ខេត្តសៀមរាប ៖ ភ្ញៀវទេសចរបរទេសជាច្រើននាក់ដែលធ្វើដំណើរពីខេត្តសៀមរាប ទៅកាន់ខេត្តបាត់ដំបង ឆ្លងកាត់បឹងទន្លេសាប បានសំដែងនូវការមិនសប្បាយចិត្តយ៉ាងខ្លាំងចំពោះបុគ្គលិកក្រុមហ៊ុនវិនិយោគកំពង់ផែ ស៊ូជីង ដែលបានរារាំងបង្ខំឱ្យពួកគេបង់លុយក្រៅសេវា។ នេះជាផលប៉ះពាល់ធ្ងន់ធ្ងរសំរាប់វិស័យទេសចរណ៍ដែលកំពុងមានសក្តានុពលនាពេលបច្ចុប្បន្ននៅកម្ពុជា។ កាលពីព្រឹកថ្ងៃទី២១ តុលា ភាពប្រទាញប្រទង់គ្នាមួយបានកើតឡើងរវាងក្រុមបុគ្គលិកក្រុមហ៊ុនស៊ូជីង ជាមួយភ្ញៀវទេសចរ ខណៈពេលបុគ្គលិកក្រុមហ៊ុនបានព្យាយាមរារាំងយ៉ាងដាច់អហង្ការ ដើម្បីបង្ខំឱ្យភ្ញៀវបង់លុយចំនួន២ដុល្លារ បន្ថែមពីលើថ្លៃសំបុត្រកាណូតនោះ។ ក្រុមមន្ត្រីអាជ្ញាធរ រួមនឹងមន្ត្រីក្រសួងទេសចរណ៍ បានធ្វើការស្តីបន្ទោសទៅលើក្រុមហ៊ុន ស៊ូជីង ថា ធ្វើអ្វីៗស្រេចតែអំពើចិត្ត ដោយពុំមានគោលការណ៍តាមច្បាប់ នាំឱ្យប៉ះពាល់យ៉ាងធ្ងន់ធ្ងរដល់ការប្រឹងប្រែងផ្សព្វផ្សាយគោលនយោបាយទេសចរណ៍ជាតិ។
សេចក្តីរាយការណ៍ពីកំពង់ផែក្រុមហ៊ុនវិនិយោគស៊ូជីង ដ៏ចំរូងចំរាសនេះបានឱ្យដឹងថា នៅវេលាម៉ោង៧ព្រឹកថ្ងៃទី២១ តុលា គេឃើញភ្ញៀវទេសចរមួយក្រុមមានគ្នាចំនួន២៤នាក់ បានជិះរថយន្តមកកាន់កំពង់ផែនោះ ដើម្បីបន្តដំណើរឆ្លងកាត់បឹងទន្លេសាបឆ្ពោះទៅខេត្តបាត់ដំបង តាមជើងកាណូតក្រុមហ៊ុន «អង្គរអ៊ិចប្រេស»។ ប៉ុន្តែខណៈពេលពួកគេបំរុងចុះកាណូត ស្រាប់តែមានបុគ្គលិក និងសន្តិសុខរបស់ក្រុមហ៊ុនស៊ូជីងប្រមាណ១០នាក់ បានធ្វើសកម្មភាពរារាំងផ្លូវ រួចបង្ខំឱ្យពួកគេបង់លុយក្នុងម្នាក់ៗចំនួនពីរដុល្លារថែមទៀត ទើបអនុញ្ញាតឱ្យចុះកាណូតបាន។ សេចក្តីរាយការណ៍ដដែលបានបន្តទៀតថា ក្រោយពីមានការស្ទាក់ឃាត់ដំណើរនោះ មានភ្ញៀវចំនួន១២នាក់ បានបង្ខំចិត្តបង់លុយតាមការតំរូវ ក្រៅពីនោះបានប្រកែកមិនយល់ព្រម ដោយប្រាប់ថា គេបានទិញសំបុត្រកាណូតក្នុងម្នាក់២០ដុល្លាររួចហើយ រឿងអីឱ្យគេបង់លុយថែមយ៉ាងដូច្នេះ។ ការឃាត់ស្ទាក់បានអូសបន្លាយអស់រយៈពេលជិតមួយម៉ោង ហើយនៅពេលម៉ោងកំណត់នៃការចេញកាណូតបានខិតជិត មកដល់ភ្ញៀវទាំងអស់បានប្រឹងប្រែងសំរុកទៅមុខ ហើយក្រុមអ្នកបំរើការក្រុមហ៊ុនស៊ូជីងក៏ព្យាយាមរាំងខ្ទប់ឱ្យខាងតែបាន។ ខណៈសម្លេងស៊ីប្លេកាណូតដែលនៅជាប់ស្ពានកំពង់ផែបន្លឺឡើង បានជំរុញភ្ញៀវ ឱ្យសំរុកមកបុកបារ៉ាស់របស់ក្រុមអ្នកស្ម័គ្រស្មោះជាមួយក្រុមហ៊ុនស៊ូជីងធ្វើឱ្យមានការរុញគ្នាទៅវិញទៅមក រហូតដល់ព័ត៌មានដ៏អាក្រក់នេះ លេចឮដល់អាជា្ញធរខេត្ដទើបមានភាពធូរស្រាលឡើងវិញ។
