រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជាលោក សុខ ឥសាន បានសម្តែងក្តី សង្ឃឹមថា អតីតមន្ត្រីគណបក្សប្រឆាំងដែលត្រូវតុលាការហាមឃាត់ធ្វើនយោបាយចំនួន១១៨នាក់ ស្នើសុំនីតិសម្បទាធ្វើនយោបាយឡើងវិញ ។…
រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជាលោក សុខ ឥសាន បានសម្តែងក្តី សង្ឃឹមថា អតីតមន្ត្រីគណបក្សប្រឆាំងដែលត្រូវតុលាការហាមឃាត់ធ្វើនយោបាយចំនួន១១៨នាក់ ស្នើសុំនីតិសម្បទាធ្វើនយោបាយឡើងវិញ ។
ការលើកឡើងនេះ បន្ទាប់ពីលោក សម រង្ស៊ី អតីតប្រធានគណបក្សសង្គ្រោះជាតិបានអំពាវនាវកុំឲ្យអតីតមន្ត្រី១១៨នាក់ របស់គណបក្សសង្គ្រោះជាតិដែលតុលាការកំពូលហាមឃាត់មិនឲ្យធ្វើនយោបាយទទួល យកនីតិសម្បទាក្នុងការធ្វើនយោបាយឡើងវិញនោះទេ ។ យ៉ាងណាក្តីការលើកឡើងរបស់លោក សម រង្ស៊ី នេះត្រូវបានលោក សុខ ឥសាន អះអាងថា ជាឧបាយកលនយោបាយកាងរបស់លោក សម រង្សី ។
លោក សុខ ឥសាន បានឲ្យដឹងនៅថ្ងៃទី១៤ ធ្នូថា ឆ្លងកាត់ការធ្វើនយោបាយជាងម្ភៃឆ្នាំមក ហើយទណ្ឌិត សម រង្ស៊ី នៅសល់តែគូទខោ និងឯកកោកណ្តាលវាលវដ្តសង្សារគ្មានកោះត្រើយ ។ បរាជ័យប៉ុណ្ណឹងហើយ សម រង្ស៊ី នៅតែមានមហិច្ឆតាកាងនយោបាយទៀត ហើយ នៅតែចចេះប្រើឧបាយកលពិសពុលកេងអំណាច ។ លោកបញ្ជាក់ថា ប្រើល្បិចធ្វើបក្សប្រហារកាន់កាប់តំណែងជាប្រធានបក្ស ដើម្បីវ៉ាតទីការដឹកនាំបក្សទាំងទទឹងទិស ។ ប្រើល្បិចប្រកាសមិនចរចាជាមួយរាជរដ្ឋាភិបាលបំភាន់ភ្នែកអ្នកគាំទ្រខ្លួនកុំឲ្យមានទំនាក់ទំនងជាមួយរាជរដ្ឋាភិបាលកម្ពុជាតែខ្លួនឯងលួចទាក់ទងជាមួយប្រមុខរាជរដ្ឋាភិបាលតែម្នាក់ឯង ដោយតាងខ្លួនជាតំណាងផ្តាច់មុខ» ។ លោកបានបន្ថែមថា នៅពលដែលរដ្ឋសភាអនុម័តវិសោធនកម្មច្បាប់ស្តីពីគណបក្សនយោបាយ ដើម្បីបើកផ្លូវឲ្យមានការផ្តល់នីតិសម្បទានយោបាយដល់អ្នកជាប់បម្រាមស្រាប់តែទណ្ឌិតសម រង្ស៊ី ចេញមកគម្រាមមិនឲ្យអ្នក១១៨ដាក់ ពាក្យទទួលយកការលើកលែងបម្រាមនយោបាយទៅវិញចង់ទុកអ្នកទាំងនោះជាចំណាប់ខ្មាំងរបស់ខ្លួន ស្ថិតនៅក្រោមការសម្រេចរបស់ខ្លួនទៅវិញ ។
លោកបញ្ជាក់បន្ថែមថា ទោះបីខ្លួនអស់តួនាទីអ្វីនៅក្នុងបក្សក៏លោក សម រង្ស៊ី នៅតែចចេះធ្វើមុខក្រាស់នៅដណ្តើមតួនាទីដឹកនាំគេឯងដោយឥតអៀនខ្មាស់។តែទោះបីប្រើឧបាយកលយ៉ាងណាក៏ទណ្ឌិត សម រង្ស៊ី មិនអាចសម្រេចបានតាមចិត្តចង់នោះទេនៅទីបំផុតមន្ត្រីក្នុងចំណោម១១៨ជាច្រើននឹងប្រើសិទ្ធិរបស់គេម្នាក់ៗដាក់ពាក្យស្នើសុំនីតិសម្បទាធ្វើនយោបាយឡើងវិញ ដោយមិនខ្វល់នឹងឧបាយកលរារាំងរបស់ទណ្ឌិត សម រង្ស៊ី ឡើយដែលធ្វើឲ្យ នយោបាយកាងរបស់ទណ្ឌិត សម រង្ស៊ី ត្រូវបរាជ័យទាំងស្រុង ។
ការលើកឡើងរបស់អ្នកនាំពាក្យគណបក្សកាន់អំណាចនេះ បន្ទាប់ពីគេដឹងថា ក្រុមអ្នកគាំទ្រនយោបាយលោកកឹម សុខា គ្រោងនឹងដាក់ស្នើសុំនីតិសម្បទាធ្វើនយោបាយឡើងវិញតាម ច្បាប់អនុញ្ញាត ។ តាមមតិមហាជននាំគ្នាលើកឡើងថា ក្រុមលោក កឹម សុខា អាចនឹងត្រូវបានស្នើសុំនីតិសម្បទាធ្វើនយោបាយឡើងវិញព្រោះថា អ្នកនយោបាយដែលគាំទ្រលោក កឹម សុខា ភាគច្រើនបានគោរពសាលក្រមតុលាការកំពូល។
ចំណែកក្រុមអ្នកគាំទ្រលោក សម រង្ស៊ី វិញប្រហែលមិនស្នើសុំនីតិសម្បទានោះទេ ព្រោះថា ពួកគេស្តាប់ការអំពាវនាវរបស់លោក សម រង្ស៊ី ។ ជាងនេះអ្នកដែលគាំទ្រលោក សម រង្ស៊ី ភាគច្រើនមិនបានគោរពសាលក្រមតុលាការនោះទេ ៕
ចែករំលែកព័តមាននេះ