រាជធានីភ្នំពេញ ៖ រថយន្តឡិចស៊ីសមួយគ្រឿង បើកបរដោយមនុស្សមួយក្រុម មានពាក់ឯកសណ្ឋានជា
មន្ត្រីនគរបាល និងស៊ីវិល ដោយបើកក្នុងល្បឿនលឿនបត់ឆ្លងផ្លូវភ្លាមៗមិនស៊ីញ៉ូ បណ្តាលឱ្យយុវជន៥នាក់ជិះម៉ូតូ២គ្រឿងកំពុងធ្វើដំណើរបញ្ច្រាសទិសគ្នា ក្នុងល្បឿនយ៉ាងលឿនដែរនោះ ក៏ជ្រុលបុករថយន្តចំហៀងខាងស្តាំដួលអូសរបួសសន្លប់រណូករណែលពេញផ្លូវ ។ ហេតុការណ៍នេះ កើតឡើងកាលពីវេលាម៉ោង១០និង១៥នាទីយប់ថ្ងៃទី១២ ធ្នូ ស្ថិតតាមបណ្ដោយផ្លូវជាតិលេខ6A កែងផ្លូវបត់ឡើងមកស្ពានដែកបាឡេ សង្កាត់ជ្រោយចង្វារ ខណ្ឌជ្រោយចង្វារ ។
ប្រភពឱ្យដឹងថា ភាគីខាងរថយន្ត គឺម៉ាកឡិចស៊ីសRX330 ពណ៌ទឹកប្រាក់ ពាក់ស្លាកលេខភ្នំពេញ2U-6385 បើកដោយបុរសមួយក្រុមមានគ្នា៤នាក់ បានរងការខូចខាតមួយមួយចំហៀងខាងស្ដាំ តែមនុស្សមិនអីនោះទេ ។ ដោយឡែក ខាងម៉ូតូគឺសង់ប៊ិចសេ110 ពណ៌ខ្មៅ ពាក់ស្លាកលេខ 1CE:0700 បើកបរដោយយុវជន3នាក់ (រងរបួសធ្ងន់) និងម៉ូតូមួយគ្រឿងទៀត ម៉ាក MSX ពណ៌ក្រហម ពាក់ស្លាកលេខភ្នំពេញ1FZ-6841 ជិះដោយយុវជន២នាក់ រងរបួសធ្ងន់ម្នាក់ និងស្រាលម្នាក់ ។
ប្រភពពីជនរងគ្រោះនិងអ្នកឃើញហេតុការណ៍ ដែលជួយដេញឃាត់រថយន្ត បានប្រាប់ថា មុនកើតហេតុ គេឃើញរថយន្តបង្ក បើកតាមបណ្តោយផ្លូវជាតិលេខ6A ទិសដៅពីជើងទៅត្បូង ក្នុងល្បឿនលឿន ។ លុះមកដល់កន្លែងកើតហេតុ ស្រាប់តែរថយន្ត បត់ឆ្វេងឆ្លងចូលផ្លូវឡើង ទៅស្ពានដែកបាឡេ ភ្លាមៗដោយមិនបានស៊ីញ៉ូ ធ្វើឲ្យម៉ូតូរងគ្រោះទាំង២គ្រឿង បណ្តាលឱ្យដួលសន្លប់ស្តូកស្តឹងពេញថ្នល់របួសធ្ងន់៤នាក់និងស្រាលម្នាក់ បង្កជាការភ្ញាក់ផ្អើលពេញដងផ្លូវ ។
ភ្លាមៗ ខាងរថយន្តមិនបានឈប់ដោះស្រាយទេ បានបន្ថែមល្បឿនបើកឡើងស្ពានរត់គេចខ្លួន រហូតទៅដល់ផ្លូវជាតិលេខ5 ទល់មុខមន្ទីរពេទ្យសម្តេចឪ ខណ្ឌឫស្សីកែវ ក៏ត្រូវអ្នកឃើញហេតុការណ៍ឃាត់ជាប់ តែម្តង ។ ភ្លាមៗ ឃើញមានវត្តមាន អ្នកនៅក្នុងរថយន្តស្លៀកពាក់ឯកសណ្ឋាននគរបាល ចុះពីរថយន្តរត់គេចខ្លួនបាត់ស្រមោល។
ក្រោយកើតហេតុ ជនរងគ្រោះត្រូវបានរថយន្តសង្គ្រោះមកដឹកយកជនរងគ្រោះទៅសង្គ្រោះភ្លាមៗនៅមន្ទីរពេទ្យ។ ចំណែកម៉ូតូ និងរថយន្ត ត្រូវបានកម្លាំងសមត្ថកិច្ចមូលដ្ឋានធ្វើការវាស់វែងប្រគល់ទៅខាងជំនាញចរាចរណ៍ក្រុង យកទៅរក្សាទុកបណ្តោះអាសន្ន នៅស្នងការដ្ឋាននគបាលចរាចណ៍ផ្លូវគោករាជធានីភ្នំពេញ រង់ចាំការដោះស្រាយ ។
ចែករំលែកព័តមាននេះ