បន្ទាយមានជ័យ ៖ ខេត្តបន្ទាយមានជ័យឆ្នាំ២០១៨ ធ្វើការត្រួតពិនិត្យលក្ខណៈបច្ចេកទេសរថយន្ត (ឆៀកចល័ត) បានសរុបចំនួន៤.០០១គ្រឿង ដោយយោងតាមរបាយការណ៍អង្គភាពចុះបញ្ជីយានយន្ត និងប័ណ្ណបើកខេត្ត ។ លោក…
បន្ទាយមានជ័យ ៖ ខេត្តបន្ទាយមានជ័យឆ្នាំ២០១៨ ធ្វើការត្រួតពិនិត្យលក្ខណៈបច្ចេកទេសរថយន្ត (ឆៀកចល័ត) បានសរុបចំនួន៤.០០១គ្រឿង ដោយយោងតាមរបាយការណ៍អង្គភាពចុះបញ្ជីយានយន្ត និងប័ណ្ណបើកខេត្ត ។
លោក ជិន មណ្ឌល ប្រធានអង្គភាពចុះបញ្ជីយានយន្ត និងប័ណ្ណបើកខេត្តបន្ទាយមានជ័យបានប្រាប់ថា ដើម្បីកាត់បន្ថយគ្រោះថ្នាក់ចរាចរណ៍ និងជាការដាស់តឿនម្ចាស់អោយជួសជុលរថយន្ត និងណែនាំអោយថែទាំយានយន្តជាប្រចាំ និងរួមចំណែកថែរក្សាផ្លូវថ្នល់ដោយការកំណត់ទម្ងន់ផ្ទុក និងបច្ចេកទេសផ្ទុក ។
បានធ្វើជំរឿនរថយន្តដែលកំពុងប្រើប្រាស់ និងកាត់បន្ថយបទឧក្រិដ្ឋយានយន្តទប់ស្កាត់យានយន្តកែឆ្នៃខុសបច្ចេកទេស និងថែទាំបរិស្ថានដោយការកម្រិតសារធាតុពុលក្នុងផ្សែងយានយន្តនិងចំណាយថវិកា ។
លោកបានបញ្ជាក់ថា ជាក់ស្តែងដែលបានអនុវត្តធ្វើការត្រួតពិនិត្យលក្ខណៈបច្ចេកទេសរថយន្ត(ឆៀកចល័ត) ក្នុង១ថ្ងៃបានប្រមាណជិត១០០គ្រឿង ដែលធ្វើការត្រួតពិនិត្យបានចាប់ពីថ្ងៃទី១១ដល់១៣ ខែធ្នូ ឆ្នាំ២០១៨ បានប្រមាណជិត៣០០គ្រឿង ក្នុងនោះមានរថយន្តទេសចរណ៍ រថយន្តដឹកទំនិញធុនតូច រថយន្តដឹកអ្នកដំណើរធុនតូច រថយន្តដឹកអ្នកដំណើរធុនធំ សឺមីរឺម៉កនិងរ៉ឺម៉កសណ្តោង រថយន្តដឹកទំនិញធុនធំ ។
លោក ជិន មណ្ឌល បានបញ្ជាក់ថា ក្នុងអំឡុងឆ្នាំ២០១៨នេះខេត្តបន្ទាយមានជ័យត្រួតពិនិត្យលក្ខណៈបច្ចេកទេសរថយន្ត (ឆៀកចល័ត) ចាប់ពីថ្ងៃទី២៩ ខែមករា ឆ្នាំ២០១៨ ដល់ថ្ងៃទី១០ ខែតុលា ឆ្នាំ២០១៨នេះបានសរុបចំនួន៤.០០១គ្រឿង ។ រថយន្តមាន៦ប្រភេទមាន១- រថយន្តទេសចរណ៍ចំនួន៣.០២៨គ្រឿង ២-រថយន្តដឹកទំនិញធុនតូចមានចំនួន២០៧គ្រឿង ៣- រថយន្តដឹកអ្នកដំណើរធុនតូចមានចំនួន១៥៧គ្រឿង ៤-រថយន្តដឹកអ្នកដំណើរធុនធំមានចំនួន៦គ្រឿង ៥-សឺមីរឺម៉ក និងរ៉ឺម៉កសណ្តោងមានចំនួន២គ្រឿង ៦- រថយន្តដឹកទំនិញធុនធំមានចំនួន៦០១គ្រឿង ៕
ចែករំលែកព័តមាននេះ