ខេត្តព្រះសីហនុ ៖ ក្រុមយុវជនឈាមរាវពាក់ព័ន្ធអំពើរចោរកម្មចំនួន០៧នាក់ដែលបានឃាត់ខ្លួនក្នុងបទល្មើសចំនួន០២ផ្សេងគ្នានារសៀលថ្ងៃទី១២ ខែធ្នូ ឆ្នាំ២០១៨ ត្រូវបានសមត្ថកិច្ចបង្ហាញមុខមុននឹងបញ្ជូនទៅកាន់សាលាតំបូងខេត្ត ។ ជុំវិញករណីបង្ក្រាបបាននូវក្រុមចោរកម្មវ័យក្មេងឆ្លងដែនមកពីភ្នំពេញនេះលោកវរសេនីយ៏ទោ លី សុខហ៊ី…
ខេត្តព្រះសីហនុ ៖ ក្រុមយុវជនឈាមរាវពាក់ព័ន្ធអំពើរចោរកម្មចំនួន០៧នាក់ដែលបានឃាត់ខ្លួនក្នុងបទល្មើសចំនួន០២ផ្សេងគ្នានារសៀលថ្ងៃទី១២ ខែធ្នូ ឆ្នាំ២០១៨ ត្រូវបានសមត្ថកិច្ចបង្ហាញមុខមុននឹងបញ្ជូនទៅកាន់សាលាតំបូងខេត្ត ។
ជុំវិញករណីបង្ក្រាបបាននូវក្រុមចោរកម្មវ័យក្មេងឆ្លងដែនមកពីភ្នំពេញនេះលោកវរសេនីយ៏ទោ លី សុខហ៊ី នាយការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តព្រះសីហនុ បានអោយដឹងថា ជនសង្ស័យដែលសមត្ថកិច្ចបង្ហាញមុខនាពេលនេះគឺជាប់ពាក់ព័ន្ធបទល្មើសចំនួន២ផ្សេងគ្នា ។
បទល្មើសទី១នៅថ្ងៃទី០៧ ខែធ្នូ ឆ្នាំ២០១៨ វេលាម៉ោង ១១និង៥០នាទីយប់ ស្ថិតនៅចំណោទរ៉ា ភូមិ៣ សង្កាត់៣ ក្រុង-ខេត្តព្រះសីហនុ មានករណី អំពើលួចកាច់បំបែកសោ.កម៉ូតូមួយកើតឡើងបង្កឡើងដោយជនសង្ស័យ០៣នាក់មិនស្គាល់អត្តសញ្ញាណបានធ្វើសកម្មភាពកាច់បំបែកសោលួចយកម៉ូតូរបស់ជនរងគ្រោះដែលចតទុកនៅខាងមុខផ្ទះរួចគេចខ្លួនបាត់ ។
បន្ទាប់ពីទទួលបានបណ្តឹងរបស់ជនរងគ្រោះកម្លាំងជំនាញផែននគរបាលព្រហ្មទណ្ឌបានធ្វើការស្រាវជាវយ៉ាងយកចិត្តទុកដាក់រហូតឃាត់ខ្លួនបានជនសង្ស័យ និងបក្ខពួកសរុបចំនួន០៤នាក់ ។
ករណីទី០២ នៅថ្ងៃទី១១ ខែធ្នូ ឆ្នាំ២០១៨ វេលាម៉ោង១០និង៣០នាទីយប់ នៅចំណុចមុខកាស៊ីណូ ស៊ីហ៊ូ ស្ថិតនៅ ភូមិ១ សង្កាត់៣ ក្រុង-ខេត្តព្រះសីហនុ មានករណី អំពើលួចមានស្ថានទម្ងន់ទោស(ឆក់ទូរស័ព្ទដៃជនជាតិចិន)មួយកើតឡើងបង្កដោយជនសង្ស័យ០២នាក់ មិនស្គាល់អត្តសញ្ញាណជិះម៉ូតូ ០១គ្រឿងមិនស្គាល់ម៉ាក បានធ្វើសកម្មភាពឆក់ទូរស័ព្ទដៃរបស់ជនរងគ្រោះខណៈពេលដែលជនរងគ្រោះកំពុងដើរតាមហើយនិយាយទូរស័ព្ទ ។
បន្ទាប់ពីទទួលបានបណ្តឹងរបស់ជនរងគ្រោះ កម្លាំងជំនាញផែននគរបាលព្រហ្មទណ្ឌ បានសហការណ៍ជាមួយកម្លាំងអធិការដ្ឋាននគរបាលក្រុងព្រះសីហនុ និងកម្លាំងប៉ុស្តិ៍នគរបាលសង្កាត់៣ បានធ្វើការស្រាវជ្រាវយ៉ាងយកចិត្តទុកដាក់ រហូតឃាត់ខ្លួនបានជនសង្ស័យ និងបក្ខពួកសរុបចំនួន០៣នាក់ ៕
ចែករំលែកព័តមាននេះ