រាជធានីភ្នំពេញ ៖ ទីបំផុតរដ្ឋសភាបានលើកដៃអនុម័តសេចក្តីស្នើវិសោធនកម្មច្បាប់ស្តីពីគណបក្សនយោបាយមាត្រា៤៥ថ្មី ដែលមាន២មាត្រាជាស្ថាពរ ដោយសម្លេង១១៥នៃចំនួនសមាជិកសភាទាំងមូល ។
ការធ្វើពិភាក្សា និងអនុម័តច្បាប់នេះក្នុងបន្តសម័យប្រជុំលើកទី១នីតិកាលទី៦នៃរដ្ឋសភា ក្រោមអធិបតីភាព សម្តេច ហេង សំរិន ប្រធានរដ្ឋសភា ។ សម័យប្រជុំរដ្ឋសភានេះគេមិន ឃើញមានវត្តមានសម្តេចតេជោ ហ៊ុន សែន សម្តេច ស ខេង ឧបកនាយករដ្ឋមន្ត្រី រដ្ឋមន្ត្រីក្រ សួងមហាផ្ទៃ សម្តេច ពិជ័យសេនា ទៀ បាញ់ នោះទេ ។
ការអនុម័តច្បាប់នេះក៏ជាផ្នែកមួយនៃការបើកផ្លូវដល់អ្នកនយោបាយប្រឆាំងដែលត្រូវបានតុលាការហាមឃាត់ក្នុងការធ្វើនយោបាយរយៈពេល៥ឆ្នាំផងដែរ ។ ប៉ុន្តែការបើផ្លូវនេះត្រូវ អនុលោមតាមខ្លឹមសារនៃច្បាប់ ។
លោកប៉ែន បញ្ញា ប្រធានគណៈកម្មការនីតិកម្ម និងយុត្តិធម៌បានលើកឡើងថា ច្បាប់ស្តីពីគណបក្សនយោបាយត្រូវបានធ្វើវិសោធនកម្មចំនួន៣ដងមកហើយ ។ សេចក្តីស្នើវិសោធនកម្មច្បាប់ស្តីពីគណបក្សនយោបាយមាត្រា៤៥ថ្មីនេះ ត្រូវបានស្នើសុំឲ្យសមាជិករដ្ឋសភាចំនួន៨៧រូប ហើយការមានគោលដៅសំខាន់ៗ គឺបញ្ជាក់ឲ្យច្បាប់តាមផ្លូវច្បាប់អំពីករណីបុគ្គលដែល ត្រូវបានតុលាកាហាមឃាត់ការធ្វើសកម្មភាពនយោបាយ ។
បើកលទ្ធភាពឲ្យបុគ្គលប្រភេទខាងលើកអាចទទួលបាននីតិសម្បទាឡើងវិញ តាមច្បាប់នេះ ។ វិសោធកម្មច្បាប់នេះក៏មានគោលបំណងពង្រឹងលទ្ធិប្រជាធិតេយ្យសេរីពហុបក្សនីតិរដ្ឋព្រមទាំង លើកកម្ពស់ស្មារតី បង្រួបបង្រួមជាតិផងដែរ ។ លោកបន្តថាសេចក្តីព្រាងច្បាប់វិសោធនកម្មមាត្រា៤៥ថ្មី (ស្ទួន) ត្រូវបានអ្នកតំណាងរាស្ត្រចំនួន៨៧រូបបានស្នើសុំធ្វើវិសោធនកម្មទៅជាសេចក្តីស្នើច្បាប់មាត្រា៤៥ថ្មី(ស្ទូនមួយ) ដែលមានខ្លឹមសារយ៉ាងដូច្នេះថា បុគ្គលដែលត្រូវតុលាការសម្រេចហាមឃាត់ការធ្វើសកម្មភាពនយោបាយមិនអាចបង្កើតគណបក្សនយោបាយ ឬចូលរួមក្នុងគណបក្សនយោបាយណាមួយ ឬឈរឈ្មោះឲ្យគេបោះឆ្នោត ឬធ្វើសកម្មភាពណាមួយគាំទ្រ ឬប្រឆាំងគណបក្សណាមួយបានឡើយ ។
