ខេត្តបន្ទាយមានជ័យ ៖ សេចក្តីរាយការណ៍បឋមឱ្យដឹងថា មានការភ្ញាក់ផ្អើល ក្រោយអ្នកស្រុកបានប្រទះសាកសពបុរសម្នាក់ អណ្តែតទឹកស្រះដែលគេជីកយកអាចម៍ដីលក់មួយកន្លែង កាលពីព្រឹកថ្ងៃទី១៤ ធ្នូ ស្ថិតក្នុងភូមិផ្សារកណ្តាល សង្កាត់ផ្សារកណ្តាល ក្រុងប៉ោយប៉ែត ។
សេចក្តីរាយការណ៍បន្តថា សាកសពត្រូវបានគេស្គាល់ ឈ្មោះពេជ្រ ជី អាយុ៥៦ឆ្នាំ ជាកម្មករសំណង់ ស្នាក់នៅក្នុងការដ្ឋានរោងចក្រ ក្នុងភូមិ-សង្កាត់កើតហេតុ និងមានទីលំនៅក្នុងឃុំម្កាក់ ក្រុងសិរីសោភ័ណ ខេត្តបន្ទាយមានជ័យ ។
បើតាមកម្មកររួមអាជីព ឈ្មោះជា សេ ភេទប្រុស អាយុ៣៦ឆ្នាំ ប្រាប់សមត្ថកិច្ចថា នៅវេលាម៉ោង០៥ទៀបភ្លឺថ្ងៃទី១២ ធ្នូ ខណៈគាត់ក្រោកបត់ជើងតូច បានឃើញជនរងគ្រោះរត់ចូលក្នុងស្រះ ។ ហើយភ្លាមៗនោះគាត់បានប្រាប់មេការសំណង់ថា ជនរងគ្រោះរត់ចុះក្នុងទឹកស្រះ ហើយមិនឃើញឡើងមកវិញទេ តែគ្មានអ្នកណាចាប់អារម្មណ៍ខ្វល់ឡើយ ។
លុះដល់ព្រឹកថ្ងៃទី១៤ ធ្នូ (ព្រឹកនេះ) ទើបឃើញសពអណ្តែតសពផ្អើលតែម្តង ។ ក្រោយទទួលបានសេចក្តីរាយការណ៍ សមត្ថកិច្ចជំនាញពាក់ព័ន្ធនិងគ្រូពេទ្យ បានចុះត្រួតពិនិត្យនិងធ្វើកោសល្យវិច្ច័យ ។ ជាលទ្ធផលសមត្ថកិច្ចប្រាប់ថា ជនរងគ្រោះស្លាប់ដោយលង់ទឹកមែន មិនពាក់ព័ន្ធករណីផ្សេងឡើយ ។
ចែករំលែកព័តមាននេះ