រាជធានីភ្នំពេញ៖ ជាអ្នកចម្រៀងដែលជាប់ជ័យលាភីនៅសម័យសាធារណរដ្ឋខ្មែរ ហើយមានវាសនាខ្ពស់បានរួចរស់ជីវិតពីរណ្តៅមរណៈនៃរបបប្រល័យពូជសាសន៍ លោកនូ ស៊ឹប បានចាកចេញពីក្រុងកំពង់ធំមករៀនបន្តវិជ្ជាពេទ្យក្នុងគោលបំណងចាប់យកកម្រិតវេជ្ជបណ្ឌិត ។ ប៉ុន្តែលុះដល់ភ្នំពេញ ដោយសារតែមាននិស្ស័យផ្នែកចម្រៀងសម័យ និងព្រមទៅដោយការដែលមានទេពកោសល្យពីកំណើតផងនោះ…
រាជធានីភ្នំពេញ៖ ជាអ្នកចម្រៀងដែលជាប់ជ័យលាភីនៅសម័យសាធារណរដ្ឋខ្មែរ ហើយមានវាសនាខ្ពស់បានរួចរស់ជីវិតពីរណ្តៅមរណៈនៃរបបប្រល័យពូជសាសន៍ លោកនូ ស៊ឹប បានចាកចេញពីក្រុងកំពង់ធំមករៀនបន្តវិជ្ជាពេទ្យក្នុងគោលបំណងចាប់យកកម្រិតវេជ្ជបណ្ឌិត ។
ប៉ុន្តែលុះដល់ភ្នំពេញ ដោយសារតែមាននិស្ស័យផ្នែកចម្រៀងសម័យ និងព្រមទៅដោយការដែលមានទេពកោសល្យពីកំណើតផងនោះ លោកបានរំកិលខ្លួនចេញពីមហិច្ឆតានៃគំនិតខាងដើម ដោយស្រវាតោងមែកធាងនៃរុក្ខាសិល្បៈចម្រៀង ដើម្បីបម្រើអារម្មណ៍នៃមហាជនគ្រប់ស្រទាប់ វណ្ណៈទៅវិញ ។ វាក៏អាចថាវាសនារុញច្រានឱ្យរូបលោកអណ្តែត តែលតោលលើរលកសមុទ្រសិល្បៈក្នុងឋានៈជាសិស្បករដ៏សាមញ្ញមួយប្រាថ្នាការសាទរ និងការគាំទ្រពីមហាជន ។
ស្ថិតនៅក្នុងលំដាប់ឈ្មោះជាសិល្បករជើងចាស់មួយរូបដែលមិនសូវបានទទួលភោគផលពីសួនចម្ការនៃសិល្បៈប៉ុន្មាននោះ ម្ល៉ោះហើយបានជាជីវភាពរបស់លោកមិនបានធូរធារដូចគេ ប៉ុន្តែទោះជាជីវភាពនៅក្នុងលក្ខខណ្ឌឱនភាពរស់យ៉ាងសុភាពក្នុងបន្ទប់ជួលដ៏តូចក្តី ព្រមជាមួយនឹងវ័យជាង៧២ឆ្នាំដែលគ្របទៅដោយទុព្វលភាពជ្រាបសព្វសារពាង្គកាយ ដោយសារជំងឺឡើងឈាម និងថយឈាមតាមពេលវេលា តម្រូវឱ្យដូចម្តេចក្តី ក៏លោកនៅតែខំប្រឹងទប់ជំហរឈរលើឆាកសិល្បៈចម្រៀងដើម្បីអាជីពដែលមានការគាំទ្រពីម្ចាស់ហាង និងអតិថិជនជាភ្ញៀវផងដែរ ។ មានន័យថា លោកខំពង្រឹងកាយសម្បទានិងស្មារតីដើម្បីបម្រើមហាជនមិនឱ្យខ្ចោះអស់ពីពោះ ពីចិត្ត ពីថ្លើម ។
