រាជធានីភ្នំពេញ ៖ មន្ត្រីជាន់ខ្ពស់ធនាគារជាតិនៃកម្ពុជា បានអះអាងថា រយៈពេលប៉ុន្មានឆ្នាំមកនេះ ធនាគារក្រៅប្រទេសបានចូលមកបណ្ដាក់ទុន និងស្នើសុំធ្វើប្រតិបត្តិការអាជីវកម្មជាធនាគារពាណិជ្ជកម្មក្នុងប្រទេសកម្ពុជាជាបន្តបន្ទាប់ ហើយធនាគារជាតិក៏បានត្រួតពិនិត្យ និងផ្ដល់អាជ្ញាប័ណ្ណជូនទៅតាមលក្ខខណ្ឌរបស់ពួកគេផងដែរ ។…
រាជធានីភ្នំពេញ ៖ មន្ត្រីជាន់ខ្ពស់ធនាគារជាតិនៃកម្ពុជា បានអះអាងថា រយៈពេលប៉ុន្មានឆ្នាំមកនេះ ធនាគារក្រៅប្រទេសបានចូលមកបណ្ដាក់ទុន និងស្នើសុំធ្វើប្រតិបត្តិការអាជីវកម្មជាធនាគារពាណិជ្ជកម្មក្នុងប្រទេសកម្ពុជាជាបន្តបន្ទាប់ ហើយធនាគារជាតិក៏បានត្រួតពិនិត្យ និងផ្ដល់អាជ្ញាប័ណ្ណជូនទៅតាមលក្ខខណ្ឌរបស់ពួកគេផងដែរ ។ ការកើនឡើងនៃធនាគារបរទេសនេះ ស្ដែងឲ្យឃើញពីការផ្ដល់ទំនុកចិត្តមកលើវិស័យហិរញ្ញវត្ថុរបស់កម្ពុជា ពិសេសក្រោមការដឹកនាំប្រកបដោយគតិបណ្ឌិតរបស់ប្រមុខរាជរដ្ឋាភិបាលកម្ពុជា ។
អគ្គនាយកត្រួតពិនិត្យធនាគារជាតិនៃកម្ពុជាលោក រ័ត្ន សុវណ្ណនរៈ បានមានប្រសាសន៍ថា វត្តមានរបស់សាខាធនាគារក្រៅប្រទេសនៅកម្ពុជា បានបង្ហាញពីជំនឿទុកចិត្តគាំទ្រ និងការរួមចំណែកកាន់តែច្រើនរបស់វិនិយោគិនក្រៅប្រទេស មកលើការអភិវឌ្ឍវិស័យធនាគារ និងហិរញ្ញវត្ថុនៅកម្ពុជា ដែលជាទិសដៅមួយនៃគោលនយោបាយរបស់រាជរដ្ឋាភិបាលក្នុងការជំរុញកំណើនសេដ្ឋកិច្ចជាតិ ។ លោកបន្ដថា ៖« ពួកគេមានជំនឿជាក់ទៅលើការដឹកនាំរបស់រាជរដ្ឋាភិបាលក្នុងការរក្សាបាននូវស្ថិរភាពម៉ាក្រូសេដ្ឋកិច្ច និងបានមើលឃើញពីភាពរឹងមាំនៃវិស័យធនាគារនិងហិរញ្ញវត្ថុនៅកម្ពុជា ដែលជំរុញឲ្យពួកគេបន្ដចូលមកបណ្ដាក់ទុនវិនិយោគជាបន្ដបន្ទាប់ »។
លោកបន្តថា វិស័យធនាគារនៅក្នុងប្រទេសកម្ពុជា កំពុងបន្តរីកចម្រើនទាំងទំហំ និងវិសាលភាពប្រកបដោយសមភាព និងបរិយាប័ន្ន ក្នុងនោះ ប្រាក់បញ្ជើក្នុងប្រពន្ធ័ធនាគារបានកើនឡើង២២% ខណៈឥណទានក៏មានកំណើនប្រមាណ២១%ផងដែរ ។ លោកថា ៖« ក្នុងនាមជាអាជ្ញាធររូបិយវត្ថុ ធនាគារជាតិនៃកម្ពុជា បានរួមចំណែកយ៉ាងសកម្ម ក្នុងការស្ដារស្ថិរភាពម៉ាក្រូសេដ្ឋកិច្ច ហើយធនាគារនៃកម្ពុជា បានបន្តពង្រឹងការត្រួតពិនិត្យ និងបទប្បញ្ញត្តិនានា យ៉ាងយកចិត្តទុកដាក់ សំដៅដល់ការធានាបាននូវភាពរឹងមាំនៃប្រពន្ធ័ធនាគារ និងហិរញ្ញវត្ថុទាំងមូល » ។
