ខេត្តកណ្តាល ៖ ជនសង្ស័យជាមុខសញ្ញាជួញដូរគ្រឿងញៀន២នាក់ រួមនឹងថ្នាំញៀនចំនួន៥កញ្ចប់ធំ ត្រូវបាននគរបាលស្រុកកោះធំបង្ក្រាប ដឹកនាំដោយលោកវរសេនិយ៍ឯក ស៊ឹម ឃាង អធិការនគរបាលស្រុកកោះធំ បន្ទាប់ពីបានទទួលបានព័ត៍មានពីប្រជាពលរដ្ឋរាយការណ៍មកថា មានមុខសញ្ញាជួញដូរថ្នាំញៀនយ៉ាងសកម្មក្នុងមូលដ្ឋាន ។
ប្រតិបត្តិការចុះបង្ក្រាបនេះបានធ្វើឡើងកាលពីវេលាម៉ោង២និង៤០នាទីរសៀលថ្ងៃទី១៣ ខែធ្នូ ឆ្នាំ២០១៨ ចំណុច ភូមិកំពង់សំបួរ ឃុំព្រែកថ្មី ស្រុកកោះធំ ខេត្តកណ្តាល ។
ជនសង្ស័យទាំង២នាក់ខាងលើ ម្នាក់ឈ្មោះសេង រ៉ា ភេទប្រុស អាយុ២៧ឆ្នាំ មុខរបរមិនពិតប្រាកដ មានទីលំនៅភូមិព្រែកតាឡាច ឃុំជ្រោយតាកែវ ស្រុកកោះធំ ខេត្តកណ្តាល និងម្នាក់ទៀតឈ្មោះខត សឿន ភេទប្រុស អាយុ ២៧ ឆ្នាំ មុខរបរមិនពិតប្រាកដ មានទីលំនៅភូមិព្រែកតាឡាច ឃុំជ្រោយតាកែវ ស្រុកកោះធំ ខេត្តកណ្តាល ។
សមត្ថកិច្ចដកហូតបានវត្ថុតាងរួមមាន ថ្នាំញៀនម៉ាទឹកកក ice ចំនួន៥កញ្ចប់ធំ ម៉ូតូម៉ាកហុងដា ធុនC125 ពណ៍ខ្មៅ ស៊េរីឆ្នាំ២០១៨ ពាក់ស្លាកលេខ កណ្តាល ១X-០៨៦២ ទូរសព្ទ័ដៃចំនួន៤គ្រឿង និងកាបូបដៃតូច១ ពណ៌ក្រហម ។
បន្ទាប់ពីលោកវរសេនីយ៍ឯក សុម ឃាង អធិការ នគរបាលស្រុកកោះធំ បានទទួលបានព័ត៌មានពីប្រជាពលរដ្ឋ រាយការណ៍មកថាមានមុខសញ្ញាជួញដូរថ្នាំញៀនយ៉ាងសកម្ម ពេលនោះលោកបានបញ្ជាអោយកម្លាំងជំនាញប្រឆាំងបទល្មើសគ្រឿងញៀនចុះសហការជាមួយនឹងកម្លាំងជំនាញនគរបាលយុត្តិធម៌ និងប៉ុស្តិ៍នគរបាលជ្រោយតាកែវ និងប៉ុស្តិ៍ព្រែកថ្មី បានចុះល្បាតនឹងពួនស្ទាក់ចាប់មុខសញ្ញាជួញដូរថ្នាំញៀនយ៉ាងសកម្មនៅចំណុច ខាងលើ។
ក្រោយមកសមត្ថកិច្ចបានបញ្ជូនជនសង្ស័យទាំង២នាក់ខាងលើនេះរួមទាំងថ្នាំញៀនមកកាន់អធិការដ្ឋាននគរបាលស្រុកកោះធំ ។
នៅចំពោះមុខសមត្ថកិច្ច ជនសង្ស័យទាំង២នាក់ខាងលើនេះបានឆ្លើយសារភាពថា ថ្នាំញៀនចំនួន៥កញ្ចប់ធំគឺពួកខ្លួនបាននាំគ្នាទៅទិញពីអ្នកលក់ថ្នាំញៀនម្នាក់មិនស្គាល់ឈ្មោះ ភេទប្រុស អាយុប្រហែលជាង៣០ឆ្នាំ មិនស្គាល់ទីលំនៅច្បាស់លាស់នោះទេ ដោយបានណាត់ជួបគ្នានៅចំណុចគល់ស្ពានព្រែកសំរោង ក្រុងតាខ្មៅ ខេត្តកណ្តាល ដោយបានទិញថ្នាំញៀនក្នុងតម្លៃ១លាន២០ម៉ឺនរៀល ដើម្បីយកមកលក់ចែកចាយនៅក្នុងស្រុកកោះធំ។
បច្ចុប្បន្ន សមត្ថកិច្ចបានបញ្ជូនជនសង្ស័យខាងលើនេះរួមទាំងថ្នាំញៀនមកកាន់អធិការដ្ឋាននគរបាលស្រុកកោះធំ ដើម្បីសាកសួរ និងកសាងសំណុំរឿងទៅតាមនីតិវិធី៕
ចែករំលែកព័តមាននេះ