ញាំជាអាហារខ្មែរមួយប្រភេទដែលមានរសជាតិជូ-អែម-ប្រៃ បូករួមនឹងក្លិនជីគ្រប់មុខ ពេលណានឹកឃើញក៏ស្រៀវទឹកមាត់ច្រោក។ ទស្សនាវដ្តីមហាគ្រួសារលេខនេះសូមអញ្ជើញប្រិយមិត្តចូលរួមរីករាយជាមួយរសជាតិញាំសាច់ជ្រូកអំពិលទុំតាមវិធីធ្វើថ្មីមួយទៀតដូចតទៅ៖
ញាំជាអាហារខ្មែរមួយប្រភេទដែលមានរសជាតិជូ-អែម-ប្រៃ បូករួមនឹងក្លិនជីគ្រប់មុខ ពេលណានឹកឃើញក៏ស្រៀវទឹកមាត់ច្រោក។ ទស្សនាវដ្តីមហាគ្រួសារលេខនេះសូមអញ្ជើញប្រិយមិត្តចូលរួមរីករាយជាមួយរសជាតិញាំសាច់ជ្រូកអំពិលទុំតាមវិធីធ្វើថ្មីមួយទៀតដូចតទៅ៖
បរិមាណអ្នកទទួលទាន២នាក់ រយៈពេលធ្វើ៤០នាទី រយៈពេលរៀបចំគ្រឿងផ្សំ១៥នាទី ។
គ្រឿងផ្សំ ៖
-សាច់ជ្រូកស្មាមុខ១១០ក្រាម,ត្រួយអំពិល ១១០ក្រាម, ខ្ទឹមក្រហម១០ក្រាម, ស្ករត្នោត១៥ក្រាម, ទឹកត្រីកន្លះស្លាបព្រាបាយ, ជីគ្រប់មុខ២០ក្រាម, ម្ទេសដៃនាង១០ក្រាម, អំពិលខ្ចី២ក្រាម, អំពិលទុំ តាមចំណូលចិត្ត, ទឹកប្រហុក៥ក្រាម ។
វិធីធ្វើ ៖
យកសាច់ជ្រូកលាងឱ្យស្អាត ហើយយកខ្សែចងឱ្យជាប់យកទៅស្ងោរជាមួយទឹកធម្មតាបាន ។ បន្ទាប់ពីស្ងោរផុយត្រូវយកទៅត្រាំក្នុងទឹកកកប្រហែល៥នាទីដើម្បីឱ្យស្រួយទើបយកទៅហាន់ជាបន្ទះស្តើងល្មមរៀបក្នុងចានទុកមួយអន្លើ ។ បន្ទាប់មកត្រូវយកអំពិលខ្ចីហាន់ស្តើងៗយកទៅច្របាច់ជាមួយអំបិលដើម្បីកុំឱ្យជូរពេក រួចយកអំពិលខ្ចីនេះទៅលាយជាមួយសាច់ជ្រូកដែលហាន់សេសសល់ ហើយត្រូវដាក់ស្លឹកអំពិល និងជីគ្រប់មុខលាយចូលគ្នា ។
មួយឡែកទៀតត្រូវដាក់ទឹកជ្រលក់អំពិលទុំមកច្របាច់បញ្ចូលជាមួយបន្លែដែលបានលាយរួចខាងលើ ហើយដួសដាក់ពីលើបន្ទះសាច់ជ្រូកដែលបានរៀបទុកក្នុងចាននោះគឺជាការស្រេច។ ប៉ុណ្ណេះលោកអ្នកទទួលបានញាំមួយចានដែលគួរឱ្យចង់ទទួលទាន។ ចំណែកទឹកជ្រលក់ទៀតសោតគួរមានវិធីធ្វើដើម្បីឱ្យមានរសជាតិសមស្របទើបបន្ថែមឱជារសអតិបរមា ។
វិធីធ្វើទឹកជ្រលក់ ៖
យកអំពិលទុំច្របាច់យកតែទឹកដាក់ទុកក្នុងកូនចានដោយឡែក ។ យកស្លឹកខ្ទឹម និងខ្ទឹមក្រហមមកចិញ្ច្រាំឱ្យល្អិតដាក់លាយជាមួយទឹកអំពិលទុំ បន្ទាប់មកត្រូវដាក់ទឹកប្រហុក ដាក់ទឹកត្រី និងស្ករត្នោតលាយចូលគ្នាជាការស្រេច ។
មុខម្ហូបនេះអាចទទួលទានជាមួយបាយស ឬក៏ធ្វើជាគ្រឿងក្លែមក៏បាន ៕
ចែករំលែកព័តមាននេះ