រាជធានីភ្នំពេញ ៖ យុវជន២នាក់ជិះម៉ូតូមួយគ្រឿង បើកបរក្នុងល្បឿនលឿនបានទាក់ដៃចង្កូតជាមួយម៉ូតូមួយគ្រឿងទៀតធ្វើឱ្យដួលហើយត្រូវរថយន្តមួយគ្រឿងបើកមកដល់ចាប់ហ្វ្រាំងមិនទាន់ក៏បុកបន្ថែម បណ្តាលអោយស្លាប់ម្នាក់យ៉ាងអាណោចអាធ័ម ចំណែកម្នាក់ទៀតរងរបួសស្រាល ។
ហេតុការណ៍ខាងលើនេះបានបង្កអោយមានការភ្ញាក់ផ្អើលកាលពីវេលាម៉ោង៧និង៤៥នាទីយប់ថ្ងៃទី១៦ ខែធ្នូ ឆ្នាំ២០១៨ នៅតាមបណ្ដោយផ្លូវជាតិលេខ៤ ទល់មុខបុរីពិភពថ្មីកំបូល ដែលស្ថិតនៅសង្កាត់កន្ទោក ខណ្ឌពោធិ៍សែនជ័យ ។
ជនរងគ្រោះដែលស្លាប់ឈ្មោះ សាំង ជីវ័ន្ត ភេទប្រុស អាយុ១៧ឆ្នាំ មុខរបរជាងសំណង់ ស្នាក់នៅក្នុងបុរីពិភពថ្មីកំបូល មានស្រុកកំណើតនៅភូមិកន្ទៀន ឃុំរោងដំរី ស្រុកបាភ្នំ ខេត្តព្រៃវែង ជនរងគ្រោះជាអ្នកបើកបរម៉ូតូម៉ាកហុងដាឌ្រីម ស៊េរីឆ្នាំ២០១៨ ពណ៌ខ្មៅ ពាក់ស្លាកលេខ ព្រៃវែង ១N -០៧៩១ ។ ចំណែកយុវជនដែលជាអ្នករួមដំណើរមិនស្គាល់អត្តសញ្ញាណ បានរងរបួសស្រាល ។
ប្រភពព័ត៌មានពីយុវជនដែលជិះជាមួយជនរងគ្រោះបានឲ្យដឹងថា មុនពេលកើតហេតុ គាត់និងជនរងគ្រោះបានជិះម៉ូតូមួយគ្រឿងធ្វើដំណើរតាមបណ្ដោយផ្លូវជាតិលេខ៤ក្នុងទិសដៅពីកើតទៅលិចក្នុងល្បឿនលឿន បន្ទាប់មកបានទាក់ដៃចង្កូតជាមួយម៉ូតូ១គ្រឿងទៀតបណ្ដាលឲ្យដួលហើយ ស្រាប់តែមានរថយន្តមួយគ្រឿងម៉ាកព្រូសបានបុកបន្ថែម បណ្តាលអោយជនរងគ្រោះដែលជាអ្នកបើកបរម៉ូតូដួលបោកនឹងថ្នល់បាក់កស្លាប់យ៉ាងអាណោចអាធ័ម ។ ភ្លាមៗនោះរថយន្តម៉ាកព្រូសបានបើកគេចបាត់ស្រមោល។
ក្រោយពេលកើតហេតុ សពជនរងគ្រោះត្រូវបានជំនាញចរាចរណ៍ខណ្ឌពោធិ៍សែនជ័យ បានធ្វើលិខិតប្រគល់អោយក្រុមគ្រួសារដើម្បីយកទៅធ្វើបុណ្យតាមប្រពៃណីនៅស្រុកកំណើត ៕
ចែករំលែកព័តមាននេះ