រាជធានីភ្នំពេញ ៖ ច្រាំងទន្លេមេគង្គនៅក្នុងភូមិសាស្ត្រឃុំឫស្សីជ្រោយ ស្រុកមុខកំពូល ខេត្តកណ្តាល តែងតែជួបនូវបញ្ហាបាក់ច្រាំងជារឿយៗ ជាពិសេសនៅក្នុងរយៈពេលជាង១០ឆ្នាំចុងក្រោយនេះ ។ តាមការឱ្យដឹងពីប្រជាពលរដ្ឋនៅតំបន់នោះបានឱ្យដឹងថា តាំងពីគាត់ដឹងក្តីមក ដីនៅច្រាំងខាងលិចតែងតែបាក់រហូតមក
រីឯដីនៅច្រាំងខាងកើត បែរជាមានការដុះច្រើន ។
ពួកគាត់បានរៀបរាប់បន្តទៀតថា នៅចន្លោះឆ្នាំ២០១០-២០១៤ មានការបាក់ច្រាំងកាន់តែខ្លាំង ប្រវែងពី១០០ទៅ២០០ម៉ែត្របានចូលទៅក្នុងទន្លេ ។ តំបន់នេះ បានរងនូវការបាក់ខ្លាំងសាជាថ្មីម្តងទៀតនៅចុងឆ្នាំ២០១៨ ។ មន្ត្រីជំនាញក្រសួងរ៉ែ និងថាមពលបានឱ្យដឹងថា ក្រុមជំនាញបានចុះពិនិត្យនិងតាមដានស្ថានភាពទីតាំងនេះ ចាប់តាំងពីឆ្នាំ២០១៥ ដោយបានរកឃើញថា ច្រាំងទន្លេនៅតំបន់នេះរងហានិភ័យខ្ពស់ដោយសារបញ្ហាធំៗចំនួន៣៖
ទីមួយ ស្ថានភាពបាតទន្លេជ្រៅខ្លាំងគឺមានជម្រៅពី៨ទៅជិត៣០ម៉ែត្រនៅត្រើយខាងលិច (ឃុំឬស្សីជ្រោយ) ហើយមានជម្រៅរាក់ និងដុះខ្សាច់ច្រើននៅត្រើយខាងកើត ។ កត្តានេះធ្វើឱ្យច្រាំងទន្លេខាងលិចបាត់បង់លំនឹង ដោយសារទឹកហូរបុកមកច្រាំង ។
កត្តាទីពីរ គឺសម្ពាធទឹកក្រោមដី ។ ឆ្នាំនេះទឹកឡើងធំបណ្ដាលឱ្យជន់ជោរទៅតាមបឹងទាំងឡាយនៅក្បែរទន្លេ រួមទាំងកំពស់ដង្ហើមទឹកក្រោមដីមានការកើនឡើង ។ នៅពេលដែលទឹកទន្លេស្រកទៅវិញជាគំហុក បានធ្វើឱ្យកម្ពស់ទឹកក្រោមដីស្រកទៅវិញមិនទាន់ ។ នេះជាហេតុធ្វើឱ្យទឹកក្រោមដីបន្តហូរចូលមកទន្លេវិញ តាមស្រទាប់ដីល្បាយខ្សាច់ ដែលលំហូរនេះធ្វើឱ្យដីស្រទាប់ក្រោមទន់ជ្រាយ និងងាយរអិលបាក់ ។
កត្តាទីបីគឺ ស្ថានភាពទន្លេនៅតំបន់រកាកោងនេះ (ឃុំឫស្សីជ្រោយ ព្រែកដំបង និងរការកោង) មានសភាពកោងខ្លាំងដែលធ្វើឱ្យខ្សែទឹកហូរបុកច្រាំងត្រើយខាងលិច ។ រីឯត្រើយខាងកើតមានការដុះខ្សាច់ជាច្រើន ។
តាមមន្ត្រីជំនាញបានបញ្ជាក់ទៀតថា ក្នុងស្ថានភាពបែបនេះ កាលពីខែមីនា និងតុលាកន្លងទៅ ក្រសួងសេដ្ឋកិច្ចបានកោះប្រជុំក្រសួងពាក់ព័ន្ធ ដែលរួមមាន ក្រសួងធនធានទឹក និងឧតុនិយមក្រសួងរ៉ែ និងថាមពល ក្រសួងសាធារណការ និងដឹកជញ្ជូន ដើម្បីស្វែងរកដំណោះស្រាយ ។
កិច្ចពិភាក្សាបានបង្ហាញដោយអ្នកជំនាញថា ស្ថានភាពនៃច្រាំងទន្លេមេគង្គតំបន់ស្រុកមុខកំពូល កំពុងរងហានិភ័យខ្ពស់ ដែលបង្ករការគំរាមកំហែងយ៉ាងខ្លាំងដល់ប្រជាពលរដ្ឋដែលនៅតាមដងទន្លេ និងផ្លូវជាតិ6A ដែលជាសរសៃឈាមនៃសេដ្ឋកិច្ចជាតិ បើគ្មានសកម្មភាពទប់ស្កាត់ឱ្យបានទាន់ពេលនោះទេ ។