ភ្ញៀវទេសចរម្នាក់ឈ្មោះ បែដ ធែន ផែន ជាជនជាតិអង់គ្លេស ដែលបានប្រវាយប្រតប់ នៅក្នុងហេតុការណ៍នោះបាននិយាយទាំងខឹងសម្បាថា នេះជាព្រឹត្ដិការណ៍ដ៏អាក្រក់ ដែលគេពុំធ្លាប់ដែលបានជួបប្រទះ ក្នុងមួយឆាកជីវិតនេះ។ ចំណែកស្ដ្រីជាភ្ញៀវទេសចរជនជាតិអង់គ្លេសម្នាក់ទៀត ឈ្មោះលីនដឺ ស្ទេវេន ក្នុងវ័យប្រហែលជាង៥០ឆ្នាំ ស្ថិតក្នុងសភាពខឹងឡើងញ័រមាត់ បាននិយាយថា កម្ពុជាជាប្រទេសមួយមានទេសភាពស្រស់ត្រកាល រួមទាំងប្រជាពលរដ្ឋមានភាពស្លូតបូតរាក់ទាក់ មិនគួរណាបុគ្គលិកទាំងអស់នេះធ្វើអំពើបែបនេះសោះ។ ទាក់ទិនជាមួយហេតុការណ៍នេះ លោកមាស ចាន់ណារិទ្ធ តំណាងក្រុមហ៊ុន «អង្គរអ៊ិចប្រេស» ក្នុងចំណោមក្រុមហ៊ុនចំនួន៤ ដែលបំរើសេវាកម្មដឹកភ្ញៀវទេសចរចេញចូលខេត្ដសៀមរាប-បាត់ដំបង» បានថ្លែងប្រាប់ថា ភាពចំរូងចំរាសទាំងនោះវាបានចាប់ផ្ដើមឡើងតាំងពីថ្ងៃទី១៩ ខែតុលា ក្រោយពេលក្រុមហ៊ុនវិនិយោគកំពង់ផែស៊ូជីង មានមូលដ្ឋាននៅសង្កាត់ចុងឃ្នៀស ក្រុងសៀមរាប អនុវត្ដបង្ខំឱ្យភ្ញៀវទេសចរឆ្លងកាត់បង់លុយចំនួនពីរដុល្លារ ដូចភ្ញៀវទេសចរចូលលំហែនៅបឹងទន្លេសាបដែរ ដែលពីមុនមកមិនធ្លាប់មានទេ។
លោកបានបន្ដថា ការបង្ខំឱ្យភ្ញៀវបង់លុយនោះខាងក្រុមហ៊ុនកំពង់ផែពុំមានឯកសារផ្លូវច្បាប់ពីអាជា្ញធរខេត្ដទេគឺគេកំណត់អនុវត្ដដោយខ្លួនឯងទើបបង្កការច្របូកច្របល់ដល់ថ្នាក់ហ្នឹង។ សព្វថ្ងៃកាណូតដឹកភ្ញៀវពីសៀមរាប ទៅបាត់ដំបង ឬទៅភ្នំពេញ ម្នាក់ៗស្ទើរតែដួលក្ស័យធនអស់ទៅហើយ ចាប់តាំងពីផ្លូវជាតិលេខ៦ និងលេខ៥ ធ្វើស្អាតរួចមក ព្រោះមានរថយន្ដក្រុងរត់ច្រើនជាពិសេសតំលៃថោកជាង និងប្រើពេលតិចជាងផង បើក្រុមហ៊ុនមកកំណត់ឱ្យភ្ញៀវបង់លុយទៀតច្បាស់ជាដាច់បាយមិនខាន។ លោកបន្តទៀតថា កន្លងមកខាងក្រុមហ៊ុនកាណូតដឹកភ្ញៀវរបស់ពួកគាត់បានបង់លុយថ្លៃចំណតកំពង់ផែរាល់ជើង រឿងអីមកកំណត់យកលុយពីភ្ញៀវទៀត។
