ខេត្តបន្ទាយមានជ័យ ៖ ជនសង្ស័យម្នាក់ដោយខឹងជនរងគ្រោះស៊ីពោត ហើយយកស្នូលពោតគប់ចូលក្នុងផ្ទះ បានជិះម៉ូតូតាមកាប់ចំនួន២ពូថៅចំមួកសុវត្ថិភាព បណ្តាលឱ្យបែករងរបួសត្រចៀក ហើយជនសង្ស័យត្រូវបានឃាត់ខ្លួនបញ្ជូនទៅសាលាដំបូងខេត្តបន្ទាយមានជ័យចាត់ការតាមច្បាប់នៅថ្ងៃទី១៦ ខែធ្នូ ឆ្នាំ២០១៨។ ជនសង្ស័យខាងលើឈ្មោះឈន…
ខេត្តបន្ទាយមានជ័យ ៖ ជនសង្ស័យម្នាក់ដោយខឹងជនរងគ្រោះស៊ីពោត ហើយយកស្នូលពោតគប់ចូលក្នុងផ្ទះ បានជិះម៉ូតូតាមកាប់ចំនួន២ពូថៅចំមួកសុវត្ថិភាព បណ្តាលឱ្យបែករងរបួសត្រចៀក ហើយជនសង្ស័យត្រូវបានឃាត់ខ្លួនបញ្ជូនទៅសាលាដំបូងខេត្តបន្ទាយមានជ័យចាត់ការតាមច្បាប់នៅថ្ងៃទី១៦ ខែធ្នូ ឆ្នាំ២០១៨។
ជនសង្ស័យខាងលើឈ្មោះឈន ភារម្យ ភេទប្រុស អាយុ២៦ឆ្នាំ រស់នៅភូមិអូរអំបិល សង្កាត់អូរអំបិល ក្រុងសិរីសោភ័ណ។ ចំណែកជនរងគ្រោះឈ្មោះ ជា ផល្លី ភេទប្រុស អាយុ៣២ឆ្នាំ រស់នៅភូមិព្រហ៊ូត សង្កាត់អូរអំបិល ក្រុងសិរីសោភ័ណ ។
លោកវរសេនីយ៍ត្រី យ៉ាន់ សុវណ្ណ មេបញ្ជាការកងរាអាវុធហត្ថក្រុងសិរីសោភ័ណបានប្រាប់ថា ក្រោយពេលដែលទទួលពាក្យបណ្តឹងពីជនរងគ្រោះ បានប្តឹងជនសង្ស័យខាងលើដែលធ្វើសកម្មភាពយកពូថៅកាប់ជនរងគ្រោះចំ២កន្លែង បណ្តាលបែកមួកសុវត្ថិភាពរងរបួសចំត្រចៀក កាលពីវេលាម៉ោង១០និង១៨នាទីព្រឹកថ្ងៃទី១៥ ខែធ្នូ ឆ្នាំ២០១៨ ស្ថិតនៅភូមិព្រហ៊ូត សង្កាត់អូរអំបិល ក្រុងសិរីសោភ័ណ។
លោកបានបញ្ជាក់ថា៖ក្រោយពេលទទួលពាក្យបណ្តឹងពីជនរងគ្រោះកម្លាំងកងរាជអាវុធហត្ថក្រុងសិរីសោភ័ណ បានធ្វើការស្រាវជ្រាវនិងកំណត់មុខសញ្ញាឃាត់ខ្លួនជនសង្ស័យនៅរសៀលថ្ងៃទី១៥ ខែធ្នូ ឆ្នាំ២០១៨ សង្កាត់អូរអំបិល ក្រុងសិរីសោភ័ណ។
លោកឧត្តសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យបានបញ្ជាក់ថា ក្រោយពេលឃាត់ខ្លួននាំមកសាកសួរ ជនសង្ស័យបានសារភាពថា មូលហេតុដែលខ្លួនយកពូថៅតាមកាប់ជនរងគ្រោះ ព្រោះខឹងជនរងគ្រោះជិះម៉ូតូស៊ីពោត ហើយយកស្នូលពោតគប់ចូលក្នុងបរិវេណផ្ទះរបស់ខ្លួន ទើបខឹងក៏យកពូថៅជិះម៉ូតូតាមកាប់ជនរងគ្រោះចំនួន២ពូថៅ បណ្តាលរងរបួស ហើយក៏ត្រូវកម្លាំងកងរាជអាវុធហត្ថឃាត់ខ្លួនបញ្ជូនទៅសាលាដំបូងខេត្តបន្ទាយមានជ័យចាត់ការតាមច្បាប់៕
ចែករំលែកព័តមាននេះ