ខេត្តកំពង់ស្ពឺ ៖ ប្រជាពលរដ្ឋដែលរស់នៅក្នុងក្រុងច្បារមន ខេត្តកំពង់ស្ពឺទាំងមូលធ្វើការសំណូមពរដល់អាជ្ញាធរមានសមត្ថកិច្ចថ្នាក់លើទាំងអស់ទាំងបីអង្គភាពមានអគ្គស្នងការនគរបាលជាតិ កងរាជអាវុធហត្ថលើផ្ទៃប្រទេស និងអង្គភាពអគ្គបញ្ជាការកងទ័ពជើងគោក និងជាពិសេសលោកស្រី ចាត សូរស្មី ព្រះរាជអាជ្ញាអមសាលាដំបូងខេត្តកំពង់ស្ពឺថ្មី មេត្តាបង្ក្រាបល្បែងកន្ទុយលេខធំៗជាច្រើនកន្លែងផង ខណៈដែលសមត្ថកិច្ចខេត្តកំពង់ស្ពឺមិនហ៊ានបង្ក្រាបទាល់តែសោះ ។
ពួកគេចោទថា ដោយសារតែល្បែងកន្ទុយលេខ នៅក្នុងក្រុងច្បារមន ខេត្តកំពង់ស្ពឺ រីកដូចផ្សិតជាឆ្នោតយួនជ្រកក្រោមឆ្នោតខ្មែរ ឬ (ឆ្នោតនាគ) នោះដែលកំពុងតែពង្វក់ប្រជាពលរដ្ឋនៅក្នុងខេត្តកំពង់ស្ពឺទាំងមូលធ្វើអោយអ្នកខ្លះលង់និងល្បែងឈ្លោះប្រកែកគ្នាបែកបាក់ប្តីប្រពន្ធ និងកើតមានករណីចោរ លួច ឆក់ ប្លន់ជាដើម ។
កត្តានេះហើយដែលធ្វើអោយបងប្អូនប្រជាពលរដ្ឋនៅក្នុងក្រុងច្បារមនទាំងមូលមានការព្រួយបារម្ភនោះធ្វើការសំណូមពរអោយអស់លោក សមត្ថកិច្ចធ្វើការបង្ក្រាបផង ដើម្បីអោយប្រជាពលរដ្ឋមានសុវត្ថិភាពដូចអ្វីដែលរដ្ឋាភិបាលបានដាក់កំណត់ ភូមិ ឃុំ មានសុវត្តិភាពចំនួន០៩ចំណុចនោះ ។
តាមសម្តីរបស់ប្រជាពលរដ្ឋមានឈ្មោះ សុខ វ៉ាន់ណេត អាយុ៤៦ឆ្នាំ ជាអ្នកញៀនល្បែងកន្ទុយលេខ ហើយធ្លាក់ខ្លួនក្រីក្រសាច់ញាតិបងប្អូនលែងរាប់រក ដោយសារតែនិយាយមិនស្តាប់ប្រាប់មិនតាម រស់នៅក្នុងភូមិត្រពាំងលើក សង្កាត់រកាធំ ក្រុងច្បារមន ខេត្តកំពង់ស្ពឺ បាននិយាយអោយដឹងថា កន្លងមករូបលោកធ្លាប់ចាក់កន្ទុយលេខ (ឆ្នោតយួន) ក្នុង១ថ្ងៃ មិនក្រោមពី១លានរៀល ទៅ២លានរៀលនោះទេ ហើយត្រូវកន្ទុយលេខភាគតិចណាស់ បើមេស៊ីវិញរាប់មិនឈ្នះ ។ លោកបន្តថា ការចាក់កន្ទុយលេខ (ឆ្នោតយួននោះ) មានច្រើនកន្លែងណាស់មានម្តុំផ្សារសុព័រទេព ក្នុងមន្ទីរពេទ្យបង្អែកខេត្ត ម្តុំប្រឡាយច្បារមនផ្ទះឈ្មោះ ពីន ខាងជើងប៉ុស្តិនគរបាលរដ្ឋបាលសង្កាត់ច្បារមន ផ្សារអង្គមេត្រី នៅជុំវិញផ្សារកំពង់ស្ពឺ ហើយធំជាងគេក្នុងផ្សារកំពង់ស្ពឺ តែម្តងលក់ខោអាវជាលេះ លក់ឆ្នោតជាមុខរបរមិនត្រឹមត្រូវតែប៉ុណ្ណោះទេ ខាងកើតផ្សារកំពង់ស្ពឺត្រង់លក់ស្មៅកន្លែងធ្វើក្រចក និងខាងក្រោយបន្ទាយអាវុធហត្ថក៏មានដែរ ។
មានមេធំគេស្គាល់ថា ជាប្រពន្ធរបស់មន្ត្រីអាវុធហត្ថខេត្តកំពង់ស្ពឺ (ឋានជាវរសេនីយ៍ទោ)ស័ក្តិ៤កន្លះផងនោះដែលមានផ្ទះវីឡាស្ថិតនៅតាមបណ្តោយផ្លូវរទេះភ្លើង ក្នុងភូមិត្រពាំងលើក សង្កាត់រកាធំ ក្រុងច្បារមន ខេត្តកំពង់ស្ពឺ និងមួយកន្លែងទៀត នៅក្រោយបញ្ជាការដ្ឋានកងរាជអាវុធហត្ថខេត្តកំពង់ស្ពឺផ្ទាល់តែម្តង ដែលគេស្គាល់ថា ជាមេធំប្រចាំខេត្ត គ្មានសមត្ថកិច្ចណាហ៊ានទៅក្បែរ និងហ៊ានចាប់បង្ក្រាបនោះឡើយ ។
សូម្បីតែនគរបាលក្រុងច្បារមន នគរបាលខេត្ត និងអាវុធហត្ថក្រុង និងអាវុធហត្ថខេត្តក៏មិនហ៊ានបង្ក្រាបដែលសង្ស័យត្រូវថ្នាំទាំងអស់គ្នាហើយមើលទៅ ។ ហើយអ្វីដែលប្រជាពលរដ្ឋនៅក្នុងក្រុងច្បារមនបានដឹងបានជ្រាបស្គាល់ច្បាស់នោះមេកន្ទុយលេខធំៗសុទ្ធសឹងតែជាកងកម្លាំងតែម្តង ។
ប្រជាពលរដ្ឋសង្ឃឹមថា ថ្នាក់លើ និងធ្វើការបង្ក្រាបល្បែងកន្ទុយលេខមួយនេះ ដើម្បីអោយប្រជាពលរដ្ឋជឿជាក់ថា អស់លោកសមត្ថកិច្ចអនុវត្តន៍នូវគោលនយោបាយភូមិ ឃុំ មានសុវត្តិភាពចំនួន០៩ចំណុច ដែលរាជរដ្ឋាភិបាលបានកំណត់នោះ ៕
ចែករំលែកព័តមាននេះ