រាជធានីភ្នំពេញ ៖ កម្លាំងនគរបាលការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញនៅវេលាម៉ោង០៣និង០០នាទីរសៀល ថ្ងៃទី១៦ ខែធ្នូ ឆ្នាំ២០១៨ បានចុះបង្ក្រាបសង្វៀនបញ្ជល់មាន់ធំមួយកន្លែងស្ថិតក្នុងភូមិទ្រា សង្កាត់ស្ទឹងមានជ័យទី៣ ខណ្ឌមានជ័យ ដោយឃាត់អ្នកលេងជាច្រើននាក់ និងម៉ូតូជាច្រើនគ្រឿង ។
ប្រតិបត្តិការចុះបង្ក្រាបខាងលើធ្វើឡើងដោយមានការដឹកនាំបញ្ជារកម្លាំងផ្ទាល់ពីសំណាក់លោកវរសេនីយ៍ឯក ប៊ុន សត្យា នាយការិយាល័យនគរបាលព្រហ្មទណ្ឌកម្រិតស្រាលរាជធានីភ្នំពេញ និងមានការសម្របសម្រួលឯកភាពពីព្រះរាជអាជ្ញាររងអមសាលាដំបូងរាជធានីភ្នំពេញលោក ប្លង់ សុផល ផងដែរ ។
ជាលទ្ធផលកម្លាំងនគរបាលបានឃាត់ខ្លួនមនុស្សសរុប១៧នាក់ និងដកហូតមាន់ជល់១០ក្បាល រួមទាំងដកហូតម៉ូតូជាង២០គ្រឿង រួមទាំងវត្ថុតាងមួយចំនួនធំទៀតផងដែរ ។ ក្រោយការឃាត់ខ្លួនអ្នកញៀនល្បែងបញ្ជល់មាន់ទាំង១៧នាក់ រួមទាំងវត្ថុតាងទាំងអស់ដែលបានដកហូត ត្រូវបញ្ចូនទៅកាន់ ការិយាល័យព្រហ្មទណ្ឌកម្រិតស្រាលរាជធានីភ្នំពេញ ដើម្បីបន្តនីតិវិធីនៅពេលក្រោយ ។
សូមបញ្ជាក់ថា ទីតាំងសង្វៀនបញ្ជល់មាន់ខាងលើនេះមិនមែនមានតែជល់មាន់មួយមុខទេ គឺមានល្បែងបៀរ និងល្បែងអាប៉ោង បើកលេង ៕
ចែករំលែកព័តមាននេះ