ដុតទៀនទុកចោលមុខអាសនៈ ឆេះផ្អើលអស់អ្នកភូមិ
- កំពង់ឆ្នាំង
ខេត្តកំពង់ឆ្នាំង ៖ អគ្គិភ័យមួយបានកើតឡើងនៅវេលាម៉ោង៤ និង៣០នាទីរសៀល ថ្ងៃទី១២ ខែធ្នូ ឆ្នាំ២០១៨ នៅភូមិត្រពាំងបី សង្កាត់ផ្សារឆ្នាំង ក្រុងកំពង់ឆ្នាំង។…
ខេត្តកំពង់ឆ្នាំង ៖ អគ្គិភ័យមួយបានកើតឡើងនៅវេលាម៉ោង៤ និង៣០នាទីរសៀល ថ្ងៃទី១២ ខែធ្នូ ឆ្នាំ២០១៨ នៅភូមិត្រពាំងបី សង្កាត់ផ្សារឆ្នាំង ក្រុងកំពង់ឆ្នាំង។ ការឆាបឆេះនេះត្រូវបានសមត្ថកិច្ចបានប្រាប់ឲ្យដឹងថា គឺឆេះតែគ្រឿងក្នុងផ្ទះប៉ុណ្ណោះ មិនមានឆេះចេញមកខាងក្រៅនោះទេ ដោយសារមានការអន្តរាគមន៍ ពន្លត់ទាន់ពេលវេលា។ សមត្ថកិច្ចនគរបាលក្រុងកំពង់ឆ្នាំងបាននិយាយថា ផ្ទះរបស់ជនរងគ្រោះខាងលើ មានម្ចាស់ផ្ទះឈ្មោះ រស់ ចាន់ថាន អាយុ៥៦ឆ្នាំ គាត់គឺជាអ្នកស្នងរូប ដែលមានគ្រឿងអាសនៈ ជាច្រើនស្ទើរមួយកំណាត់ផ្ទះ។
មុនពេលកើតហេតុ ម្ចាស់ផ្ទះខាងលើមិនបាននៅក្នុងផ្ទះនោះទេ ស្រាប់តែពេលនោះមានផ្សែងខ្មួលខ្មាញ់ ចេញមកខាងក្រៅ ខណៈពេលនោះប្រជាពលរដ្ឋអ្នកជិតខាង បាននាំគ្នាស្រែកឆោឡោឡើង ហើយក៏បានរាយការណ៍ប្រាប់សមត្ថកិច្ច ទើបសមត្ថកិច្ចហៅរថយន្ត ពន្លត់អគ្គិភ័យចេញទៅបាញ់ទឹកអន្តរាគមន៍ ដោយមានប្រជាពលរដ្ឋនៅជិតខាង ជួយគាស់ទ្វារផ្ទះ និងបានជួយជញ្ជូនទឹកជះពន្លត់ផងដែរ។ ប្រភពដដែលបានបន្តថា ការឆាបឆេះនេះគឺដោយសារភ្លើងទៀន ដែលម្ចាស់ផ្ទះដុតនៅក្នុងអាសនៈរបស់គាត់ចោល ហើយចេញពីផ្ទះ។
ក្រោយពេលអន្តរាគមន៍របស់ រថយន្ដពន្លត់អគ្គិភ័យស្នងការដ្ឋាននគរបាលខេត្តរួមនឹងប្រជាពលរដ្ឋជាច្រើននាក់ រហូតដល់ម៉ោង៥ និង៣០នាទីល្ងាច ថ្ងៃដដែលទើបការពន្លត់អគ្គីភ័យបានស្ងប់ស្ងាត់ទៅវិញ។ ចំពោះការខូចខាតគឺឆេះសម្ភារខាងក្នុងផ្ទះ អស់ប្រមាណជាង៣០ភាគរយ។ យ៉ាងនេះក្តីគ្រោះអគ្កិភ័យខាងលើ មិនបណ្តាលឲ្យមានគ្រោះថ្នាក់ដល់នរណាម្នាក់នោះទេ៕
ចែករំលែកព័តមាននេះ