ចំណែកលោក ជាម យៀប តំណាងម្ចាស់ហត្ថលេខីបានលើកឡើងថា សេចក្តីវិសោធនកម្មច្បាប់នេះនឹងត្រូវបញ្ជូលទៅកាន់រាជរដ្ឋាភិបាលតាមច្បាប់កំណត់ ។ លោកបន្តថា ការធ្វើវិសោធនកម្មច្បាប់គណបក្សនយោបាយនេះ គឺជាលើកទី៣ហើយ ។ ការធ្វើវិសោធនកម្មច្បាប់នេះធ្វើមិនស្ថិតក្រោមគំនាបពីបរទេសនោះទេ ។ គឺការធ្វើវិសោធនកម្មច្បាប់គណបក្សនយោបាយនេះ ដើម្បីធ្វើការបង្រួបបង្រួមជាតិសណ្តោសប្រណីរបស់គណបក្សប្រជាជនកម្ពុជាដែលគោរពលទ្ធិប្រជាធិបតេយ្យ សេរីពហុបក្ស ។
ការធ្វើវិសោធនកម្មច្បាប់នេះក៏ដើម្បីពង្រឹងតួនាទី និងការទទួលសុខត្រូវរបស់គណបក្សនយោបាយនៅក្នុងប្រទេសកម្ពុជាស្របតាមការសភាពការវិវត្តន៍របស់សង្គមកម្ពុជា និងស្របគោលការណ៍លទ្ធិប្រជាធិបតេយ្យ សេរីពហបក្ស និងព្រមទាំង ពង្រឹងសន្តិសុខជាតិឯករាជ្យ អធិបតេយ្យភាព ។ លោកបានបន្តថា មូលហេតុនៃការធ្វើវិសោធនកម្មច្បាប់គណបក្សនយោបាយនេះ គឺដើម្បីធានាភាពច្បាស់លាស់របស់បុគ្គលដែលត្រូវបានតុលាការជាប់ខ្ពស់សម្រេចហាមឃាត់ការធ្វើសកម្មភាពនយោបាយ និងប្រសិទ្ធិភាពនៃការអនុវត្តច្បាប់នេះស្របតាមគោលការណ៍ នីតិរដ្ឋ ដើម្បីលើកកម្ពស់ស្មារតីបង្រួបបង្រួមជាតិក៏ដូចជា ពង្រឹងលទ្ធិប្រជាធិបតេយ្យនៅកម្ពុជា ។
លោកបញ្ជាក់ថា «យើងខ្ញុំទាំងអស់គ្នាដែលជាតំណាងរាស្ត្រហត្ថលេខីដូចជា មានបញ្ជីរាយនាមនេះយល់ឃើញថា ច្បាប់ស្តីពីគណបក្សនយោបាយចាំបាច់ត្រូវធ្វើវិសោធនកម្មបន្ថែមដោ យត្រូវថ្វាយព្រះមហាក្សសត្រនៃព្រះរាជាណាចក្រកម្ពុជាជាទីសក្ការៈដ៏ខ្ពស់ខ្ពស់បំផុតនូវព្រះរាជតួនាទីស្របតាមស្មារតីនៃរដ្ឋធម្មនុញ្ញ ក្នុងការផ្តល់នីតីសម្បទាឡើងវិញ ចំពោះអ្នកនយោបាយដែលត្រូវតុលាការកំពូលសម្រេចហាមឃាត់កាធ្វើសកម្មភាពនយោបាយតាមអំណាចសាលដីកា ហើយដែលអ្នកនយោបាយទាំងនោះមិនបានធ្វើសកម្មភាពណាមួយប្រឆាំង នឹងផលប្រយោជន៍នៃព្រះរាជាណាចក្រកម្ពុជាក៏ដូចជាមិនធ្វើឲ្យប៉ះពាល់ដល់គោលការណ៍នីតិរដ្ឋ និងសន្តិសុខជាតិ» ។
សូមជម្រាបថាសម្តេចតេជោ ហ៊ុន សែនកាលពីថ្ងៃទី១២ ធ្នូបានបញ្ជាក់ថា សេចក្តីស្នើវិសោធនកម្មច្បាប់ស្តីពីគណបក្សនយោបាយមាត្រា៤៥ថ្មីនេះមិនធ្វើសម្រាប់គណបក្សនយោបាយ ឬក្រុមណាមួយទេ ពោល គឺមិនសម្រាប់ក្រុមប្រឆាំងដែលកំពុងជាប់បម្រាមរបស់តុលាការកំពូលនោះទេ៕
ចែករំលែកព័តមាននេះ