សារព័ត៌មានបរទេសផ្សាយថា មជ្ឈមណ្ឌលអភិរក្សកង់គូរូ«Alice Springs» ប្រទេសអូស្ត្រាលី បានប្រកាសឲ្យដឹងថា«Roger» ជាកង់គូរូមានសាច់ដុំធំអាយុ១២ឆ្នាំបានងាប់ហើយកាលពីថ្ងៃទី១០ ធ្នូ ២០១៨ ។ ចាត់ទុកថានេះជាការបាត់បង់ដ៏សំខាន់បំផុតរបស់មជ្ឈមណ្ឌល ។
បុគ្គលិកសួនសត្វបានបញ្ចុះRogerនៅក្នុងបរិវេណឧទ្យាន គឺចង់ឲ្យវាស្ថិតក្នុងការចងចាំជារៀងរហូត ។ ក្រោយពីបានបញ្ចុះរួចបុគ្គលិករូបនេះថ្លែងថា «គឺជាការបាត់បង់ដ៏សំខាន់មួយ វាជាក្មេងដ៏ល្អ» ។
ប្រវត្តិរបស់Roger គឺវាជាសត្វមានសភាពភាពគួរឲ្យចាប់អារម្មណ៍បំផុត ។ នៅក្នុងឆ្នាំ២០០៦ មេរបស់វាបានងាប់ព្រោះត្រូវរថយន្តបុក ធ្វើឲ្យវាត្រូវបញ្ជូនទៅថែរក្សានៅមជ្ឈមណ្ឌលអភិរក្ស«Alice Springs» និងចាត់ទុកថាជាកង់គូរូមានភាពលេចធ្លោជាងកង់គូរូទូទៅនៅលើពិភពលោក ។
ភាពលេចធ្លោនេះព្រោះវាមានរាងកាយពោរពេញដោយសាច់ដុំធំ មានកម្ពស់ជាង២ម៉ែត្រ និងទម្ងន់៨៩គីឡូក្រាម ។ វាចាប់ផ្ដើមល្បីនៅទូទាំងពិភពលោក ក្រោយពីមន្ត្រីក្នុងមជ្ឈមណ្ឌលអភិរក្សបានបង្ហាញរូបថត និងវីដេអូឃ្លីបរបស់វាតាមអីុនធើរណេតនៅក្នុងឆ្នាំ២០១៥ ។
លោកChris Barns អ្នកគ្រប់គ្រងមជ្ឈមណ្ឌលបានថ្លែងថា Rogerបានធំធាត់ជាកង់គូរូដែលមនុស្សនៅលើលោកស្រឡាញ់ ប៉ុន្តែនៅក្នុងឆ្នាំ២០១៦ វាបានប្រឈមមុខនឹងបញ្ហាសុខភាពមានទាំងជំងឺឈឺសន្លាក់ និងស្រវាំងភ្នែក រួមទាំងបានទទួលការថែទាំយ៉ាងដិតដល់ រស់នៅប្រកបដោយក្ដីសុខក្នុងពេលចុងក្រោយ» ៕
ចែករំលែកព័តមាននេះ