ខេត្តកំពត ៖ បុរសចំណាស់ម្នាក់បានរងរបួសយ៉ាងធ្ងន់ធ្ងរដោយជួបហេតុការគ្រោះថ្នាក់ចរាចរណ៍មួយកើតឡើងរវាងម៉ូតូ និងបុរសចំណាស់ខាងលើជិះកង់ឆ្លងថ្នល់បានបុកគ្នា កាលពីវេលាម៉ោង១៣និង២០នាទីរសៀល ថ្ងៃទី១៤ ខែធ្នូ ឆ្នាំ២០១៨ នៅលើផ្លូវជាតិលេខ៣១ ចន្លោះគីឡូម៉ែត្រលេខ៣៤-៣៥ ស្ថិតក្នុងភូមិក្រាំងដូង ឃុំសំរោងក្រោម ស្រុកបន្ទាយមាស ខេត្តកំពត ។
ដោយបុរសចំណាស់ខាងលើជិះកង់ឆ្លងថ្នល់ពីលិចទៅកើតខ្វះការប្រុងប្រយ័ត្នក៏ត្រូវម៉ូតូម៉ាកហុងដាឌ្រីមសង់ បើកបរដោយក្មេងអាយុ១៦ឆ្នាំម្នាក់ ជិះឌុបគ្នាម្នាក់បុកពេញទំហឹង បណ្តាលឲ្យបុរសចំណាស់រូបនោះរងរបួសយ៉ាងធ្ងន់ធ្ងរ ។
សមត្ថកិច្ចមូលដ្ឋានឲ្យដឹងថា ហេតុការគ្រោះថ្នាក់ខាងលើបណ្តាលមកពីឈ្មោះ សេក ឆេម ភេទប្រុស អាយុ៦២ឆ្នាំ មានទីលំនៅភូមិកើតហេតុខាងលើបានជិះកង់ឆ្លងថ្នល់ពីលិចទៅកើតដោយខ្វះការប្រុងប្រយ័ត្ន ស្របពេលនោះក៏មានម៉ូតូម៉ាកហុងដាឌ្រីម០៩ ពណ៌ព្រីងទុំ ពាក់ផ្លាកលេខកណ្តាល 1F- 8221 បើកបរដោយឈ្មោះ រី ជេន ភេទប្រុស អាយុ១៦ឆ្នាំ រស់នៅភូមិកើតហេតុខាងលើដូចគ្នានឹងមានអ្នករួមដំណើរម្នាក់ផង ដែលឈ្មោះ នុត ភេទប្រុស អាយុ១៥ឆ្នាំ ក៏រស់នៅភូមិជាមួយគ្នាខាងលើបានបុកចំតួរកង់ពេញទំហ៊ឹង បណ្តាលឲ្យអ្នកជិះកង់បានរងរបួសយ៉ាងធ្ងន់ធ្ងរ ។
រីឯអ្នកបើកបរម៉ូតូ និងអ្នករួមដំណើរបានរងរបួសស្រាល រួចអ្នករបួសត្រូវបានដឹកទៅសង្គ្រោះនៅមន្ទីរពេទ្យបង្អែកខេត្ត ចំណែកវត្ថុតាងក្រោយពីសមត្ថកិច្ចពិនិត្យវាស់វែងរួចបាននាំទៅរក្សាទុកនៅអធិការដ្ឋាននគរបាលស្រុករង់ចាំដោះស្រាយតាមច្បាប់នៅពេលក្រោយ៕
ចែករំលែកព័តមាននេះ