ខេត្តកំពង់ធំ ៖ ហេតុការដ៏រន្ធត់នេះបានបង្កឲ្យមានការភ្ញាក់មួយកើតឡើង កាលពីវេលាម៉ោង៨និង៣០នាទីយប់ថ្ងៃទី១៣ ធ្នូ បន្ទាប់ពីការឮស្នូរកាំភ្លើងផ្ទុះចំនួន៥គ្រាប់ក្នុងលំនៅឋានមួយក្នុងភូមិបល្ល័ងលិច សង្កាត់ដំរីជាន់ខ្លា ក្រុងស្ទឹងសែន ។ លោកវរសេនីយ៍ឯក…
ខេត្តកំពង់ធំ ៖ ហេតុការដ៏រន្ធត់នេះបានបង្កឲ្យមានការភ្ញាក់មួយកើតឡើង កាលពីវេលាម៉ោង៨និង៣០នាទីយប់ថ្ងៃទី១៣ ធ្នូ បន្ទាប់ពីការឮស្នូរកាំភ្លើងផ្ទុះចំនួន៥គ្រាប់ក្នុងលំនៅឋានមួយក្នុងភូមិបល្ល័ងលិច សង្កាត់ដំរីជាន់ខ្លា ក្រុងស្ទឹងសែន ។
លោកវរសេនីយ៍ឯក ញ៉ែម ឈុនលី អធិការនគរបាលក្រុងស្ទឹងសែន បានឲ្យដឹងពីឧប្បត្តិហេតុនេះថា គឺជាករណីប្តីបាញ់ប្រហារប្រពន្ធរួចបាញ់សម្លាប់ខ្លួនឯងតាមក្រោយ ដោយសារតែរឿងប្តីប្រចណ្ឌប្រពន្ធ ។
បុរសជាប្តីឈ្មោះ ហេង សុវណ្ណារ៉ា ហៅ ខ្លឹង អាយុ៤៧ឆ្នាំ ជាអ្នកស៊ីឈ្មោះយោធិនពិការឈ្មោះ វ៉ាន់ ធី នៅកងពលតូចអន្តរាគមន៍លេខ១២ ឈរជើងនៅអានសេះ ខេត្តព្រះវិហារ តែខ្លួនឯងមិនពិការភាពកាយសម្បទាណាមួយទេ ។ បច្ចុប្បន្នមានមុខរបរលក់បាយ គុយទាវ កាហ្វេ និងលាងរថយន្តបានបាញ់សម្លាប់ប្រពន្ធឈ្មោះ ស៊ុន ពៅ អាយុ៣៧ឆ្នាំ ជាច្រើនគ្រាប់ រួចបាញ់សម្លាប់ខ្លួនឯងសរុបចំនួនប្រាំគ្រាប់ បណ្តាលឲ្យស្លាប់ទាំង២នាក់យ៉ាងអាណោចអាធ័មក្នុងថ្លុកឈាម ដោយបន្សល់ទុកកូនប្រុសម្នាក់ឈ្មោះ ហេង ដេវីត ហៅឃែ អាយុ២១ឆ្នាំ ត្រូវជាកូនបង្កើត និងកូនចិញ្ចឹមស្រីម្នាក់ឈ្មោះ រចនា អាយុ៧ឆ្នាំ ។
លោកអធិការបានបន្តឲ្យដឹងទៀតថា បើយោងតាមការបំភ្លឺពីសាច់ញាតិបាននិយាយថា ដោយសារតែភ្លើងប្រចណ្ឌ ជនដៃដល់ជាប្តីតែងតែរករឿងឈ្លោះទាស់ទែងជាមួយប្រពន្ធជាញឹកញាប់ ។ ជាក់ស្តែងនៅថ្ងៃកើតហេតុ ពួកគាត់ជាសាច់ញាតិ បានអង្គុយផឹកស្រាបៀរ ជាមួយឈ្មោះ ហេង សុវណ្ណារ៉ា ចំណែកនាងជាប្រពន្ធបានទៅចូលរួមក្នុងពិធីជប់លៀងមង្គលការគេ ។
តាមសាច់ញាតិឱ្យដឹងថា កូនស្រីចិញ្ចឹមឈ្មោះ រចនា ដែលនៅក្នុងហាងលក់គុយទាវ រហូតដល់ម៉ោង៧យប់ បានយកទូរស័ព្ទរបស់ឪពុកតេទៅម្ដាយ តែពំុមានការឆ្លើយតបនោះទេ ។ លុះកន្លះម៉ោងក្រោយមក នាងជាប្រពន្ធក៏នៅតែមិនទាន់ឃើញត្រឡប់មកពីហូបការគេវិញ កូនក៏បានយកទូរស័ព្ទចុចទៅជាច្រើនដងតែម្ដាយមិនទទូល ។ បន្ទាប់មក ហេង សុវណ្ណារ៉ា ជាប្ដីក៏យកទូរស័ព្ទតេទៅម្ដង ប្រពន្ធក៏មិនទទូល ។
