រាជធានីភ្នំពេញ ៖ ចោរឆក់ទូរស័ព្ទដៃយ៉ាងសកម្មម្នាក់ជាប់គុក២ដងមិនរាងចាល ចេញឆក់ទូរស័ព្ទដៃនារីម្នាក់មិនបានសម្រេចត្រូវបានប្រជាពលរដ្ឋឃាត់អោយសមត្ថកិច្ច បង្កអោយមានការភ្ញាក់ផ្អើលកាលពីវេលាម៉ោង៥និង៣០នាទីល្ងាច ថ្ងៃទី១៣ ខែធ្នូ ឆ្នាំ២០១៨ នៅចំណុចផ្លូវបេតុងជិតផ្សារឯករាជ្យ២ ភូមិព្រៃព្រីងខាងជើង១ សង្កាត់ចោមចៅទី៣ ខណ្ឌពោធិ៍សែនជ័យ ។
ជនសង្ស័យដែលឃាត់ខ្លួនបានមានឈ្មោះ ប៊ូ ខ្នុយ ភេទប្រុស អាយុ២៥ឆ្នាំ មុខរបរមិនពិតប្រាកដរស់នៅភូមិព្រៃព្រីងខាងជើង សង្កាត់ចោមចៅទី៣ ខណ្ឌពោធិ៍សែនជ័យ ។ ជនរងគ្រោះមានឈ្មោះ ឡាង ដុន ភេទស្រី អាយុ២៥ឆ្នាំ មុខរបរកម្មកររោងចក្រ ស្នាក់នៅភូមិព្រៃព្រីងខាងជើង២ ខណ្ឌពោធិ៍សែនជ័យ មានស្រុកកំណើតនៅស្រុកបាភ្នំ ខេត្តព្រៃវែង ។ ទូរស័ព្ទដែលជនសង្ស័យឆក់មិនបានសំរេច ម៉ាក OPPO ពណ៌ក្រហម តម្លៃ១៨០ដុល្លារ ។
តាមប្រភពព័ត៌មានពីសមត្ថកិច្ចប៉ុស្តិ៍ចោមចៅទី៣បានឱ្យដឹងថា នៅមុនពេលកើតហេតុជនរងគ្រោះកំពុងដើរនៅតាមផ្លូវបេតុងខាងលើដើរបណ្ដើរចុចទូរស័ព្ទលេងបណ្ដើរបន្ទាប់មកស្រាប់តែលេចមុខជនសង្ស័យខាងលើបានឆក់ទូរស័ព្ទធ្លាក់ជ្រុះដី ហើយជនសង្ស័យរើសទូរស័ព្ទរត់ក៏ត្រូវបានប្រជាពលរដ្ឋនាំគ្នាដេញឃាត់បានជនសង្ស័យភ្លាមៗផងដែររួចបានប្រគល់អោយសមត្ថកិច្ចតែម្តង ។
ប្រភពព័ត៌មានដដែលបានបន្តទៀតថា ខណៈនាំជនសង្ស័យយកទៅប៉ុស្តិ៍នគរបាលភ្លាមៗ លោកនាយប៉ុស្តិ៍ចោមចៅទី៣ បានសាកសួរជនសង្ស័យខាងលើ ហើយបានសារភាពប្រាប់ថា ជនសង្ស័យខាងលើធ្លាប់លួច និងឆក់រាប់មិនអស់ផងដែរហើយបានធ្លាប់ជាប់គុកនៅព្រៃសចំនួន២ដងរួចមកហើយ ។
ក្រោយពេលកើតហេតុសមត្ថកិច្ចប៉ុស្តិ៍ចោមចៅទី៣បានប្រគល់ទូរស័ព្ទអោយជនរងគ្រោះភ្លាមៗផងដែរ ចំណែកឯជនសង្ស័យត្រូវបានសមត្ថកិច្ចកសាងសំណុំរឿងបញ្ជូនទៅជំនាញផ្នែកព្រហ្មទណ្ឌខណ្ឌពោធិ៍សែនជ័យដើម្បីចាត់ការតាមនីតិវិធី ៕
ចែករំលែកព័តមាននេះ