ខេត្តរតនគិរី ៖ គោអ្នកភូមិចំនួន១១ក្បាលបានងាប់ ហើយមន្ត្រីជំនាញសង្ស័យថា អាចបណ្តាលមកពីប៊ីដុងដាក់ទឹកឱ្យគោផឹកចំណុះ៣០លីត្រមានជាតិពុល ។ ហេតុការណ៍ភ្ញាក់ផ្អើលពីគោងាប់នេះ បានកើតឡើងកាលពីល្ងាចថ្ងៃទី១១ ខែធ្នូ នៅភូមិតាំងជិ ឃុំញ៉ាង ស្រុកអណ្តូងមាស ។
ក្រោយពីមានគោងាប់អស់១១ក្បាល ប្រជាពលរដ្ឋក៏រាយការណ៍មកអាជ្ញាធរដែនដី និងសមត្ថកិច្ចនគរបាល រួមទាំងមន្ត្រីពេទ្យសត្វផងដែរ និងបានឱ្យអ្នកសារព័ត៌មានដឹងថា គោទាំង១១ក្បាល ដែលងាប់នោះមានមេ៩ក្បាល និងមានម្ចាស់៣គ្រួសារ ។ នៅពេលទទួលបានព័ត៌មានខាងលើ មន្ត្រីជំនាញបានធ្វើការត្រួតពិនិត្យនិងសាកសួរម្ចាស់គោឱ្យដឹងថា មុនពេលគោងាប់ជាច្រើនក្បាលនេះ ម្ចាស់គោបានចាក់ទឹកចេញ
ពីប៊ីដុងឱ្យគោផឹក រួចប្រមាណ២ម៉ោងក្រោយមក ស្រាប់តែគោប្រកាច់ងាប់ជាបន្តបន្ទាប់តែម្តង ។
បើតាមមន្ត្រីជំនាញសង្ស័យថា ប៊ីដុងដែលដាក់ទឹកឱ្យគោផឹកនោះមានជាតិពុល ទើបបណ្តាលឱ្យគោងាប់បែបនេះ និងសំណូមពរឱ្យប្រជាពលរដ្ឋមានការប្រុងប្រយ័ត្នខ្ពស់ មុននឹងប្រើប្រាស់សម្ភារដាក់ទឹកសម្រាប់ផឹកទាំងមនុស្សនិងសត្វ ។
តាមប្រភពព័ត៌មានថា ប៊ីដុងដែលសង្ស័យថា មានជាតិពុលនេះ មុនពេលដាក់ទឹកទុកឱ្យគោផឹក គឺគាត់បានទុកចោល១ឆ្នាំមកហើយ ។ ចំពោះប្រភពទឹកវិញ អ្នកភូមិបានប្រាប់ថា ជាទឹកអូរដែលប្រើប្រាស់ទាំងមនុស្សនិងសត្វ ដូច្នេះមិនមែនជាបញ្ហាទឹកនោះទេ គឺអាចជាបញ្ហាប៊ីដុង ដែលក្រុមអ្នកភូមិអាចប្រើដាក់ថ្នាំគីមីឬអ្វីមួយមុនពេលយកមកដាក់ទឹកឱ្យគោផឹក ៕
ចែករំលែកព័តមាននេះ