រាជធានីភ្នំពេញ ៖ ជនសង្ស័យ២នាក់ត្រូវនគរបាលចាប់វាយខ្នោះបន្ទាប់ពីធ្វើសកម្មភាពឆក់កាបូបពីស្ត្រីជនបរទេសម្នាក់បានសំរេច ហើយរត់គេចខ្លួនចំពេលកម្លាំងនគរបាលល្បាតប្រទះឃើញក៏ឃាត់ខ្លួនបានភ្លាមៗទាំង២នាក់តែម្តង ។
ហេតុការណ៍ខាងលើនេះបានបង្កឱ្យមានការភ្ញាក់ផ្អើលកាលពីវេលាម៉ោង១២និង១០នាទីរំលងអធ្រាត្រឈានចូលថ្ងៃទី១៦ ខែ ធ្នូ ឆ្នាំ ២០១៨នៅចំណុចផ្លូវ៣០២កែងផ្លូវ៥១ ស្ថិតនៅភូមិ៧ សង្កាត់បឹងកេងកងទី១ ខណ្ឌចំការមន ។
សមត្ថកិច្ចបានអោយដឹងថា ជនរងគ្រោះឈ្មោះ NIAMH ELIZABTH ភេទស្រី អាយុ២៥ឆ្នាំ ជាជនជនជាតិអាយឡែន ជាភ្ញៀវទេសចរណ៍ ស្នាក់នៅផ្ទះលេខ២៦ ផ្លូវ៣០២ សង្កាត់បឹងកេងកងទី១ ខណ្ឌចំការមន ។ ក្នុងកាបូបស្ពាយរបស់នារីរងគ្រោះពណ៍ខ្មៅ ក្នុងនោះមានលុយចំនួន២៤ដុល្លា និងលុយខ្មែរ២០០០រៀល ។
លោក គល់ សុផាត នាយនគរបាលរដ្ឋបាលបឹងកេងកងទី១ ខណ្ឌចំការមន បានឃាត់ជនសង្ស័យទាំង២នាក់ខាងលើ ក្នុងនោះម្នាក់ឈ្មោះ ឈន សាយសុគី អាណាន់ ភេទប្រុស អាយុ១៧ឆ្នាំ ជាសិស្ស ស្នាក់នៅផ្ទះលេខ៩១E ផ្លូ២៧១ សង្កាត់បឹងសាឡាង ខណ្ឌទួលគោក ជាអ្នកបើកបរម៉ូតូម៉ាកហុងដាឌ្រីម ពណ៌ខ្មៅ ពាក់ស្លាកលេខ ភ្នំពេញ ១BE-៤៨៤១ ចំណែកម្នាក់ទៀតជាអ្នករួមដំណើរ និងធ្វើសកម្មភាពឈ្មោះ នៅ រតនៈ ភេទប្រុស អាយុ១៩ឆ្នាំ ជាសិស្ស ស្នាក់នៅផ្ទះលេខ១៨៦ ផ្លូវលេខ៣១បេតេ សង្កាត់បឹងទំពុន១ ខណ្ឌមានជ័យ ។
ក្រោយពេលសមត្ថកិច្ចចាប់ឃាត់ខ្លួន ជនសង្ស័យបានសារភាពថា ពួកខ្លួនបានធ្វើសកម្មភាពឆក់កាបូបពីនារីជនបរទេសម្នាក់ក្នុងចំណោមគ្នា៥នាក់ (ក្នុងនោះប្រុស២នាក់) កំពុងធ្វើដំណើរតាមផ្លូវ៥១ ក្នុងទិសដៅពីត្បូងទៅជើង ដោយឃើញឱកាសល្អ ហើយផ្លូវក៏ស្ងាត់ផងនោះ ពួកខ្លួនបានជិះម៉ូតូមួយគ្រឿងទៅពីខាងក្រោយស្របទិសគ្នា ក៏ធ្វើសកម្មភាពឆក់កាបូបស្ពាយពីនារីជនបរទេសបានហើយក៏បើកម៉ូតូគេចខ្លួន តែស្របពេលនោះនគរបាលល្បាតសហការជាមួយនគរបាលក្រសួងមហាផ្ទៃបានប្រទះឃើញ ក៏ជិះម៉ូតូដេញតាមចាប់បាន និងវាយខ្នោះពួកខ្លួន នៅផ្លូវព្រះមុនីវង្សកែងផ្លូវ៣១០ សង្កាត់បឹងកេងកងទី២ ខណ្ឌចំការមន រួចនាំយកមកស្នាក់ការប៉ុស្តិ៍ និងដកហូតវត្ថុតាងកាបូបស្ពាយរបស់នារីជនរងគ្រោះ ហើយបានប្រគល់កាបូបនោះអោយទៅម្ចាស់វិញផងដែរ ។
ជនសង្ស័យត្រូវសមត្ថកិច្ចកសាងសំណុំរឿងបញ្ជូនទៅអធិការដ្ឋាននគរបាលខណ្ឌចំការមនដើម្បីចាត់ការតាមច្បាប់ ៕
ចែករំលែកព័តមាននេះ