រាជធានីភ្នំពេញ ៖ ខណៈកម្លាំងនគរបាលប៉ុស្តិ៍កាកាបចុះល្បាតប្រទះឃើញគួរឲ្យសង្ស័យ បានធ្វើការឃាត់ខ្លួនជនសង្ស័យប្រើប្រាស់គ្រឿងញៀនចំនួន២នាក់ និងដកហូតបានម៉ូតូចំនួន២គ្រឿង រួមទាំងថ្នាំញៀន១កញ្ចប់ផងដែរ ។
ការចាប់ខ្លួននោះបានធ្វើឡើងកាលពីវេលាម៉ោង១និង៣៥នាទីយប់រំលងអធ្រាត្រឈានចូលថ្ងៃទី១៦ ខែធ្នូ ឆ្នាំ២០១៨នេះ នៅតាមផ្លូវលេខ២០១១ ទល់មុខក្លឹបកំសាន្តរាត្រី រីលីក្ស ស្ថិតនៅក្នុងភូមិតាងួន១ សង្កាត់កាកាប១ ខណ្ឌ ពោធិ៍សែនជ័យ រាជធានីភ្នំពេញ ។
ជនសង្ស័យទាំង២នាក់ខាងលើ ម្នាក់ឈ្មោះ ចាន់ សីហា ភេទប្រុស អាយុ២៥ឆ្នាំ មុខរបរមិនពិតប្រាកដ ស្នាក់នៅក្នុងភូមិវិមានទ្រុង សង្កាត់ក្រាំងធ្នង់ ខណ្ឌសែនសុខ និងម្នាក់ទៀតឈ្មោះ រដ្ឋា យុទ្ធារាជ ភេទប្រុស អាយុ២៣ឆ្នាំ មុខរបរកម្មកររោងចក្រ ស្នាក់នៅជិតផ្សារកន្ទួត ស្រុកកណ្តាលស្ទឹង ខេត្តកណ្តាល។
នគរបាលដកហូតបានវត្ថុតាងម៉ូតូចំនួន២គ្រឿង ក្នុងនោះមួយគ្រឿងម៉ាកហុងដាឌ្រីម ធុនC125 ពណ៌ខ្មៅ ស៊េរីឆ្នាំ២០១៥ ពាក់ស្លាកលេខ ភ្នំពេញ ១FE-១២៩៦ និងម៉ូតូមួយគ្រឿងទៀតម៉ាកហុងដាឌ្រីម ធុន C125 ស៊េរីឆ្នាំ២០១៨ ពណ៌ខ្មៅ ពាក់ស្លាកលេខ កណ្តាល ១Z-៦៧២៨ ។
នគរបាលបានប្រាប់ថា មុនពេលកើតហេតុ កម្លាំងនគរបាលប៉ុស្តិ៍កាកាប១ បានល្បាតនៅក្នុងមូលដ្ឋាន លុះមកដល់ចំណុចមុខ ក្លឹប រីលីក្ស ក៏បានប្រទះឃើញជនសង្ស័យ ទើបឃាត់ខ្លួនយកទៅសួរនាំ ព្រោះយប់ជ្រៅហើយពួកគេមិនព្រមដេកពួនទៀត។
ក្រោយពីសាកសួរ និងពិនិត្យធ្វើតេស្តទឹកនោមរួច រកឃើញថា ជនសង្ស័យមានប្រើប្រាស់ និងរក្សាទុកនូវសារធាតុញៀន។
បន្ទាប់មកកម្លាំងនគរបាលបានកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការតាមច្បាប់៕
ចែករំលែកព័តមាននេះ