ចិន ៖ តាមប្រភពព័ត៌មាន Shanghaiist បានឲ្យដឹងថា បុរសម្នាក់បានចំណាយពេល៥០ថ្ងៃ ដើររកគ្រប់ហាងលក់សៀវភៅនៅក្នុងក្រុងប៉េកាំង ក្នុងគោលបំណងចង់ឃើញមនុស្សស្រីម្នាក់ ដែលខ្លួនចាប់ចិត្តស្រឡាញ់ដោយគ្រាន់តែទាក់ក្រសែភ្នែកមួយភ្លែត។
បុរសងាយលង់ស្នេហ៍ត្រកូល Sun មិនបាននិយាយគ្នាជាមួយនឹងនារីម្នាក់នោះទេ ព្រោះថាកាលពីថ្ងៃទី២៤ ខែកញ្ញា ពួកគេជួបគ្នាដោយចៃដន្យនៅក្នុងហាងលក់សៀវភៅ Wangfujing។ ខាងប្រុសគ្រាន់តែឃើញនារីម្នាក់នោះភ្លាម ក៏ចាប់ចិត្តស្រឡាញ់តាមរយៈខ្សែភ្នែក ដោយមិនបាននិយាយអ្វីឡើយ។ ដូចនេះហើយ ខាងប្រុសគ្មានសោះលេខទូរស័ព្ទខាងស្រី ហើយក៏មិនដឹងជាទៅរកនៅទីណាទៀតដែរ ប្រសិនបើចង់រក។
ដោយសារតែបែបនេះ Sun ក៏សម្រេចចិត្តដើររកមើលគ្រប់ខាងលក់សៀវភៅនៅក្នុងទីក្រុងប៉េកាំង ហើយអង្គុយនៅទីនោះពីម៉ោង ១១ព្រឹកដល់ម៉ោង៧យប់។ គេគ្មានការងារអ្វីធ្វើនោះទេ ហើយរាល់ថ្ងៃនេះគឺពឹងផ្អែកទៅលើការចាយលុយបំណុលខ្ចីពីគេ។
អ្វីដែលកាន់តែលើសនោះគឺថា Sun បានទៅប្តឹងតុលាការឲ្យស្វែងរកនារីម្នាក់ ដោយចោទប្រកាន់ថា បានធ្វើឲ្យរូបគេកើតទុក្ខពិបាកចិត្ត។ តែខាងតុលាការមិនព្រមទទួលពាក្យបណ្តឹងចម្លែកនេះទេ។
តើលោកអ្នកគិតយ៉ាងដូចម្តេចដែរ? មិនដឹងថាគួរអាណិត ឬ គួរឲ្យខ្លាចនោះទេ ចំពោះទង្វើបែបនេះ!
ចែករំលែកព័តមាននេះ