ខេត្តកំពត ៖ ស្ត្រីជនបរទេសម្នាក់បានលេបថ្នាំងងុយដេកអស់ជាច្រើនគ្រាប់ បណ្តាលឲ្យស្លាប់នៅលើគ្រែក្នុងបន្ទប់ស្នាក់នៅរបស់ខ្លួន ហើយបង្កឱ្យមានការភ្ញាក់ផ្អើលដល់ម្ចាស់ផ្ទះសំណាក់បានរាយការណ៍ទៅសមត្ថកិច្ចកាលពីវេលាម៉ោង៣និង១៥នាទីទៀបភ្លឺថ្ងៃទី១៤ ខែធ្នូ ឆ្នាំ២០១៨ ។
ផ្ទះសំណាក់កើតហេតុខាងលើឈ្មោះប៉ារីស ស្ថិតក្នុងភូមិ១ឧសភា សង្កាត់កំពង់កណ្តាល ក្រុងកំពត ខេត្តកំពត ។
ស្ត្រីរងគ្រោះដែលស្លាប់ឈ្មោះ SAUER LANDOVA RUZENA អាយុ៦៤ឆ្នាំ ជាជនជាតិឆេក ចំណែកប្តីស្ត្រីរងគ្រោះមានអាយុ៥៦ឆ្នាំ ជាជនជាតិអាលឺម៉ង់ ។ ជនបរទេសទាំង២នាក់ប្តីប្រពន្ធនេះទើបតែមកស្នាក់នៅកាលពីវេលាម៉ោង៦ល្ងាចថ្ងៃទី១៣ ធ្នូ ឆ្នាំ២០១៨ ម្សិលមិញនេះ។
ប្រភពព័ត៌មានពីសមត្ថកិច្ចដែលចុះទៅពិនិត្យហេតុការណ៍ និងសាកសួរព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុ កាលពីវេលាម៉ោងជាង១០យប់ថ្ងៃទី១៣ ធ្នូ ពីរនាក់ប្តីប្រពន្ធជាជនបរទេសខាងលើបានទាស់សម្តីគ្នា តែគេពុំបានចាប់អារម្មណ៍ថាពួកគាត់ទាស់សំដីគ្នារឿងអ្វីនោះទេ។
ប្រភពដដែលបានបន្តទៀតថា លុះដល់ម៉ោងជាង៣ទៀបភ្លឺថ្ងៃទី ១៤ ធ្នូ ទើបប្តីស្ត្រីរងគ្រោះបានប្រាប់ម្ចាស់ផ្ទះសំណាក់ថា ប្រពន្ធខ្លួនមិនដឹងកើតអ្វីទេបានសន្លប់មិនដឹងខ្លួន ទើបម្ចាស់ផ្ទះទូរសព្ទ័រាយការណ៍ទៅសមត្ថកិច្ច ពេលនោះសមត្ថកិច្ចក៏បានសហការជាមួយក្រុមគ្រូពេទ្យជំនាញមកពិនិត្យកន្លែងកើតហេតុ ក្រុមគ្រូពេទ្យបានប្រាប់ថាស្ត្រីរងគ្រោះបានស្លាប់បាត់បង់ជីវិតទៅហើយ ។
លុះដល់វេលាម៉ោង៦ព្រឹកថ្ងៃទី១៤ ធ្នូ ទើបកំលាំងសមត្ថកិច្ចជំនាញទៅពិនិត្យធ្វើកោសល្យវិច័យសព រកឃើញមានសំបកកញ្ចប់ថ្នាំលេបប្រភេទថ្នាំងងុយដេកចំនួន១០កញ្ចប់ ក្នុង១កញ្ចប់មានចំនួន១២គ្រាប់ ប៉ុន្តែមិនដឹងថាជនរងគ្រោះទើបតែលេបក្នុងពេលតែមួយនេះអស់ចំនួនប៉ុណ្ណឹង ឬបានលេបពីមុនខ្លះនោះទេ។
សមត្ថកិច្ចសន្និដ្ឋានថា ស្រ្តីរងគ្រោះពិតជាស្លាប់ដោយសារលេបថ្នាំហួសកំហិត។
សមត្ថកិច្ចបានបន្តថា បើតាមការសាកសួរពីប្តីស្ត្រីរងគ្រោះបានឱ្យដឹងថា កាលពីព្រលប់ គាត់និងប្រពន្ធបានទាស់សំដីគ្នាបន្តិចបន្ទួចដោយមិននឹកស្មានថាប្រពន្ឋខឹងដល់ថ្នាក់ហ្នឹងទេ ហើយថ្នាំដែលលេបនេះគឺពួកគាត់ទិញមកប្រើប្រាស់ទាំងពីរនាក់នៅពេលដេកមិនលក់ទើបលេប។
សពស្ត្រីរងគ្រោះ ត្រូវបានសមត្ថកិច្ចការិយាល័យជនបរទេសបានធ្វើការទំនាក់ទំនងទៅស្ថានទូតដើម្បីមកទទួលសពប្រគល់ជូនក្រុមគ្រួសាររៀបចំធ្វើបុណ្យតាមប្រពៃណី៕
ចែករំលែកព័តមាននេះ