រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានអះអាងថា ខេត្តកោះកុងកំពុងប្រែក្លាយខ្លួនជាតំបន់អភិវឌ្ឍមួយ កាន់តែមានសក្តានុពលតាមរយៈគម្រោងអភិវឌ្ឍនានា ។
សម្តេចបានលើកឡើងលើបណ្តាញសង្គម នៅថ្ងៃទី១៤ ធ្នូថា ខេត្តកោះកុងជាតំបន់ដែលមានសក្តានុពលខ្លាំងទាំងវិស័យទេសចរណ៍ និងការអភិវឌ្ឍទៅជាតំបន់ឧស្សាហកម្មដោយសារតែកត្តាភូមិសាស្ត្រអំណោយផលខ្លួនឯងផ្ទាល់ព្រំប្រទល់ជាប់ខេត្តព្រះសីហនុ ជាពិសេសមានព្រំប្រទល់ជាប់ប្រទេសថៃដែលជាច្រកដ៏សំខាន់មួយ ក្នុងការនាំទំនិញចេញចូលផងដែរ ។
សម្តេចបញ្ជាក់ថា បច្ចុប្បន្នមានមានវិនិយោគិនទាំងជាតិ និងអន្តរជាតិបានចំណាយលុយរាប់លានដុល្លារ ដើម្បីវិនិយោគគម្រោងអភិវឌ្ឍធំៗនៅខេត្តនេះផងដែរ ។ គម្រោងវិនិយោគធំៗជាច្រើនប្រែក្លាយខេត្តកោះកុងជាតំបន់អភិវឌ្ឍជាបន្តបន្ទាប់ ជាក់ស្តែងដូចជា គម្រោងទីក្រុងវិ ស្សមកាលទេសចរណ៍តារាសាគរនេះជាដើមដែលបានប្រមូលផ្តុំចម្រុះទៅដោយប្រព័ន្ធហេដ្ឋារចនាសម្ពន្ធសណ្ឋាគារផ្កាយ៥ខុនដូរ បឹងកាឡូ អគារការិយាល័យមជ្ឈមណ្ឌលពាណិជ្ជកម្មទីលានវាយកូនគោល និងសួនកម្សាន្តខ្នាតអន្តរជាតិជាដើម ។
សបញ្ជាក់ថា គម្រោងទីក្រុងវិស្សមកាលទេសចរណ៍នៅខេត្តកោះកុងដ៏ធំបែបនេះ គឺបានទាក់ទាញភ្ញៀវទេសចរណ៍កាន់តែច្រើនថែមទៀតមកកាន់កម្ពុជា ។ ខេត្តកោះកុងកំពុងប្រែក្លាយខ្លួនជា តំបន់អភិវឌ្ឍមួយកាន់តែមានសក្តានុពលតាមរយៈគម្រោងអភិវឌ្ឍនានា ។ ជាមួយគ្នានោះតាមរយៈកិច្ចសហប្រតិបត្តិការល្អតាមច្រកព្រំដែនកម្ពុជា-ថៃបានធ្វើឲ្យលំហូរទេសចរណ៍មានការកើនឡើងជាបន្តបន្ទាប់ ជាពិសេសបានប្រែក្លាយតំបន់ព្រំដែនទៅជាតំបន់ដែលមានសន្តិភាព និងការអភិវឌ្ឍជានិច្ច ។
ប្រភពហ្វេសប៊ុកបានលើកឡើងថា បច្ចុប្បន្នរាជរដ្ឋាភិបាលកំពុងតភ្ជាប់ប្រព័ន្ធហេដ្ឋារចនាសម្ព័ន្ធបន្ថែមទៀតធ្វើយ៉ាងណាឱ្យតំបន់នេះមានភាពងាយស្រួលក្នុងការដឹកជញ្ជូនទំនិញ ។ ដោយសារតែប្រទេសកម្ពុជាទទួលបាននូវសុខសន្តិភាពដែលបានធ្វើឲ្យវិនិយោគិនជាតិ និងអន្តរជាតិមកវិនិយោគជាបន្តបន្ទាប់ ជាពិសេសវិស័យអេកូទេសចរណ៍នេះដែលបានរួមចំណែកក្នុងការជំរុញកំណើនសេដ្ឋកិច្ច និងផ្ដល់ការងារដល់ពលរដ្ឋកម្ពុជាអោយមានជីវភាព កាន់តែល្អប្រសើរមកដល់សព្វថ្ងៃនេះ ។
សូមជម្រាបថា ការលើកឡើងរបស់ប្រមុខរាជរដ្ឋាភិបាលខណៈដែលគម្រោងទេចរណ៍វប្បធម៌កម្ពុជា-ចិនដ៏ធំនៅក្នុងទឹកដីខេត្តកោះកុងបានដាក់សម្ភោធឲ្យដំណើរការសាងសង់ ។ ការដាក់ដំណើរការគម្រោងនេះ ខណៈដែលនៅពេលបច្ចុប្បន្ននេះការវិវត្តិប្រកបដោយស្ថេរភាពនៃ «ខ្សែក្រវ៉ាត់ និងផ្លូវ» ពាណិជ្ជកម្ម និងការវិនិយោគរបស់ប្រទេសចិន និងកម្ពុជាកំពុងតែរក្សាកំណើនយ៉ាងខ្លាំង ។ នៅបច្ចុប្បន្ននេះដែរប្រទេសចិនបានក្លាយជាទៅជាដៃគូពាណិជ្ជកម្មក៏ ដូចជា ប្រភពនៃផលទុនបរទេសដែលធំបំផុតនៅកម្ពុជា ហើយប្រជាជនចិនដែលមកលេងកម្ពុជាកំពុងតែកើនឡើងរហូតអាចនឹងលើសពី១លាននាក់ ។
កិច្ចសហប្រតិបត្តិការ «ខ្សែក្រវ៉ាត់ និងផ្លូវ» បាននាំមកនូវឱកាសអភិវឌ្ឍន៍ថ្មីមួយមកកម្ពុជា ។ កម្ពុជាជាគោលដៅវិនិយោគចុងក្រោយនៅក្នុងតំបន់អាស៊ីអាគ្នេយ៍ជាគោលដៅយុទ្ធសាស្ត្រសំខាន់មួយនៅលើផ្លូវសូត្រសមុទ្រ ។ ក្នុងរយៈពេលប៉ុន្មានឆ្នាំចុងក្រោយនេះ ប្រទេសកម្ពុជាបានក្លាយទៅជាគោលដៅវិនិយោគដ៏សំខាន់មួយនៅក្នុងតំបន់អាស៊ីដែលជាការទាក់ទាញយ៉ាងខ្លាំងនូវផលទុនអន្តរជាតិ ៕
ចែករំលែកព័តមាននេះ