លោក Kim Do Jin ប្រធានក្រុមប្រឹក្សាធនាគាររបស់សាធារណរដ្ឋកូរ៉េ ដែលកំពុងបើកប្រតិបត្តិការអាជីវកម្មរបស់ខ្លួននៅកម្ពុជា បានឲ្យដឹងថា ការចូលមកធ្វើប្រតិបត្តិការរបស់ខ្លួននៅក្នុងប្រទេសកម្ពុជានាពេលនេះ ដើម្បីទ្រទ្រង់ដល់ក្រុមហ៊ុននានារបស់កូរ៉េ ដែលកំពុងបណ្ដាក់ទុនរកស៊ីនៅក្នុងប្រទេសកម្ពុជា និងអាជីវកម្មក្នុងស្រុក ដើម្បីចូលរួមចំណែកដល់ការអភិវឌ្ឍប្រទេសកម្ពុជា ។ លោកបន្តថា ៖« ក្នុងនាមជាធនាគាររដ្ឋមួយរបស់សាធារណរដ្ឋកូរ៉េ ដែលបានទទួលអាជ្ញាប័ណ្ណធ្វើអាជីវកម្មនៅក្នុងប្រទេសកម្ពុជា នឹងផ្ដល់នូវសេវាកម្មហិរញ្ញវត្ថុ ដោយទំនួលខុសត្រូវខ្ពស់ ដើម្បីគាំទ្រ និងជំរុញលើកទឹកចិត្តដល់អាជីវកម្មខ្នាតតូច ក្រោមគោលដៅក្នុងការជំរុញកំណើនសេដ្ឋកិច្ចជាតិ និងបង្កើតការងារបន្ថែមដល់ពលរដ្ឋកម្ពុជា »។
បើតាមអ្នកជំនាញហិរញ្ញវត្ថុ បានលើកឡើងថា ធនាគារក្រៅប្រទេសដែលធ្វើប្រតិបត្តិការនៅក្នុងប្រទេសកម្ពុជា គឺដើម្បីគាំទ្រដល់ក្រុមហ៊ុនរបស់គេដែលកំពុងធ្វើអាជីវកម្មនៅក្នុងប្រទេសនេះដូចគ្នា ។ ជាក់ស្ដែងធនាគារតៃវ៉ាន់ដែលបើកនៅកម្ពុជា គឺដើម្បីគាំទ្រអាជីវកម្មរបស់វិនិយោគិនតៃវ៉ាន៉, ធនាគារហុងកុង គាំទ្រដល់វិនិយោគិនហុងកុង ហើយធនាគារកូរ៉េ ដែលមកបើកនៅស្រុកខ្មែរ ក៏ដើម្បីគាំទ្រដល់អាជីវកម្ម និងមុខរបររបស់វិនិយោគិនកូរ៉េនៅក្នុងប្រទេសកម្ពុជាផងដែរ ។
យោងតាមរបាយការណ៍ធនាគារជាតិនៃកម្ពុជា ក្នុងដំណាច់ឆមាសទី១ ឆ្នាំ២០១៨ ធនាគារពាណិជ្ជដែលកំពុងធ្វើប្រតិបត្តិការនៅកម្ពុជា មានចំនួន៣៩ ក្នុងនោះធនាគារពាណិជ្ជមកពីបរទេសមានចំនួន១២ បូកជាមួយធនាគារថ្មីរបស់កូរ៉េមួយទៀតឡើងដល់១៣ ខណៈធនាគារពាណិជ្ជក្នុងស្រុកមានចំនួន១២ និង បុត្រសម្ព័ន្ធធនាគារចំនួន១៥ ។ ក្រៅពីធនាគារពាណិជ្ជ និងក៏មានធនាការឯកទេសចំនួន១៥ផងដែរ ហើយមិនត្រឹមតែប៉ុណ្ណោះ ក៏មានគ្រឹះស្ថានមីក្រូហិរញ្ញវត្ថុចំនួន៧៧ផងដែរដែលកំពុងធ្វើប្រតិបត្តិការផ្ដល់ឥណទាន និងសេវាហិរញ្ញវត្ថុផ្សេងៗនៅកម្ពុជា ក្នុងនោះគ្រឹះស្ថានមីក្រូហិរញ្ញវត្ថុចំនួន៧មានអាជ្ញាប័ណ្ណទទួលប្រាក់បញ្ញើ និងគ្រឹះស្ថានផ្ដល់ឥណទានជនបទជាច្រើនទៀត ៕
ចែករំលែកព័តមាននេះ