នាពេលខែមុននោះ ព្រះសង្ឃមួយអង្គដែលត្រូវជាកូនធម៌បាននិមន្តទៅលេងលោកនូ ស៊ិប នៅបន្ទប់ជួលស្នាក់នៅ ។ ពេលនោះហើយដោយព្រះអង្គឃើញលោកមិនមានសុវត្ថិភាពក្នុងផ្លូវសុខភាព ព្រះអង្គក៏បានធ្វើពិធីចម្រើនជន្មាយុដល់រូបលោក ។ ដោយព្រះអង្គឱ្យលោកសម្រាន្តដណ្តប់ភួយយ៉ាងស្ងៀមស្ងាត់ ក្រោមសំឡេងសូត្រធម៌ដើម្បីលើករាសី និងរំដោះគ្រោះបាបកម្មទាំងពួង ហើយពេលនោះមានអ្នកថតបង្ហោះហ្វេសប៊ុកដែលលោកមិនទាំងបានដឹងខ្លួនផង ។
ចំពោះសកម្មភាពរៀបបញ្ហានេះហើយដែលធ្វើឱ្យមហាជនជាច្រើនយល់ច្រឡំថាគាត់ធ្លាក់ខ្លួនឈឺធ្ងន់ បង្កបានជាបច្ច័យហេតុមានអ្នកមកសួរសុខទុក្ខលោកដល់កន្លែង ។ បន្ទាប់ពីយល់នូវការភ័ន្តច្រឡំនេះ លោកនូ ស៊ឹប ក៏បានបកស្រាយឱ្យគេរាល់គ្នាបានដឹង ព្រមទាំងមានការបកស្រាយរបស់ពិធីករ ការិនីនៃវិទ្យាអែហ្វ អឹមខ្លះទៀតផង។ ប៉ុន្តែប្រការដែលគួរឱ្យសោកស្តាយ និងលោកអន់ស្រពន់ចិត្តបំផុតនោះ គឺអ្នកឧកញ៉ាម្នាក់ បាននិយាយប្រាប់គេឯងខ្លះថា «លោកនូ ស៊ឹប ល្បីថាឈឺ តែគេឃើញគាត់រាល់យប់ឈរច្រៀងនៅហាង «Lucky bright»ធ្វើយ៉ាងព្រងើយ »។
ក្រោយពីឮសម្តីនេះ តារាចម្រៀងជើងចាស់ លោកនូ ស៊ឹប កាលពីពេល ថ្មីៗកន្លងមកបានបំភ្លឺជម្រាបដល់មហាជនថា សព្វថ្ងៃលោកគ្មានប្រពន្ធកូនទេ មានតែទទួលបន្ទុកចិញ្ចឹមក្មួយ និងខ្លួនឯងប៉ុណ្ណោះ ។ បើលោកនៅស្ងៀមតើបានអ្វីបំពេញក្រពះ និងបានអ្វីទិញថ្នាំសម្រាប់ជួយទប់ទល់រោគា ? ទោះបីជាសុខភាពមិនអំណោយផលក៏ដោយ ក៏លោកមិនអាចផ្តេកផ្តួលរមួលក្រពើអ្វីបានឡើយ ព្រោះលោកគ្មានអ្នកថែរក្សានិងផ្គត់ផ្គង់ទេ ។ ហេតុនេះហើយលោកត្រូវតែប្រឹងឈរលើឆាកដើម្បីបម្រើមហាជនឱ្យដល់នាទីដែលឈរលែងបាន ។
លោកនូ ស៊ឹប សំណូមពរឱ្យមហាជនគ្រប់ស្រទាប់វណ្ណៈបានយល់ដល់ប្រត្យក្សភាព និងគ្មានការច្រឡំទៀតឡើយ ។ ទន្ទឹមនេះលោកបានថ្លែងអំណរគុណដ៏មហាធំធេងចំពោះអស់លោកដែលបានជួយឧបត្ថម្ភដល់រូបលោកក្នុងន័យសប្បុរសធម៌ និងយោគយល់ដែលលោកមិនអាចបំភ្លេចបាន ៕
ចែករំលែកព័តមាននេះ