ប្រទេសស៊ីរី ៖ ក្នុងសន្និសីទមួយនៅប្រទេសកាតា រដ្ឋមន្រី្តការបរទេសតួកគីលោកMEVLUT CAVUSOGLU ថ្លែងនាថ្ងៃទី១៦ ធ្នូ ថា ទាំងតួកគីទាំងពួកមហាអំណាចពិភពលោក នឹងគ្រោងធ្វើការជាមួយប្រធានាធិបតីស៊ីរីលោក…
ប្រទេសស៊ីរី ៖ ក្នុងសន្និសីទមួយនៅប្រទេសកាតា រដ្ឋមន្រី្តការបរទេសតួកគីលោកMEVLUT CAVUSOGLU ថ្លែងនាថ្ងៃទី១៦ ធ្នូ ថា ទាំងតួកគីទាំងពួកមហាអំណាចពិភពលោក នឹងគ្រោងធ្វើការជាមួយប្រធានាធិបតីស៊ីរីលោក បាចាអាល់ អាសាដ ប្រសិនបើលោកត្រូវជ្រើសតាំងបែបប្រជាធិបតេយ្យ ។
តួកគីជាអ្នកជួយទ្រទ្រង់ពួកប្រឆាំងនឹងលោក អាសាដ ក្នុងសង្គ្រាមស៊ីវិលស៊ីរីដែលផ្ទុះកាល
ពីឆ្នាំ២០១១ ហើយឥឡូវនៅបន្តជួយពួកឧទ្ទាមដែលត្រួតត្រាផ្នែកមួយនាភាគពាយ័ព្យស៊ីរី ។ កាលពីមួយឆ្នាំមុនប្រធានាធិបតីតួកគី លោក រីសុីបតៃយីប អ័រដូហ្គាន ធ្លាប់ចាត់ទុក លោក បាចាអាល់ អាសាដ ថាជាភេរវករ និងអះអាងថា លោកមិនអាចបន្តការខិតខំប្រឹងប្រែងសន្តិភាពនៅស៊ីរីជាមួយលោកអាសាដបានឡើយ ។
ចាប់តាំងពីពេលនោះមក លោកអាសាដជាមួយការជួយទ្រទ្រង់របស់រុស្សុី និងអ៊ីរ៉ង់ បានវាយកម្ចាត់ ពួកឧទ្ទាមចេញពីភាគខាងត្បូងប្រទេស ព្រមទាំងតំបន់ក្រុងដាម៉ាស់ ដោយពង្រឹងអំណាចរបស់លោក ទោះបីផ្នែកមួយចំនួនរបស់ប្រទេស ស្ថិតនៅក្រៅការត្រួតត្រារបស់ក្រុងដាម៉ាស់ក្ដី ។
ប្រមុខការទូតតួកគីថ្លែងទៀតថា ពេលគេសួរខ្ញុំថា តើតួកគីនឹងធ្វើការជាមួយលោកអាសាដដែរទេ ? លោកឆ្លើយថា ស៊ីរីដំបូងត្រូវរៀបចំការបោះឆ្នោតមួយ ។ ប្រសិនបើលោកអាសាដជាប់ឆ្នោត រួចការបោះឆ្នោតនោះជាការបោះឆ្នោតបែបប្រជាធិបតេយ្យនិងគួរឲ្យជឿជាក់ នោះពិភពលោកទាំងមូលត្រូវគ្រោងធ្វើការជាមួយលោក ។
ចំណែកប្រធានាធិបតីស៊ូដង់វិញកាលពីថ្ងៃទី១៦ ធ្នូ បានមកបំពេញទស្សនកិច្ចរយៈពេលខ្លីមួយនៅក្រុងដាមា់ស់ ដោយនៅទីនោះលោកជួបជាមួយសមភាគីស៊ីរីលោក បាចាអាល់ អាសាដ ។ នោះជាទស្សនកិច្ចដំបូងរបស់លោកអូម៉ាអែលបេសៀរនៅសិុរី ចាប់តាំងពីផ្ទុះការបះបោរតាំងពីឆ្នាំ២០១១មក។
យោងតាមវិមានប្រធានាធិបតីថា លោក អាសាដ បានអបអរសាទរចំពោះទស្សនកិច្ចនេះដែលលោកថា នឹងជួយជំរុញដល់ការតភ្ជាប់ឡើងវិញនៃទំនាក់ទំនងរវាងប្រទេសទាំង២ ដូចកាលមុនសង្គ្រាម។ លោកអាសាដអះអាងថា ស៊ីរីជាប្រទេសដែលកំពុងមានការប្រឈមមុខជាមួយអ៊ីស្រាអែលនោះ ពុំអាចខ្សោយឡើយ ។ លោកសង្ឃឹមម្យ៉ាងទៀតថា ស៊ីរីបានវិលត្រឡប់ក្នុងពេលឆាប់ៗចូលឆាកអន្តរជាតិ ប្រាចាករាល់អន្តរាគមន៍របស់បរទេសចូលកិច្ចការផៃ្ទក្នុងរបស់ខ្លួន។
ក្នុងកិច្ចពិភាក្សាគ្នាលោកអាសាដនិងលោក បេសៀរ ស្នើឲ្យមានការខិតចូលជិតគ្នាថ្មី ក្នុងទំនាក់ទំនងអន្តរអារ៉ាប់់ដោយផ្ដោតលើការគោរពអធិបតេយ្យភាពរបស់បណ្ដាប្រទេស ហើយគ្មានការជ្រៀតជ្រែកចូលកិច្ចការផ្ទៃក្នុងគ្នា ៕
ចែករំលែកព័តមាននេះ