រាជធានីភ្នំពេញ ៖ បុរសម្នាក់ជាអ្នកបើកបរម៉ូតូកង់បីឥណ្ឌាបានបើកក្នុងល្បឿនយ៉ាងលឿនគេចពីរថយន្តកុងតឺន័រដែលបើកភ្លើងហ្វាដាក់ រួចក៏ជ្រុលទៅបុកក្បាលនាគពុះចែកទ្រូងផ្លូវបណ្តាលអោយខូចខាតយ៉ាងដំណំ ដែលហេតុការណ៍នេះបានកើតឡើងកាលពីវេលាម៉ោង២និង១៥នាទីរំលងអាធាត្រឈានចូលថ្ងៃទី១៤ ខែធ្នូ ឆ្នាំ២០១៨ តាមបណ្តោយផ្លូវសហព័ន្ធរុស្សី នៅចំណុចក្តាន់ពីរ ស្ថិតនៅក្នុងសង្កាត់ស្រះចក ខណ្ឌដូនពេញ ។
សាក្សីដែលឃើញហេតុការណ៍បានអោយដឹងថា មុនពេលកើតហេតុ គេឃើញបុរសម្នាក់ជាអ្នកបើកបរម៉ូតូកង់បីឥណ្ឌា ពណ៌ស ធ្វើដំណើរមកតាមបណ្តោយផ្លូវសហព័ន្ធរុស្សីក្នុងទិសដៅពីកើតទៅលិច លុះពេលបើកមកដល់ចំណុចកើតហេតុខាងលើនេះស្រាប់តែមានរថយន្តកុងតឺន័រមួយគ្រឿងបើកបរបញ្ច្រាសទិសដៅគ្នា ហើយបើកភ្លើងហ្វា ធ្វើឱ្យចាំងភ្នែកអ្នកបើកបរម៉ូតូកង់បីឥណ្ឌាមើលអី្វអត់ឃើញ ក៏រេចង្កូតទៅបុកក្បាលនាគពុះចែកទ្រូងផ្លូវបណ្តាលអោយរងការខូចខាតម៉ូតូកង់បីឥណ្ឌាអស់មួយចំហៀងខាងស្តាំ និងបែកកញ្ចក់ខាងមុខរងរបួសស្រាល ចំណែកឯទ្រូងផ្លូវរងការខូចខាតតិចតួច ។
ក្រោយពេលកើតហេតុ ជនរងគ្រោះត្រូវបានមិត្តភក្តិជូនទៅមន្ទីរពេទ្យក្បែរនោះ ចំណែកឯម៉ូតូកង់បីឥណ្ឌា សមត្ថកិច្ចចរាចរណ៍បានមកដល់ពិនិត្យមើលទៅឃើញថាមិនមានខូចខាតទ្រូងផ្លូវក៏អោយម្ចាស់យកទៅជួសជុលដោយខ្លួនឯង ៕
ចែករំលែកព័តមាននេះ