ខេត្តបាត់ដំបង ៖ យោងតាមរបាយការណ៍បឋមរបស់សមត្ថកិច្ចបានឱ្យដឹងថា អំពើចោរកម្មដែលបង្កឡើងដោយជនមិនស្គាល់អត្តសញ្ញាណ បានធ្វើសកម្មភាពគាស់ទំលុះទំលាយលំនៅឋានប្រជាពលរដ្ឋចំនួន២លើកផ្ទួនៗគ្នា ក្នុងរយៈពេលត្រឹមតែ១យប់ ដែលកើតឡើងនៅក្នុងសង្កាត់វត្តគរ ក្រុងបាត់ដំបង បណ្ដាលឲ្យជនរងគ្រោះបាត់បង់លុយ និងទ្រព្យអស់ជាច្រើន…
ខេត្តបាត់ដំបង ៖ យោងតាមរបាយការណ៍បឋមរបស់សមត្ថកិច្ចបានឱ្យដឹងថា អំពើចោរកម្មដែលបង្កឡើងដោយជនមិនស្គាល់អត្តសញ្ញាណ បានធ្វើសកម្មភាពគាស់ទំលុះទំលាយលំនៅឋានប្រជាពលរដ្ឋចំនួន២លើកផ្ទួនៗគ្នា ក្នុងរយៈពេលត្រឹមតែ១យប់ ដែលកើតឡើងនៅក្នុងសង្កាត់វត្តគរ ក្រុងបាត់ដំបង បណ្ដាលឲ្យជនរងគ្រោះបាត់បង់លុយ និងទ្រព្យអស់ជាច្រើន ហើយជនដៃដល់បានគេចខ្លួនដោយសុវត្ថិភាព ។
របាយការណ៍ដដែលបានឱ្យដឹងថា លើកទី១-បានកើតឡើងនៅយប់ថ្ងៃទី១៦ ធ្នូ ក្នុងក្រុមទី៣ ភូមិវត្តគរ សង្កាត់វត្តគរ ដែលម្ចាស់ផ្ទះឈ្មោះយី ផាន់នី ភេទប្រុស អាយុ២៧ឆ្នាំ។ សមត្ថកិច្ចបានឲ្យដឹងថា ម្ចាស់ផ្ទះមិនបានដឹងថា ហេតុការណ៍នេះ បានកើតឡើងតាំងពីពេលណាទេ តែគាត់បានដឹងនៅម៉ោង១០ និង៤០នាទីយប់នោះ ដោយសារមានស្នាមគាស់ទំលុះទំលាយ និងរើកកាយបាត់បង់លុយជាច្រើន ។ បើតាមជនរងគ្រោះបានប្រាប់ថា ចោរបានលួចយកលុយគាត់អស់ចំនួន៤,២២០ដុល្លារ និង២,៦០០បាត តែប្រាក់ខ្មែរចំនួន៨០ម៉ឺនរៀល ដែលទុកលើទូចោរមិនយកទេ។
ដោយឡែក ករណីទី២ បើតាមសេចក្ដីរាយការណ៍បានឲ្យដឹងថា បានកើតឡើងនៅវេលាម៉ោង៣រំលង
អធ្រាត្រឈានចូលថ្ងៃទី១៧ ធ្នូ នៅចំណុចក្រុមទី២០ ភូមិកម្មករ សង្កាត់វត្តគរ ដែលម្ចាស់ផ្ទះឈ្មោះសំ វ៉ាន់នី ស្រីអាយុ៥៣ឆ្នាំ ។ ករណីនេះ ជនសង្ស័យបានគាស់ទ្វារផ្ទះ រួចចូលលួចទ្រព្យសម្បត្តិអស់ជាច្រើន ខណ:ដែលម្ចាស់ផ្ទះកំពុងដេកលង់លក់ក្នុងដំណេក។
ទ្រព្យសម្បត្តិដែលបាត់បង់ បើតាមរបាយការណ៍បឋមរបស់សមត្ថកិច្ចបានឱ្យដឹងថា បាត់ម៉ូតូម៉ាកឃ្លីក១គ្រឿង, ក្រវិលមាស១គួ ទម្ងន់១ជី, ប្រាក់ខ្មែរចំនួន១លានរៀល, ប្រាក់ថៃចំនួន២.០០០បាត, ប្រាក់ដុល្លារចំនួន៩០០ដុល្លារ និងទូរស័ព្ទដៃចំនួន២គ្រឿង ។
ជុំវិញការប្រព្រឹត្តអំពើចោរកម្ម ដែលបង្កឡើងដោយជនមិនស្គាល់សាវតាទាំង២ករណីខាងលើនេះ ក្រុមចោរសុទ្ធតែធ្វើបានសម្រេច និងគេចខ្លួនដោយសុវត្ថិភាព មិនរំខានដល់សមត្ថកិច្ចឡើយ ។ បើតាមការកត់សម្គាល់មួយរយ:កន្លងទៅនេះ អំពើចោរកម្មកំពុងកើតឡើងស្ទើរគ្រប់ទីកន្លែង ទាំងនៅតាមបណ្ដាស្រុកនានា ទាំងនៅក្នុងក្រុងបាត់ដំបង។ ដោយឡែក បនល្បែងស៊ីសងវិញ ក៏កំពុងកើនឡើងប្រណាំងប្រជែងជាមួយនឹងអំពើចោកម្ម ឬបទល្មើសគ្រឿងញៀនយ៉ាងព្រោងព្រាតដែរ។
ទោះយ៉ាងណា ជុំវិញបទល្មើសគាស់ទំលុះទំលាយលំនៅឋានមួយយប់២លើកផ្ទូនៗខាងលើនេះ លោកជេត វណ្ណនី ស្នងការរងខេត្តបានបញ្ជាក់ថា ពេលនេះ មន្ត្រីជំនាញកំពុងសួរនាំជនរងគ្រោះ និងកំពុងកំណត់បាននូវមុខសញ្ញាជនសង្ស័យបានខ្លះៗហើយ ហើយកម្លាំងរបស់លោកកំពុងតាមប្រមាញ់ ។
ចែករំលែកព័តមាននេះ