លុះមួយម៉ោងក្រោយមកទើបឃើញនាងប្រពន្ធត្រឡប់មកផ្ទះវិញ ចុះពីលើរថយន្តតែម្នាក់ឯងហើយនិយាយបន្ទោស ទំនងបន្ទោសរឿងទូរស័ព្ទទៅមិនឈប់ឈរថា ម៉េចខ្លាចអញមិនស្គាល់ផ្ទះឬ ខណៈនោះបុរសជាប្តីឆ្លើយតបថា កូនស្រីរចនា ជាអ្នកតេទូរស័ព្ទទៅទេ ។
និយាយរួចនាងជាប្រពន្ធក៏ដើរចូលទៅក្នុងបន្ទប់ មួយសន្ទុះក្រោយមកប្ដីក៏ដើរចូលទៅតាម ។ ពេលនោះនៅក្នុងបន្ទប់ក៏មានឮសំឡេងឈ្លោះគ្នាខ្លាំងៗ និងឃើញប្តីដើរចេញពីបន្ទប់មក រួចក៏ដើរចូលទៅវិញ ហើយបានឈ្លោះប្រកែកគ្នារហូត មានការប្រតាយប្រតប់គ្នា ។
រីឯកូនប្រុសឈ្មោះ ដេវីត ដែលទៅរៀនធ្វើជាជាងជួសជុលរថយន្តបាននិយាយថា ដោយអស់កម្លាំងពេក ក៏ដេកលក់នៅក្នុងបន្ទប់បាត់ទៅ ដោយមិនបានដឹងពីរឿងឪពុកម្តាយឈ្លោះប្រកែកគ្នានោះទេ ស្រាប់តែឮសូរសំឡេងផ្ទុះកាំភ្លើងបន្លឺឡើងជាច្រើនគ្រាប់ ក៏ងើបពីដេកស្ទុះរត់ទៅមើល ស្រាប់តែឃើញឪពុក និងម្ដាយកំពុងតែប្រតាយប្រតប់គ្នា រូបគេក៏បានស្ទុះទៅចាប់ឱបឪពុកពីក្រោយ ស្រាប់តែឮសំឡេងផ្ទុះមួយគ្រាប់ទៀត ទើបដឹងថា ឪពុកបាញ់សម្លាប់ខ្លូនឯងចំក្បាលបន្ទាប់ពីបាញ់សម្លាប់ម្តាយរួច ។
ដោយសារតែការស្លុតរន្ធត់ក្នុងចិត្តកូនប្រុសបានដាក់ឪពុកទៅលើឥដ្ឋការូ៉ហើយក៏បានស្ទុះទៅមើលម្ដាយនៅមានសំឡេងក្រតៗ ក៏បានលើកម្តាយបីដាក់លើរថយន្តផ្ទាល់ខ្លូនដឹកទៅពេទ្យ ។ ពេលទៅដល់មន្ទីរពេទ្យទើបគ្រូពេទ្យបានប្រាប់ថា ម្តាយបានស្លាប់ទៅហើយ ។
ក្រោយទទួលព័ត៌មាននេះ កម្លាំងជំនាញនគរបាលបច្ចេកទេសសហការជាមួយកម្លាំងអធិការនគរបាលក្រុងស្ទឹងសែន និងអាជ្ញាធរដែនដី បានចុះដល់កន្លែងកើតហេតុ ដោយប្រមូលបានវត្ថុតាងអាវុធខ្លីមួយដើមម៉ាករ៉ូឡូ និងសម្បកចំនួនប្រាំគ្រាប់ដែលទើបបាញ់ថ្មីៗ ។
តាមការធ្វើកោសល្យវិច័យសាកសពបុរសជាប្ដីឈ្មោះ ហេង សុវណ្ណារ៉ា មានស្នាមត្រូវគ្រាប់កាំភ្លើងមួយគ្រាប់ លើសៀតផ្កាជាប់គុម្ពត្រចៀកស្ដាំ ។ ចំណែកសពប្រពន្ធឈ្មោះ ស៊ុន ពៅ មានស្នាមត្រូវគ្រាប់កាំភ្លើងចំនួន២គ្រាប់នៅលើដើមដោះខាងឆ្វេង និងលើបាតដៃស្ដាំ ។ បន្ទាប់ពីធ្វើកោសល្យវិច័យរួច សាកសពត្រូវបានប្រគល់ជូនក្រុមគ្រួសារចាត់ចែងធ្វើបុណ្យតាមប្រពៃណី ។ ពិតជារឿងរ៉ាវដែលស្មានមិនដល់មួយដោយសារតែបុរសជាប្តីមានគំនិតប្រចណ្ឌប្រពន្ធបានក្លាយជាមហាសោកនាដកម្មគួរឱ្យរន្ធត់បែបនេះ ៕
ចែករំលែកព័តមាននេះ