ប្រទេសស្រីលង្កា ៖ នាយករដ្ឋមន្ត្រីស្រីលង្កាលោកMAHINDA RAJAPAKSA បានសុំលាលែងពីតំណែងកាលពីថ្ងៃទី១៥ធ្នូ មិនដល់២ខែផងក្រោយការចូលកាន់តំណែងនោះ។
ប្រធានាធិបតីស្រីលង្កាលោកMAITHRIPALA SIRISENA បានតែងតាំងរូបលោកកាលពីដំណាច់ខែតុលា ជាប្រមុខរដ្ឋាភិបាល ក្រោយកាលដកហូតតំណែងលោក RANIL WICKREMESINGHE។ ញត្តិសម្ដែងការមិនទុកចិត្ត២ ចាប់តាំងពីពេលនោះមកត្រូវបានអនុម័តក្នុងសភា ប៉ុន្តែលោកMAHINDA RAJAPAKSAបានបដិសេធមិនព្រមគោរពតាម។
ពេលនេះក្នុងសេចក្ដីប្រកាសមួយលោកនិយាយថា ខ្ញុំពុំមានចេតនាណាមួយស្ថិតនៅជានាយករដ្ឋមន្ត្រីទៀតឡើយ ប្រសិនបើពុំមានការបោះឆ្នោតទូទៅទេនោះ។ ដើម្បីចៀសវាងការរំខានដល់ប្រធានាធិបតី តាមបែបណាមួយ ខ្ញុំនឹងចាកចេញពីតំណែងនាយករដ្ឋមន្ត្រី ដែលបើកផ្លូវឲ្យប្រមុខរដ្ឋបង្កើតរដ្ឋាភិបាលថ្មីមួយ។
លោក RANIL WICKREMESINGHEឲ្យដឹងនាថ្ងៃទី១៤ធ្នូថា ប្រមុខរដ្ឋបានទូរស័ព្ទមកលោក ដើម្បីស្នើឲ្យលោកវិលមកកាន់តំណែងនាយករដ្ឋមន្ត្រីវិញ នាថ្ងៃទី១៦ធ្នូយោងតាមញត្តិដែលអនុម័តនាសប្ដាហ៍មុនក្នុងសភា៕
ចែករំលែកព័តមាននេះ