អភិបាលរងខេត្ដសៀមរាប លោកប៊ុន ថាឫទ្ធិ បានថ្លែងថា កន្លងមកក្នុងដីកាព្រមព្រៀងរវាងអាជ្ញាធរខេត្ដ ជាមួយក្រុមហ៊ុនវិនិយោគកំពង់ផែស៊ូជីងនោះ បានកំណត់ឱ្យក្រុមហ៊ុនយកថ្លៃពីរដុល្លារ ពីភ្ញៀវទេសចរបរទេសដែលចូលទស្សនាមាត់បឹងទន្លេសាប តែមិនមានគោលការណ៍ឱ្យយកលុយពីភ្ញៀវទេសចរឆ្លងកាត់នោះទេ។ លោកបានបន្ដដោយរបៀបស្ដីបន្ទោសទៅលើក្រុមហ៊ុនកំពង់ផែនោះថា ពេលនេះបើក្រុមហ៊ុនទៅយកលុយបែបហ្នឹងវាខុសច្បាប់ហើយ ហើយលោកនឹងឱ្យមន្ដ្រីជំនាញនិងសមត្ថកិច្ចចុះទៅពិនិត្យមើល មិនអាចអនុញ្ញាតឱ្យធ្វើដូច្នេះទេ។
រដ្ឋមន្ដ្រីក្រសួងទេសចរណ៍លោកថោង ខុន នៅព្រឹកថ្ងៃទី២១ តុលា បានមានប្រសាសន៍ប្រាប់តាមទូរសព្ទ័ថា ចំពោះគោលការណ៍ដែលក្រុមហ៊ុនស៊ូជីង ទៅយកលុយពីភ្ញៀវទេសចរឆ្លងកាត់បន្ថែមពីលើតំលៃសំបុត្រកាណូតនោះ ខាងលោកមិនបានដឹងទេ ព្រោះវាជាដែនសមត្ថកិច្ចគ្រប់គ្រងរបស់អាជា្ញធរខេត្ដ។ លោករដ្ឋមន្ត្រីបានបន្តថា បច្ចុប្បន្នក្រសួងកំពុងប្រឹងប្រែងបង្កើនការផ្សព្វផ្សាយពីគោលនយោបាយទេសចរណ៍ជាតិ ដើម្បីកំណើនភ្ញៀវគេមកលេងស្រុកយើងឱ្យបានច្រើន ហើយបើក្រុមហ៊ុនវិនិយោគស៊ូជីងធ្វើសកម្មភាពបែបហ្នឹងវាប៉ះពាល់ធ្ងន់ធ្ងរណាស់ដល់គោលនយោបាយទេសចរណ៍ជាតិរបស់យើង។ លោកបន្ថែមថា លោកនឹងតំរូវឱ្យអ្នកណាដែលទៅឈ្លោះជាមួយភ្ញៀវនោះធ្វើកំណត់ហេតុឱ្យបានត្រឹមត្រូវជូនមកក្រសួងដើម្បីពិនិត្យ ព្រោះអ្នកណាក៏យើងមិនអនុញាតឱ្យទៅឈ្លោះជាមួយភ្ញៀវទាំងទទឹងទិសដូច្នេះដែរ។ រឿងរ៉ាវទាំងប៉ុន្មានអាចដោះស្រាយគ្នាតាមក្រោយ រង់ចាំឱ្យភ្ញៀវគេទៅផុតសិន។
អគ្គនាយកក្រុមហ៊ុនវិនិយោគកំពង់ផែស៊ូជីង ដែលមានរឿងចំរូងចំរាសមិនឈប់ឈរ លោក វ៉ា ឈូដា កាលពីរសៀលថ្ងៃដដែលនោះបានថ្លែងថា ការកំណត់យកតំលៃពីរដុល្លារពីភ្ញៀវទេសចរឆ្លងកាត់នោះគឺធ្វើឡើងតាមច្បាប់ បើមិនជឿទៅមើលកិច្ចសន្យាជាមួយសាលាខេត្ដទៅ។ លោកបានទំលាក់កំហុសទៅលើក្រុមហ៊ុនកាណូតដឹកភ្ញៀវទាំងនោះថា ជាមេបញ្ហា ដែលរឿងហ្នឹង វាកើតឡើងជាយូរយារណាស់មកហើយ។ ភាពចំរូងចំរាសរវាងក្រុមហ៊ុនវិនិយោគកំពង់ផែស៊ូជីងជាមួយក្រុមប្រជាពលរដ្ឋប្រកបរបររត់កាណូត តែងតែឃើញផ្ទុះឡើងជាហូរហែ មិនចេះដាច់ ហើយកាលពីរសៀលថ្ងៃទី៣០ ខែកញ្ញាឆ្នាំ២០១០ ក្រុមកម្មករសំណង់រួមទាំងសន្ដិសុខឯកជនរបស់ក្រុមហ៊ុននេះក៏មានការប៉ះទង្គិចគ្នាមួយប្រាវរហូតដល់ផ្ទុះអាវុធរវាងបុគ្គលិកនាយកដ្ឋានសណ្ដាប់ធ្នាប់និងសហប្រតិបត្ដិការនៃអគ្គនាយកដ្ឋានអាជា្ញអប្សរា ខណៈដែលក្រុមអាជា្ញធរបានចុះទៅផ្អាកការសាងសង់នៅក្នុងបរិវេណក្រុមហ៊ុនអគ្គិសនីស៊ូជីង ស្ថិតនៅភូមិថ្នល់ សង្កាត់ស្រងែ ក្រុងសៀមរាប ផងដែរ៕
ចែករំលែកព័តមាននេះ