ដើម្បីបញ្ចៀសបញ្ហាបាក់ដាច់ផ្លូវជាតិលេខ6A និងការរស់នៅរបស់ប្រជាពលរដ្ឋ អង្គប្រជុំបានលើកវិធានការបន្ទាន់ ដែលរួមមាន ការផ្តល់ថវិកាជាបន្ទាន់ ដើម្បីឱ្យក្រសួងធនធានទឹកទប់លំនឹងច្រាំងខាងលិច ក្នុងតំបន់ស្រុកមុខកំពូល ដោយប្រើបាវខ្សាច់ Géotextile ហើយក្រសួងរ៉ែនិងថាមពល ត្រូវសំរុកបូមស្ដារបាតទន្លេមេគង្គប៉ែកខាងកើត ដើម្បីសំរួលចរន្តទឹក និងបន្តសិក្សារកវិធីសាស្ត្រ ដែលអាចកែបញ្ហាគ្រោះធម្មជាតិនេះឱ្យបានជោគជ័យ មុនពេលដែលចរន្តទឹកអាចផ្តាច់ផ្លូវជាតិលេខ6A ។
ក្រោយពីកិច្ចប្រជុំនេះ ក្រសួងរ៉ែនិងថាមពល បានចេញវិធានការ បិទឡូត៍ខ្សាច់ធំៗទាំងឡាយនៅភ្នំពេញនិងខេត្តកណ្តាល ដើម្បីប្រមូលកម្លាំងមកបូមស្តារទន្លេមេគង្គប៉ែកខាងកើតដែលពោរពេញដោយកំណកខ្សាច់ និងសម្រួលចរន្តទឹកពីទិសខាងលិចមកខាងកើតវិញម្តង ។ ប៉ុន្តែដោយសារតែទឹកស្រកលឿនពេក ជាហេតុធ្វើការបាក់ច្រាំងថ្មីៗនេះ បានកើតឡើង ហើយបណ្ដាលឱ្យប្រជាពលរដ្ឋនៅតាមដងទន្លេក្នុងឃុំឫស្សីជ្រោយបានរងគ្រោះ ។
មតិមហាជននៅទីនោះ បានចោទទៅលើការបូមខ្សាច់ដែលត្រូវស្ដារបាតទន្លេប៉ែកខាងកើតដើម្បីតម្រង់ខ្សែទឹក បញ្ចៀសការហូរបុកច្រាំងប៉ែកខាងលិច ។ ភ្លាមៗក្រោយពីការបាក់ច្រាំង ក្រុមការងារក្រសួងរ៉ែ
និងថាមពល ក្រុមការងារថ្នាក់ជាតិចុះជួយមូលដ្ឋានស្រុកមុខកំពូលដឹកនាំដោយ លោក វង្សី វិសុទ្ធ តំណាងក្រសួងសេដ្ឋកិច្ច និងហិរញ្ញវត្ថុក្រុមការងារក្រសួងធនធានទឹក និងអាជ្ញាធរបានចុះពិនិត្យផ្ទាល់នៅទីតាំងបាក់ច្រាំងនៅតំបន់ឫស្សីជ្រោយ និងបានជួបផ្ទាល់ជាមួយប្រជាពលរដ្ឋរងគ្រោះ ហើយបានធ្វើការផ្តល់ដំណោះស្រាយជូនប្រជាជនដូចខាងក្រោម ៖
១-ផ្អាកបូមបណ្តោះអាសន្ននៅកន្ទុយឡូត៍លេខ១សិនដើម្បីធ្វើការពន្យល់ប្រជាពលរដ្ឋឱ្យបានយល់ពីភាពចាំបាច់នៃការបូមស្តារក្នុងការបញ្ចៀសខ្សែទឹកពីច្រាំងខាងលិច (កន្លែងរងគ្រោះ) ។
២-កំណត់ព្រំដែនត្រូវបូមឲ្យបានច្បាស់លាស់ដោយបោះពោងសម្គាល់។
៣-ដាក់មន្ត្រីរ៉ែ២រូបប្រចាំការ២៤ម៉ោងជាមួយអាជ្ញាធរ និងប្រជាពលរដ្ឋដើម្បីពិនិត្យ និងរាយការណ៍ជាបន្ទាន់ ។
៤-ក្រសួងធនធានទឹកនឹងចាប់ផ្តើមធ្វើច្រាំងតាមរយៈបាវខ្សាច់ Géotextile ជាបន្ទាន់ចាប់ពីចុងខែធ្នូ ឬដើមខែមករានេះ ។
៥-បន្តសិក្សាឱ្យបានច្បាស់លាស់បន្ថែមទៀតអំពីការបង្វែរចរន្តទឹកដែលកំពុងបុកខ្លាំងមកត្រើយខាងលិច និងបន្តបូមស្ដារបាតទន្លេប៉ែកខាងកើត ព្រមទាំងពន្យល់ប្រជាពលរដ្ឋអោយបានយល់ច្បាស់ ពីលក្ខណៈបច្ចេកទេសនិងសារសំខាន់នៃការបូមស្ដារនេះ ។
ក្រុមមន្ត្រីជំនាញបានអះអាងថា ស្ថានភាពទន្លេនៅតំបន់រកាកោងនេះនឹងឈានដល់ភាពប្រសើរឡើងវិញ នៅពេលដែលបាតទន្លេត្រូវបានកែសម្រួល និងច្រាំងត្រើយខាងលិចត្រូវបានរៀបចំទប់ដោយបាវខ្សាច់ Géotextile ដែលការងារនេះ ត្រូវការពេលមិនតិចជាង៤ទៅ៥ឆ្នាំនោះឡើយ ដើម្បីបញ្ចៀសការបាក់ច្រាំងដែលបង្កមហន្តរាយជាយថាហេតុ ៕
ចែករំលែកព័តមាននេះ