ខេត្តបន្ទាយមានជ័យ ៖ អគ្គីភ័យបានលេបត្របាក់ផ្ទះអ្នកគ្រូពេទ្យម្នាក់ក្លាយជាផេះផង់ទាំងព្រឹក នៅថ្ងៃទី១២ ធ្នូ ២០១៨នេះ ក្នុងភូមិនិមិត្ត៣ សង្កាត់និមិត្ត ក្រុងប៉ោយប៉ែត។ ផ្ទះឆាបឆេះបង្កការ ភ្ញាក់ផ្អើលនេះទំហំ៩ម៉ែត្រ គុណនឹង១២ម៉ែត្រ ជញ្ជាំងឈើប្រក់ស័ង្កសី ក្រាលការ៉ូ(ផ្ទះតៀម) ជារបស់អ្នកគ្រូពេទ្យម្នាក់ឈ្មោះ ឯម សារឿន អាយុ៤៨ឆ្នាំ បម្រើការងារនៅមណ្ឌលសុខភាព ឃុំកូប ស្រុកអូរជ្រៅ ខេត្តបន្ទាយមានជ័យ។
លោកវរសេនីយ៍ទោ សេស វិបុល អធិការនគរបាលស្រុកអូរជ្រៅ ប្រាប់ថា ករណីឆាបឆេះខាងលើបណ្តាលមកពីទុស្សេខ្សែភ្លើងទូទឹកកកនៅក្នុងផ្ទះ ប៉ុន្តែមហាសំណាង ដោយសារកូនប្រុសស្រី៣នាក់តូចៗរបស់អ្នកគ្រូពេទ្យដែលពេលកើតហេតុស្ថិតនៅក្នុងផ្ទះពុំមានរងគ្រោះឡើយ។ លោកអធិការបន្តថា ក្រោយទទួលបានព័ត៌មានស្តីពីអគ្គិភ័យកើតឡើងនេះ កម្លាំងនគរបាលក្រុងប៉ោយប៉ែត និងស្រុកអូរជ្រៅ/អាជ្ញាធរ និងប្រជាការពារភូមិសហការណ៍គ្នា ជួយពន្លត់មានទាំងរថយន្តពន្លត់អគ្គីភ័យ២គ្រឿង ប៉ុន្តែមិនអាចជួយបានព្រោះកន្លែងកើតហេតុនៅឆ្ងាយ។
មកទល់ម៉ោងជាង៤រសៀល ថ្ងៃដដែលសមត្ថកិច្ចប្រាប់ថា មិនទាន់ដឹងពីទំហំខូចខាតនៅឡើយ គ្រាន់តែបញ្ជាក់ថា ទ្រព្យសម្បត្តិក្នុងផ្ទះឆេះអស់ទាំងស្រុងតែម្តង ព្រោះម្ចាស់ផ្ទះរវល់ទៅបម្រើការងារឯមណ្ឌលសុខភាព៕
ចែករំលែកព័តមាននេះ