ខេត្តបន្ទាយមានជ័យ ៖ តាមប្រភពព័ត៌មានដែលចុះផ្សាយដោយគេហទំព័រក្នុងស្រុកថៃមួយ(ថៃរ៉ាត់)បានឲ្យដឹងថា ខ្មែរថៃ10នាក់បានជួបឧប្បត្តិហេតុគ្រោះថ្នាក់ចរាចររថយន្តធ្លាក់ផ្លូវបុកដើមឈើសង្ស័យអ្នកបើកបរងងុយដេកបណ្តាលឲ្យស្លាប់របួសកាលពីម៉ោងជាង10ព្រឹកថ្ងៃទី14 ខែធ្នូ ឆ្នាំ២០១៨ លើដងផ្លូវ359ខៅហ៊ីនសន-ស្រះកែវ ក្នុងភូមិណងផូ ឃុំស្រះក្រវ៉ាន់ ស្រុកនិងទីរួមខេត្តស្រះកែវ ។
ប្រភពបន្តជនរងគ្រោះក្នុងហេតុការណ៌មានខ្មែរ9នាក់របួសធ្ងន់ស្រាល8នាក់ស្រី4 ប្រុស4នាក់ (ស្លាប់ស្រីម្នាក់) អ្នកបើកបរជាជនជាតិថៃម្នាក់ប្រុស(ស្លាប់) ។
ប្រភពថា ក្រុមពលកររងគ្រោះទាំងនេះជួលរថយន្តម៉ាកតូយ៉ូតា ពណ៌ស ពាក់ស្លាកលេខ ថៃ 30-0327 ស្រះកែវពីខេត្តឈុនបូរីនៅវេលាទាបភ្លឺ ដើម្បីជិះទៅកាន់ព្រំដែនប៉ោយប៉ែត-ស្រះកែវ ដើម្បីបន្តវីសារ ប៉ុន្តែមិនទាន់ដល់គោលដៅផងជួបរឿងអកុសលតែម្តង ។
ប្រភពថា ក្នុងចំណោមពលកររបួស8នាក់ មាន6នាក់បានចាកចេញពីមន្ទីរពេទ្យហើយ នៅតែអ្នករបួសធ្ងន់2នាក់ទៀតកំពុងបន្តសម្រាកព្យាបាលនៅមន្ទីរពេទ្យក្នុងខេត្តកើតហេតុ ។ យ៉ាងណាក៏ដោយពលកររងគ្រោះខាងលើគេមិនទាន់ស្គាល់អត្តសញ្ញានៅឡើយទេ គ្រាន់តែដឹងថា ពួកគេជាពលករស្របច្បាប់មានលិខិតឆ្លងដែនគ្រប់គ្នាៗ ។
ជុំវិញករណីខាងលើ កោះសន្តិភាព មិនអាចទាក់ទងរកការបំភ្លឺពីមន្ត្រីកម្ពុជាបំរើការងារនៅប្រទេសថៃបានទេ ព្រោះមិនស្គាល់លេខទូរស័ព្ទ ។
ដោយឡែកមន្ត្រីការិយាល័យទំនាក់ទំនងព្រំដែនកម្ពុជា-ថៃប្រចាំច្រកទ្វារអន្តរជាតិប៉ោយប៉ែតម្នាក់ប្រាប់តាមទូរស័ព្ទនៅរសៀលថ្ងៃទី15 ខែធ្នូ ឆ្នាំ2018 នេះថា ករណីខាងលើពិតជាកើតមានមែនគឺមានពលករខ្មែរ2នាក់បានស្លាប់ម្នាក់ឈ្មោះ អ៊ុយ ស្រីលាភ ភេទស្រី អាយុ29ឆ្នាំ មានទីលំនៅភូមិអូរតាគាំ2 សង្កាត់ទួលតាឯក ក្រុង-ខេត្តបាត់ដំបង និងម្នាក់ទៀតមិនទាន់ស្គាល់អត្តសញ្ញាណ ។ ចំពោះអ្នករបួសមន្ត្រីខាងលើប្រាប់ថា មិនដឹងពីចំនួនពិតប្រកដនៅឡើយទេហើយថាអ្នកបើកបរជាជនជាតិថៃត្រឹមតែរបួសមិនស្លាប់ទេ ។
សពពលករស្លាប់ដោយគ្រោះថ្នាក់ចរាចរនៅស្រុកថៃម្នាក់ទៀត ភេទប្រុស ជាអ្នកភូមិបន្ទាយមានឬទ្ធិ ឃុំគោករមៀត ស្រុកថ្មពួក ប៉ុន្តែមិនទាន់ស្គាល់ឈ្មោះ ។ មន្ត្រីការិយាល័យទំនាក់ទំនងព្រំដែនកម្ពុជាថៃប្រាប់ថា សពបុរសខាងលើអាចនឹងបញ្ជូនតាមច្រកតំបន់បឹងត្រកូនក្នុងស្រុកថ្មពួក ។ ដោយឡែកសពស្ត្រីឈ្មោះ អ៊ុយ ស្រីលាភ និងបញ្ជូនតាមច្រកទ្វារអន្តរជាតិប៉ោយប៉ែត ៕
ចែករំលែកព័តមាននេះ