលក់ទំនិញនានា ដើម្បីស្វែងរកទំនិញខូចគុណភាព និងហួសកាលបរិច្ឆេទប្រើប្រាស់ ជាលទ្ធលមន្ត្រីជំនាញបានរកឃើញ ភេសជ្ជៈម្រុះ ហួសកាលបរិច្ឆេទប្រើប្រាស់ចំនូន១៩៣គីឡូក្រាម ដើម្បីធ្វើការដុតកម្ទេចចោលនៅការិយាល័យពាណិជ្ជកម្មស្រុកពេជ្រាដា។
ទន្ទឹមនឹងនោះ លោក ចាន់ វាសនា បានធ្វើការណែនាំដល់អាជីវករ ពាណិជ្ជករឲ្យមានការយល់ដឹង និងមានការប្រុងប្រយ័ត្នចំពោះទំនិញទាំងឡាយណាដែលមិនមានគុណភាព និងហួសកាលបរិច្ឆេទប្រើប្រាស់ ដូចជា កំប៉ុងក្រពិត ប៉ោង ច្រែះស៊ី ទំនិញដែលមានសារធាតុគីមីហាមឃាត់ និងត្រូវរៀបចំទំនិញលក់ដូរទុកដាក់ឲ្យមានសណ្តាប់ធ្នាប់ល្អ និងបានបិទរូបភាព ដែលរៀបចំដោយអគ្គនាយកដ្ឋានកាំងកុងត្រូល ជូនដល់អ្នកលក់ និងអ្នកប្រើប្រាស់ អោយបានយល់ដឹងពីរូបភាពជាបឋមនូវទំនិញណាដែលគួរប្រើ និងទំនិញណាមិនគួរប្រើប្រាស់ ៕
ចែករំលែកព័តមាននេះ