ខេត្តប៉ៃលិន ៖ កាលពីរសៀលថ្ងៃទី១០ ធ្នូ កន្លងទៅ សមត្ថកិច្ចបានចាប់ឃាត់ខ្លួនភិក្ខុ១អង្គ ដែលជាប់ចោទពីបទប៉ងរំលោភសេពសន្ថវៈក្មេងស្រីអាយុ៣ឆ្នាំ តែមិនបានសម្រេច នៅបន្ទប់ទឹកខាងក្រោយការិយាល័យទេសចរណ៍ ស្ថិតក្នុងសង្កាត់ប៉ៃលិន ក្រុងប៉ៃលិន ។ ក្រោយពីឃាត់ខ្លួនភិក្ខុអង្គនេះ ក៏ត្រូវបានមន្ត្រីសង្ឃធ្វើការផ្សឹកទៅតាមពុទ្ធវិន័យផងដែរ ។
លោក សំ សាវឿន ប្រធានមន្ទីរធម្មការនិងសាសនាខេត្តថ្លែងថា ជនសង្ស័យឈ្មោះ ពិន ចាន់សេរីរ័ត្ន អាយុ៣១ឆ្នាំ ជាអតីតភិក្ខុសង្ឃធ្លាប់គង់នៅវត្តក្រពើ ស្ថិតក្នុងភូមិក្រពើ ឃុំភ្នំសំពៅ ស្រុកបាណន់ ខេត្តបាត់ដំបង តែបានមកគង់នៅក្នុងខេត្តប៉ៃលិន ដោយមិនដឹងថាវត្តណាច្បាស់លាស់ ។
បើតាមប្រភពព័ត៌មានពីនគរបាលខេត្តឲ្យដឹងថា បន្ទាប់ពីទទួលដំណឹងពីប្រជាពលរដ្ឋថា មានករណីប៉ងរំលោភសេពសន្ថវៈក្មេងស្រីម្នាក់តែមិនបានសម្រេចពីសំណាក់ភិក្ខុអង្គនោះ សមត្ថកិច្ចនគរបាលក៏ចុះស្រាវជ្រាវរកជនសង្ស័យ ប៉ុន្តែជននេះ បានជម្លៀសខ្លួនតាមរថយន្ត ទៅកាន់វត្តមួយនៅខេត្តបាត់ដំបង ។
ពេលនោះ សមត្ថកិច្ចជំនាញក៏បានទាក់ទងទៅសមត្ថកិច្ចចរាចរណ៍ ដែលដាក់ពង្រាយតាមគោលដៅត្រួត
ពិនិត្យតាមផ្លូវជាតិលេខ៥៧ ឱ្យឃាត់រថយន្តដែលជនសង្ស័យជិះ និងឃាត់ខ្លួនបាន ។ ប្រភពព័ត៌មានបន្ត
ថា ក្រោយពីឃាត់ខ្លួន ក៏បានបញ្ជូនទៅការិយាល័យនគរបាលប្រឆាំងការជួញដូរមនុស្ស និងការពារអនីតិជនខេត្ត ដើម្បីសាកសួរបន្ថែមទៀត រួចប្រគល់ឲ្យខាងមន្ទីរធម្មការនិងសាសនាខេត្តជាអ្នកដោះស្រាយ
បន្ត ។
លោក សំ សាវឿន បានឲ្យដឹង កាលពីរសៀលថ្ងៃទី១១ ខែធ្នូថា រឿងហេតុខាងលើ គឺមានការយល់ច្រឡំ
ខ្លះៗ ដោយសារតែករណីនេះ គឺភិក្ខុអង្គនោះបានឲ្យលុយក្មេងស្រីរងគ្រោះ៥០០រៀល ហើយក្មេងស្រីក៏ទៅតាម ។ ដោយមិនចង់ឱ្យខេត្តប៉ៃលិន មានឈ្មោះពាក់ព័ន្ធនឹងរឿងអាស្រូវ ទើបខាងមន្ទីរប្រជុំជាមួយមន្ត្រីសង្ឃខេត្តឲ្យភិក្ខុ ដែលជាជនសង្ស័យសឹកតែម្ដង នៅថ្ងៃកើតហេតុខាងលើ ។
ជនសង្ស័យ មកស្នាក់នៅខេត្តប៉ៃលិន តែមិនដឹងគង់នៅវត្តណាច្បាស់លាស់នោះទេ ហើយកន្លងមកធ្លាប់គង់នៅវត្តក្រពើ ឃុំភ្នំសំពៅ ស្រុកបាណន់ ខេត្តបាត់ដំបង ។ បើតាមប្រភពព័ត៌មានពីប្រជាពលរដ្ឋថា ភិក្ខុអង្គនេះ ធ្លាប់និមន្តបិណ្ឌបាតក្នុងក្រុងប៉ៃលិន អស់រយៈពេលជាងកន្លះខែមកហើយ ប៉ុន្តែមិនដឹងនៅវត្តណាទេ ។ បើតាមការសាកសួរផ្ទាល់ថា លោកគង់នៅវត្តភ្នំយ៉ាត ៕
ចែករំលែកព័តមាននេះ