រាជធានីភ្នំពេញ ៖ ប្រទេសកម្ពុជាបាននាំអង្ករច្រើនក្នុងលំដាប់ទី២ទៅកាន់ប្រទេសបារាំងស្មើប្រមាណជិត៨ម៉ឺនតោន ។ នេះបើតាមសម្តេចប្រធានរដ្ឋសភាកម្ពុជា ។
ក្នុងជំនួបពិភាក្សាជាមួយលោកស៊ីលវ៉ាំង វ៉ាសឺម៉ង់ Sylvain WASSERMAN អនុប្រធានរដ្ឋសភានៃសាធារណរដ្ឋបារាំង ខណៈដឹកនាំគណៈប្រតិភូមកបំពេញទស្សនកិច្ចនៅកម្ពុជា នៅព្រឹកថ្ងៃទី១៧ ខែធ្នូ ឆ្នាំ២០១៨ នៅវិមានរដ្ឋសភាសម្តេច ហេង សំរិន ប្រធានរដ្ឋសភាបានកត់សម្គាល់ឃើញថា ទំនាក់ទំនងការទូតកម្ពុជា-បារាំង បានកើតឡើងតាំងពីឆ្នាំ១៩៥២ ។ សម្តេចបន្តថា បារាំងជាប្រទេសដែលផ្តល់ជំនួយសំខាន់មួយដល់កម្ពុជាពិសេសបារាំងបានដើរតួនាទីយ៉ាងសកម្មនៅក្នុងការស្វែងរកសន្តិភាពឲ្យកម្ពុជារហូតបង្កើតបានកិច្ចព្រមព្រៀងសន្តិភាពទីក្រុងប៉ារីស ឆ្នាំ១៩៩១ ។
សម្តេចបានគូសបញ្ជាក់ថា «រហូតមកដល់ពេលនេះកម្ពុជា-បារាំងបានផ្លាស់ប្តូរដំណើរទស្សនកិច្ចពីគ្នាទៅវិញទៅមកទាំងក្នុងក្របខណ្ឌនីតិប្រតិបត្តិ និងនីតិប្បញ្ញតិ ។ ក្នុងជំនួបនោះដែរលោកស៊ីលវ៉ាំង វ៉ាសឺម៉ង់ បានគូសបញ្ជាក់ថា ដំណើរទស្សនកិច្ចរបស់លោកនៅក្នុងឱកាសនេះ ក្នុងគោលបំណងពង្រឹងពង្រីកវិស័យការទូតសភាជាមួយកម្ពុជា ។ លោកក៏បានវាយតម្លៃខ្ពស់ចំពោះកិច្ចសហប្រតិបត្តិការ និងចំណងមិត្តភាពរវាងប្រទេសកម្ពុជា – បារាំង ។ ជាចំណងមិត្តភាពជិតស្និទ្ធជឿជាក់ និងបើកចំហ ។
តាមរយៈចំណងមិត្តភាពដ៏ល្អនេះបានជំរុញឲ្យមានគម្រោង និងជំនួយជាច្រើនរបស់បារាំងមកកាន់កម្ពុជា ។ លោកអនុប្រធានរដ្ឋសភាបារាំងបានវាយតម្លៃខ្ពស់ពីកិច្ចសហប្រតិបត្តិការផ្នែកវប្បធម៌នៃប្រទេសទាំងពីរ ។ នៅកម្ពុជាមានពលរដ្ឋ និងមន្ត្រីរាជការជាច្រើននៅតែប្រើប្រាស់ភាសាបារាំង ។ ជាមួយគ្នានោះដែរសម្តេច ហេង សំរិន បានលើកឡើងផងដែរពីការគាំទ្រគ្នាទៅវិញទៅមករវាងសភាប្រទេសទាំងពីរទាំងក្នុងក្របខណ្ឌទ្វេភាគី និងពហុភាគី ។
ចំណែកទំនាក់ទំនងផ្នែកពាណិជ្ជកម្មរវាងប្រទេសទាំងពីរវិញសម្តេចបានលើកឡើងថា មានការរីកចម្រើនជាលំដាប់ពោល គឺទំហំទឹកប្រាក់វិនិយោគបានកើនដល់ជាង១ពាន់លានដុល្លារ ។ កម្ពុជាបាននាំចេញអង្ករច្រើនក្នុងលំដាប់ទី២ ទៅកាន់ប្រទេសបារាំង គឺប្រមាណជិត៨ម៉ឺនតោន ។ សម្តេចប្រធានរដ្ឋសភាបានផ្តាំផ្ញើដល់អនុប្រធានរដ្ឋសភាប្រទេសបារាំងជួយគាំទ្រ និងជំរុញអ្នកវិនិយោគអ្នកទេសចរបារាំងមកវិនិយោគ និងទស្សនាកម្ពុជាឲ្យកាន់តែច្រើន បន្ថែមទៀត ។
តាមរយៈប្រធានគណៈប្រតិភូសម្តេចបានគោរពអញ្ជើញលោកប្រធានរដ្ឋសភាបារាំងមកបំពេញទស្សនកិច្ចនៅកម្ពុជាតាមពេលវេលាសមស្របណាមួយនាពេលខាងមុខនេះ ៕
ចែករំលែកព័តមាននេះ