រាជធានីភ្នំពេញ៖ មួយរយៈចុងក្រោយនេះនៅលើហ្វេសប៊ុករបស់តារាចម្រៀងកញ្ញាសុន ស្រីពេជ្រ បង្ហាញអារម្មណ៍តប់ប្រមល់ ជា រឿយៗដោយសារតែរងសម្ពាធគ្រួសារ ពិសេសជំងឺរបស់ឪពុកនាងនៅតែមិនស្រាក ។
សុន ស្រីពេជ្រ ទើបចេញបទថ្មីមានចំណងជើងថា«ចម្រៀងលួងចិត្ត»នៅផលិតកម្មថោន។ បទនេះបង្កប់អារម្មណ៍មនោសញ្ចេតនានិយាយពីភាពតស៊ូក្នុងឆាកជីវិត បើទោះជាមានបញ្ហាអ្វីត្រូវរ៉ាប់រ៉ងក៏តម្កល់ចិត្តរឹងមាំប្រយុទ្ឋតទៅទៀត។
មូលហេតុនេះហើយទើបគេឃើញក្នុងសំណេររបស់សុន ស្រីពេជ្រ បង្ហោះលើហ្វេសប៊ុករបស់នាងកាលពីថ្ងៃទី ទី១៣ ធ្នូ ឆ្នាំ២០១៨ មានខ្លឹមសារថា «មួយបទនេះមានន័យណាស់សម្រាប់អ្នកដែលជួបរឿងខកចិត្តអស់សង្ឃឹម ហើយក៏កំពុងតែត្រូវចិត្តខ្លួនឯងក្នុងស្ថានភាពបច្ចុប្បន្នដែលកំពុងតែជួបរឿងបរាជ័យធ្ងន់ តែខ្ញុំមិនបោះបង់ខ្លួនឯងឡើយ ហើយក៏មិនបណ្តោយតាមវាសនាដែលកំពុងទាញខ្ញុំឲ្យបរាជ័យបន្តទៀតដែរ ត្រូវចាំ « អត់ធ្មត់ និង តស៊ូ » ស៊ូទៅមុខទៀតណាបងប្អូន និងហ្វេនទាំងអស់គ្នា »។
ច្រើនខែមកហើយដែលសមាជិកក្រុមគ្រួសាររបស់សុន ស្រីពេជ្រ បានខិតខំខ្នះខ្នែងក្នុងអាជីពសិល្បៈរបស់ខ្លួនដើម្បីប្រមូលប្រាក់ចាត់ចែងដំណោះស្រាយក្នុងគ្រួសារបន្ទាន ់។ មូលហេតុជំងឺលោកឪពុករបស់នាងជាអតីតតារាកំប្លែងលោម៉ារី សុន ហៅសង់សុីស នៅតែមិនទាន់ធូរហើយពេលនេះរូបរាងចុះស្គមខ្លាំង ។ បន្ថែមពីលើនេះប្អូនប្រុសរបស់សុន ស្រីពេជ្រ ឈឺរហូតត្រូវចំណាយច្រើន ដោយមានពេលខ្លះទៅព្យាបាលនៅក្រៅស្រុក ។
ក្នុងស្ថានភាពគ្រួសារជួបការលំបាកសុន ស្រីពេជ្រ ធ្លាប់ប្រកាសលក់ផ្ទះនៅខណ្ឌសែនសុខម្តុំចម្ការព្រីង ។ ទន្ទឹមនេះនាងខំច្រៀងភ្លេងការកាត់សក់មង្គលការ សេសសល់ពេលច្រៀងតាមកម្មវិធី ផ្សេងៗ ពេលខ្លះLive videoលក់ផលិតផលសំអាង ផ្សេងៗដើម្បីបន្ថែមប្រាក់ចំណូលជួយដល់ឳពុក និងប្អូនប្រុស ។ ក្រុមគ្រួសារសុន ស្រីពេជ្រ ជំពាក់បំណុលគេជាបន្តបន្ទាប់ ព្រោះតែជំងឺសមាជិកគ្រួសារ ។
ចំណែកនាយសង់សេត ជាបងរបស់សុន ស្រីពេជ្រ ក៏បានបង្ហោះរូបភាពមួយសន្លឹក បង្ហាញពីអ្នកមានគុណទាំងពីរ ដែលមិនបោះបង់ពេលវេលាដ៏មានតម្លៃ ថ្វីដ្បិតតែពួកគាត់មានវ័យចាស់ជរា ហើយថែមទាំងមានជំងឺ ប្រចាំកាយទៀតផង ។ នាយ សង់សេត បានសរសេរបង្ហោះភ្ជាប់រូបភាព២សន្លឹក នៃសកម្មភាពកាប់ដំបូងរបស់តាសង់ស៊ីស ជាឳពុក និងម្តាយរបស់ខ្លួនថា «ឪពុកខ្ញុំទោះជាគាត់បាត់បង់ក្នុងការសម្តែងសិល្បៈ ក៏គាត់មិនបោះបង់ក្នុងការងារចិញ្ចឹមជីវិតដែរ ពុកម៉ែប្រាប់កូនថា លំបាកឯណាដូចសម័យ៣ឆ្នាំ ៨ខែ ២០ថ្ងៃ រកតែបបរស៊ីមិនបាន »។
តារាកំប្លែងជើងចាស់លោកតាសង់ស៊ីស បច្ចុប្បន្នបាត់បង់សមត្ថភាពសិល្បៈទាំងស្រុង បន្ទាប់ពីគាត់ធ្លាក់ខ្លួនឈឺធ្ងន់កាលពីអំឡុងពេលប៉ុន្មានឆ្នាំកន្លងមក ។ សព្វថ្ងៃតារាកំប្លែងដែលតែងតែបង្កភាពសប្បាយរីករាយ សំណើចដល់ទស្សនិកជន រូបនេះនៅមានជំងឺប្រចាំកាយត្រូវការព្យាបាលជារៀងរាលខែ ៕
ចែករំលែកព័តមាននេះ