រាជធានីភ្នំពេញ ៖ សេចក្តីរាយការណ៍ឲ្យដឹងថា កាលពីវេលាម៉ោងប្រមាណជិត៧យប់ថ្ងៃទី១៣ ធ្នូ ចៅក្រមស៊ើបសួរសាលាដំបូងរាជធានីភ្នំពេញ បានសម្រេចឃុំខ្លួនជនសង្ស័យម្នាក់ដាក់ពន្ធនាគារព្រៃសពាក់ព័ន្ធករណីផលិតខ្សែវីដេអូរឿង «ម្តាយខ្ញុំលក់ខ្ញុំ» ។ ជនសង្ស័យមានឈ្មោះ…
រាជធានីភ្នំពេញ ៖ សេចក្តីរាយការណ៍ឲ្យដឹងថា កាលពីវេលាម៉ោងប្រមាណជិត៧យប់ថ្ងៃទី១៣ ធ្នូ ចៅក្រមស៊ើបសួរសាលាដំបូងរាជធានីភ្នំពេញ បានសម្រេចឃុំខ្លួនជនសង្ស័យម្នាក់ដាក់ពន្ធនាគារព្រៃសពាក់ព័ន្ធករណីផលិតខ្សែវីដេអូរឿង «ម្តាយខ្ញុំលក់ខ្ញុំ» ។
ជនសង្ស័យមានឈ្មោះ រ៉ាត់ រ័ត្នមុនី ភេទប្រុស អាយុ៤៧ឆ្នាំ មុខរបរជាប្រធានសហជីពកម្មករសំណង់ ដែលមានមូលដ្ឋាននៅប្រទេសថៃ មានទីលំផ្ទះជួលម្តុំវត្តអង្គតាម៉ិញ ខណ្ឌពោធិសែនជ័យ រាជធានីភ្នំពេញ និងមានស្រុកកំណើតនៅភូមិឆាយរំពាត់ ឃុំកន្ទី ស្រុកបាណន់ ខេត្តបាត់ដំបង ។
សូមបញ្ជាក់ថា កាលពីរសៀលថ្ងៃទី១៣ ធ្នូ កម្លាំងសមត្ថកិច្ចនគរបាលនាយកដ្ឋានប្រឆាំងការជួញដូរមនុស្ស និង ការពារអនីតិជនក្រសួងមហាផ្ទៃបាននាំខ្លួនប្រធានសហជីពកម្មករសំណង់ដែលមានមូលដ្ឋាននៅប្រទេសថៃរូបនេះមកកាន់សាលាដំបូងរាជធានីភ្នំពេញដើម្បីធ្វើការសាកសួរពាក់ព័ន្ធលើសំណុំរឿងផលិតខ្សែវីដេអូររឿង «ម្ដាយខ្ញុំលក់ខ្ញុំ» ។
ជនសង្ស័យត្រូវបានកម្លាំងសមត្ថកិច្ចនាយកដ្ឋាននគរបាលសន្តិសុខផ្ទៃក្នុងក្រសួងមហាផ្ទៃសហការជាមួយអាជ្ញាធរថៃចាប់ខ្លួននៅប្រទេសថៃដែលជនសង្ស័យបាន និងកំពុងរៀបចំធ្វើវីសារចេញដំណើរទៅកាន់ប្រទេសទី៣(ហូឡង់) ។
ជនសង្ស័យត្រូវបានសមត្ថកិច្ចសហការនាំខ្លួនតាមច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ កាលពីវេលាយប់ថ្ងៃទី១២ ធ្នូ និងបានបន្តនាំមកកាន់ក្រសួងមហាផ្ទៃម៉ោង១២យប់ជ្រៅ ។ លុះព្រឹកថ្ងៃទី១៣ ធ្នូ កម្លាំងនាយកដ្ឋានសន្តិសុខផ្ទៃក្នុងបានប្រគល់ជនសង្ស័យឲ្យទៅនាយកដ្ឋានប្រឆាំងការជួញដូរមនុស្ស និងការពារអនីតិជនដែលជាម្ចាស់ករណីដើម្បីបន្តនីតិវិធី ។
ទើបរសៀលថ្ងៃដដែលនេះកម្លាំងនាយកដ្ឋានប្រឆាំងការជួញដូរមនុស្ស និងការពារអនីតិជនបានបញ្ជូនខ្លួនជនសង្ស័យទៅកាន់សាលាដំបូងរាជធានីភ្នំពេញដោយមានការរៀបចំយ៉ាងប្រុងប្រយ័ត្នខ្ពស់ ពោលគឺជនសង្ស័យដឹកតាមរថយន្ត១គ្រឿង ចូលដល់ក្នុងបរិវេណសាលាដំបូងតែម្តង ។
នៅពេលចូលដល់សាលាដំបូងជនសង្ស័យត្រូវបានសមត្ថកិច្ចនាំឡើងយ៉ាងលឿនទៅកាន់បន្ទប់លោក ខៀវ ផល្លា ព្រះរាជអាជ្ញារដែលកាន់សំណុំរឿងនេះដើម្បីធ្វើការសាកសួរ ។ ការសាកសួរជនសង្ស័យនៅដំណាក់កាលស្ថាប័ន បានប្រើពេលវេលាច្រើនម៉ោងទើបមានការចោទប្រកាន់ជាផ្លូវការណ៍ និងបានចាត់បញ្ជូនទៅចៅក្រមស៊ើបសួររហូតដល់ម៉ោងប្រមាណជិត៧យប់ថ្ងៃដដែលចៅក្រមស៊ើបសួរបានសម្រេចឃុំខ្លួនជនសង្ស័យដាក់ពន្ធនាគារព្រៃសជាបណ្តោះអាសន្ត ៕
https://www.facebook.com/NokorKoktlork/videos/1827165774072926/
ចែករំលែកព័តមាននេះ