ខេត្តព្រះសីហនុ ៖ មន្ត្រីសាខាកាំកុងត្រូលខេត្ត ដោយមានការចូលរួមពីមន្ត្រីរដ្ឋបាលស្រុកនិងសមត្ថកិច្ចមូលដ្ឋាន កាលពីព្រឹកថ្ងៃទី១១ ខែធ្នូ បានចុះពិនិត្យគ្រឿងសមុទ្រក្រៀម និងស្រស់នៅផ្សារវាលរេញ ។ មន្ត្រីសាខាកាំកុងត្រូលបានឱ្យដឹងថា…
ខេត្តព្រះសីហនុ ៖ មន្ត្រីសាខាកាំកុងត្រូលខេត្ត ដោយមានការចូលរួមពីមន្ត្រីរដ្ឋបាលស្រុកនិងសមត្ថកិច្ចមូលដ្ឋាន កាលពីព្រឹកថ្ងៃទី១១ ខែធ្នូ បានចុះពិនិត្យគ្រឿងសមុទ្រក្រៀម និងស្រស់នៅផ្សារវាលរេញ ។
មន្ត្រីសាខាកាំកុងត្រូលបានឱ្យដឹងថា នៅពេលទៅត្រួតពិនិត្យនោះ សមត្ថកិច្ចបានធ្វើការពិសោធន៍រកសារ ធាតុដែលហាមឃាត់ និងរកឃើញបបែលក្រៀម មានដាក់លាយសារធាតុគីមីហាមឃាត់ (បូរ៉ាក់)ចំនួន២៤,៥គីឡូក្រាម និងបង្គាស្រស់ ដែលគេបាញ់ចាហួយចូលចំនួន១៥គីឡូក្រាម ។ ទំនិញជាគ្រឿងបរិភោគនេះ អាជីវករដាក់លក់តាមចិញ្ចើមផ្លូវជាតិលេខ៤ មុខផ្សារវាលរេញនិងនៅក្បែរនោះ ។
លោក ជា ប៉ិច អនុប្រធានសាខាកាំកុងត្រូលខេត្ត បានឲ្យដឹងថា ក្រោយពីរកឃើញក៏បានដកហូតយកទៅកម្ទេចចោល និងតម្រូវឱ្យបងប្អូនអាជីវករពាក់ព័ន្ធធ្វើកិច្ចសន្យាឱ្យប្រុងប្រយ័ត្ន និងបញ្ឈប់ការលក់ដូរម្ហូបអាហារសមុទ្រលាយសារធាតុគីមីជាបន្តទៀតនៅថ្ងៃខាងមុខ ។ ចំពោះបបែលក្រៀមមានសារធាតុគីមី និងបង្គាស្រស់ដែលមានបាញ់ចាហួយនេះ ត្រូវអាជីវករទាំងនោះអះអាងថា បានទិញបន្តយកមកលក់ដោយពុំបានដឹងថាមានលាយសារធាតុគីមីហាមឃាត់នោះទេ ព្រោះគាត់មិនមែនជាអ្នកជំនាញ ។
សូមបញ្ជាក់ថា ក្រោយពីរកឃើញមានសារធាតុគីមីហាមឃាត់នៅក្នុងបបែលក្រៀម និងបង្គាស្រស់នៅផ្សារវាលរេញ ទំនិញដែលចាប់បាននៅផ្សារលើ ក្រុងព្រះសីហនុមុននេះចំនួន២០គីឡូក្រាម ក៏ត្រូវបានយកមកដុតកម្ទេចចោលដែរ នារសៀលថ្ងៃដដែលនៅក្នុងស្នាក់ការសាខាកាំកុងត្រូលខេត្ត ៕
ចែករំលែកព័តមាននេះ