រាជធានីភ្នំពេញ ៖ បុរសចំណាស់ម្នាក់បានដេកស្លាប់ក្នុងទឹកអាងរង្វង់មូលនាងមឆ្ឆា ដោយសង្ស័យថា ស្រវឹងស្រា ហើយខ្យល់គរដួលផ្កាប់មុខក្នុងទឹកលង់ស្លាប់ បង្កឱ្យជាការភ្ញាក់ផ្អើលដល់ប្រជាពលរដ្ឋពេញដងផ្លូវ ចោមរោមមើលដោយការងឿងឆ្ងល់កាលពីម៉ោង២និង២០នាទីរំលងអធ្រាត្រឈានចូលថ្ងៃទី១៣ ខែធ្នូ ឆ្នាំ២០១៨…
រាជធានីភ្នំពេញ ៖ បុរសចំណាស់ម្នាក់បានដេកស្លាប់ក្នុងទឹកអាងរង្វង់មូលនាងមឆ្ឆា ដោយសង្ស័យថា ស្រវឹងស្រា ហើយខ្យល់គរដួលផ្កាប់មុខក្នុងទឹកលង់ស្លាប់ បង្កឱ្យជាការភ្ញាក់ផ្អើលដល់ប្រជាពលរដ្ឋពេញដងផ្លូវ ចោមរោមមើលដោយការងឿងឆ្ងល់កាលពីម៉ោង២និង២០នាទីរំលងអធ្រាត្រឈានចូលថ្ងៃទី១៣ ខែធ្នូ ឆ្នាំ២០១៨ នៅនឹងរង្វង់នាងមឆ្ឆាផ្សារដើមថ្កូវ សង្កាត់ផ្សារដើមថ្កូវ ខណ្ឌចំការមន។
បុរសចំណាស់ដែលស្លាប់ដោយសារលង់ទឹកនោះមិនទាន់ត្រូវបានស្គាល់អត្តសញ្ញាណនៅឡើយទេ ព្រោះមិនទាន់អាចទាក់ទងរកសាច់ញាតិបាននៅឡើយទេ គាត់មានភិនភាគ សម្បុររាងស ស្លៀកខោខ្លីពណ៌ខ្មៅត្រឹមជង្គង់ ពាក់អាវយឺតពណ៌ខៀវលាយខ្មៅ។
ប្រភពព័ត៌មានប្រជាពលរដ្ឋដែលដឹងហេតុការណ៍ច្បាស់ប្រាប់ឱ្យដឹងថា មុនបង្កជាការភ្ញាក់ផ្អើល គឺគេឃើញសពបុរសខាងលើអង្គុយផឹកស្រាថ្នាំតែម្នាក់ឯងនៅទីនោះ មួយសន្ទុះក្រោយស្រាប់តែលោតចូលក្នុងទឹកអាងហែលលេង ឃើញដូច្នោះពួកគាត់ក៏ទៅលើកចេញមកវិញឱ្យអង្គុយនៅក្បែរនោះ ហើយក៏នាំគ្នាចេញបាត់។ រំលងបានប្រមាណជាមួយម៉ោងក្រោយ ក៏មិនឃើញគាត់អង្គុយសង្ស័យក៏ទៅអើតមើល ស្រាប់តែឃើញដេកផ្កាប់មុខស្លាប់ក្នុងអាងទឹកតែម្តង។ ដោយភ្លាមៗ ក៏មានប្រជាពលរដ្ឋជួយស្រង់ចេញ ហើយព្យាយាមជួយសង្គ្រោះតែហួសពេលទៅហើយ។
ក្រោយកើតហេតុ សពបុរសខាងលើសមត្ថកិច្ចសន្និដ្ឋានជំហានដំបូងថា អាចមកពីស្រវឹងស្រា ហើយខ្យល់គរដួលស្លាប់ក្នុងអាងទឹក ព្រោះនៅជិតសពគេឃើញមានដបស្រាថ្នាំនៅក្បែរនោះ ។ សមត្ថកិច្ចក៏ព្យាយាមរកសាច់ញាតិដែល តែមិនអាចទាក់ទងបានក៏សម្រេច ដឹកសពទៅតម្កល់ទុកនៅមណ្ឌលសុខភាពផ្សារដើមថ្កូវ រង់ចាំខាងជំនាញកោសល្យវិច្ឆ័យ មកពិនិត្យឱ្យដឹងច្បាស់ពីមូលហេតុនៃការស្លាប់ និងទាក់ទងរងសាច់ញាតិនៅពេលក្រោយដើម្បីឱ្យមកយកសពទៅធ្វើបុណ្យតាមប្រពៃណី ៕
ចែករំលែកព័តមាននេះ