ខេត្តព្រះវិហារ ៖ អាជ្ញាធរខេត្តព្រះវិហារ បានសម្រេចជ្រើសយករចនាបថគោបុរៈទី៥នៃប្រាសាទព្រះវិហារ សម្រាប់សាងសង់រង្វង់មូលទីប្រជុំជន ឃុំស្រឯម ស្រុកជាំក្សាន្ត ។ ការសង់រង្វង់មូលនេះក្នុងគោលបំណងកែលំអសោភ័ណភាពទីប្រជុំជនមួយនេះឲ្យកាន់តែស្រស់ស្អាត ទាក់ទាញភ្ញៀវទេសចរជាតិ-អន្តរជាតិ ទៅកម្សាន្តនៅរមណីយដ្ឋានវប្បធម៌ប្រវត្តិសាស្ត្រប្រាសាទព្រះវិហារកាន់តែច្រើនឡើង ។
ក្នុងពិធីបញ្ចុះបឋមសិលាសាងសង់រង្វង់មូលកាលពីរសៀលថ្ងៃទី១១ខែធ្នូឆ្នាំ២០១៨ លោកមាស សុភា ទេសរដ្ឋមន្ត្រីទទួលបន្ទុកបេសកកម្មពិសេសលើកិច្ចការមីន យុទ្ធភណ្ឌមិនទាន់ផ្ទុះ និងវិស្វកម្មកងយោធពលខេមរភូមិន្ទ ថ្លែងថា សម្រាប់ខេត្តព្រះវិហារដែលជាខេត្តមួយនៅតាមបណ្តោយព្រំដែន មានព្រំប្រទល់ជាប់ប្រទេសថៃ និងប្រទេសឡាវក៏មានការអភិវឌ្ឍរីកចម្រើនដូចខេត្តក្រុងនានាទូទាំងប្រទេសដែរ ។
លោកអ៊ុន ចាន់ដា អភិបាលខេត្តព្រះវិហារ ថ្លែងថាការជ្រើសយករចនាបថគោបុរៈទី៥ នៃប្រាសាទព្រះវិហារ សម្រាប់សាងសង់រង្វង់មូលទីប្រជុំជនឃុំស្រឯម ស្រុកជាំក្សាន្ត ខេត្តព្រះវិហារ មិនត្រឹមតែបានកែលំអ សោភ័ណភាពទីប្រជុំជនមួយនេះកាន់តែស្រស់ស្អាតប៉ុណ្ណោះទេ ម្យ៉ាងទៀតនោះដើម្បីបង្ហាញតម្លៃនៃបេតិកភណ្ឌពិភពលោក និងភាពលេចធ្លោនៃរចនាបថគោបុរៈទី៥នៃប្រាសាទព្រះវិហារ កាន់តែទាក់ទាញការចាប់អារម្មណ៍ដល់អ្នកដំណើរឆ្លងកាត់ និងភ្ញៀវទេសចរជាតិអន្តរជាតិ ទៅស្នាក់នៅឃុំស្រឯម និងកម្សាន្តនៅរមណីយដ្ឋានវប្បធម៌ប្រវត្តិសាស្ត្រប្រាសាទព្រះវិហារកាន់តែច្រើនឡើង ។
លោកសំ លាងទ្រី ប្រធានមន្ទីរសាធារណការនិងដឹកជញ្ជូនខេត្តព្រះវិហារ ឲ្យដឹងថា ការសាងសង់រង្វង់មូលស្រអែមថ្មីនេះ គឺជាការផ្តួចផ្តើមឡើងក្រោមការដឹកនាំរបស់លោកអ៊ុន ចាន់ដា ហើយបានការឧបត្ថម្ភពីថ្នាក់ដឹកនាំ និងសប្បុរសជននានាក្នុងខេត្តព្រះវិហារ ។ ក្រៅពីនេះសិមិទ្ធផលជាច្រើនត្រូវបានកើតឡើងដូចជាផ្លូវភ្លោះនៅក្នុងទីរួមខេត្ត រង្វង់មូលតម្កល់រូបសំណាកអ្នកសច្ចំភ្នំត្បែង(លោកតាសួង)នៅស្រុកគូលែន ជាដើម ។
ប៉ុន្មានឆ្នាំចុងក្រោយនេះខេត្តព្រះវិហារមានការអភិវឌ្ឍជាបន្តបន្ទាប់ និងប្រែក្លាយពីខេត្តដែលស្ងប់ស្ងាត់ ប្រែទៅខេត្តដែលមានសភាពអ៊ូអរជាងមុន ៕
ចែករំលែកព័តមាននេះ